ആലപ്പുഴക്കാരി പൊന്നമ്മയുടെ മകള് ജിസല് തക്രാല്; ബിഗ് ബോസിലെ ഗ്ലാമറസ് സുന്ദരി ആരാണ്?
ഇക്കഴിഞ്ഞ ദിവസം ആരംഭിച്ച ബിഗ് ബോസ് മലയാളം സീസണ് ഏഴില് (Bigg Boss Malayalam Season 7), അന്താരാഷ്ട്ര ഫാഷന് റാംപില് നിന്നും ഇറങ്ങിവന്നുവെന്നപോലെ ഒരു മത്സരാര്ത്ഥിയെ കണ്ട പലരും ഒന്നന്ധാളിച്ചു കാണും. ആ യുവതിയുടെ പേര് ജിസല് തക്രാല് (Gizele Thakral). നൃത്തം ചെയ്തുകൊണ്ടാണ് ജിസല് ബിഗ് ബോസ് വീട്ടിലേക്ക് കയറിവന്നത്. നടിയും മോഡലും സംരംഭകയുമാണ് ജിസല്. സംസാരിച്ചു തുടങ്ങിയതും, ആ അന്ധാളിപ്പ് അല്പ്പം കൂടിയെങ്കിലേ ഉള്ളൂ. തനി മലയാളി. ഞാന് ആലപ്പുഴക്കാരിയാണ് എന്ന് സ്വയം വിശേഷിപ്പിച്ചു കൊണ്ട് ജിസല് ആരംഭിച്ചു. മോഹന്ലാലിനോട് സംസാരിക്കുമ്പോള്, ഹിന്ദി ചുവയുള്ള മലയാളം പറഞ്ഞെങ്കിലും, തെറ്റില്ലാതെ ജിസല് പറഞ്ഞൊപ്പിച്ചു. ആരാണ് ഈ റാമ്പ് വാക്ക് സുന്ദരി?
കേരളത്തിലും പഞ്ചാബിലും വേരോട്ടമുള്ള യുവതിയാണ് ജിസല്. കഴിഞ്ഞ ദിവസം ബിഗ് ബോസ് പ്രവേശന കവാടത്തില് ജിസല് തക്രാലിനൊപ്പം അമ്മയും കൂടിയുണ്ടായിരുന്നു. കണ്ണുകെട്ടി നടന്നു നീങ്ങി മെഡല് എടുത്ത് കഴുത്തിലണിഞ്ഞ്, പ്രവേശന വാതിലില് കൈരേഖ പതിപ്പിച്ച ശേഷം മാത്രമാണ് അവര് ബിഗ് ബോസ് മലയാളത്തിന്റെ ഭാഗമായത്. അകത്തുകയറി സഹ മത്സരാര്ത്ഥികളോട് സംസാരിച്ചതും മലയാളത്തില്. തക്രാലിന്റെ കാര്യത്തില് കുശലാന്വേഷണം അധികം നീണ്ടില്ല.
ആലപ്പുഴ സ്വദേശിയായ പൊന്നമ്മയുടെ മകളാണ് ജിസല്. പഞ്ചാബിയുടെ ഭാര്യയായതും പൊന്നമ്മ പൂനം എന്ന പേര് സ്വീകരിച്ചു. പിതാവ് ജിസലിന്റെ കുട്ടിക്കാലത്തേ മരിച്ചു. അമ്മയും വല്യമ്മയും ചേര്ന്നാണ് തന്നെ വളര്ത്തിയത് എന്ന് ജിസല് പറയുകയുണ്ടായി. മലയാളി-പഞ്ചാബി മാതാപിതാക്കളുടെ മകളെങ്കിലും, ജിസല് തക്രാല് പിറന്നത് ഈ രണ്ടിടത്തുമല്ല, രാജസ്ഥാനിലാണ്. പഠനത്തില് പണ്ടുമുതലേ താല്പ്പര്യം പ്രകടിപ്പിക്കാത്ത ജിസല്, ക്യാമറയ്ക്ക് മുന്നിലെത്തി.
കേവലം 14 വയസുള്ളപ്പോള് ജിസല് തക്രാല് മോഡലിംഗ് കരിയര് ആരംഭിച്ചു. കൗമാരക്കാലത്തു തന്നെ മോഡലിംഗ് പ്രോജക്ടുകളുടെ ഭാഗമായി. ഒരു സൂപ്പര് മോഡല് ആവനായിരുന്നു ആഗ്രഹം. ഇതിനിടെ ‘മിസ് രാജസ്ഥാന്’ പട്ടം അവരെത്തേടിയെത്തി. ‘മിസ് ബെസ്റ്റ് ബോഡി’, ‘മിസ് പൊട്ടന്ഷ്യല്’ വിഭാഗങ്ങളില് ജിസല് വിജയിച്ചു. പല മോഡലുകളുടെയും സ്വപ്നമായ കിങ്ഫിഷര് കലണ്ടറില് 2011ല് ജിസല് തക്രാല് പ്രത്യക്ഷപ്പെട്ടു. തൊട്ടുപിന്നാലെ, തുര്ക്കിയിലെ ‘ഫോര്ഡ് ഇന്റര്നാഷണല് കോണ്ടസ്റ്റില്’ ജിസല് പങ്കുകൊണ്ടു.
ബിഗ് ബോസ് മലയാളത്തില് വരും മുന്പേ, ബിഗ് ബോസ് ഹിന്ദിയിലും അവര് മത്സരാര്ത്ഥിയായിരുന്നു. കൂടാതെ, വേറെയും റിയാലിറ്റി ഷോകളില് ജിസല് പങ്കെടുത്തു. ‘സര്വൈവേഴ്സ് ഇന്ത്യ’യില് പങ്കെടുത്ത അവര്, പരിക്ക് മൂലം പുറത്തു പോകേണ്ടി വന്നു. ‘വെല്കം ബാസി മെഹ്മാന് നവാസി കി’ ആയിരുന്നു മറ്റൊന്ന്. ഹിന്ദിയിലെ ബിഗ് ബോസ് ഒന്പതാം സീസണിലാണ് ജിസല് തക്രാല് ഭാഗമായത്. ബോളിവുഡിലെ ഏതാനും സിനിമകളില് ജിസല് തക്രാല് നായികയായി. ഇതില് സണ്ണി ലിയോണിയുടെ ഒപ്പം ‘മസ്തിസാദെ’ എന്ന ചിത്രത്തിലെ ബോള്ഡ് വേഷത്തിന്റെ പേരിലും ജിസല് ശ്രദ്ധേയയായി.
‘ക്യാ കൂള് ഹേ ഹം 3’ എന്ന സിനിമയില് മന്ദനാ കരിമി, തുഷാര് കപൂര് അഫ്താബ് ശിവദാസനി എന്നിവര്ക്കൊപ്പം ജിസല് വേഷമിട്ടു. 2003ല് ജിസല് തക്രാല്, ക്രിക്കറ്റ് താരം യുവരാജ് സിങ്ങുമായി പ്രണയത്തില് എന്ന തരത്തിലും റിപോര്ട്ടുകള് ഉണ്ടായി. യുവരാജിന്റെ ഒപ്പം ജിസലിനെ പലയിടങ്ങളിലും കണ്ടതായിരുന്നു വിഷയം. ഒരിക്കല് യുവരാജ് വരുംവരെ ജിസല് പിറന്നാള് കേക്ക് മുറിക്കാതിരുന്നതും വാര്ത്തയായി. എന്നാല്, അദ്ദേഹം വിവാഹിതനായതോടു കൂടി ഈ വിവാദം അവസാനിച്ചു. മലയാള സിനിമാ താരങ്ങളായ മമ്മൂട്ടിയുടെയും മോഹന്ലാലിന്റേയും ആരാധികയാണ് ജിസല് തക്രാല്.
