കൊടി സുനി ഉള്പ്പെടെയുള്ള ടിപി കേസ് പ്രതികള്ക്ക് മദ്യം നല്കി; മൂന്ന് പൊലീസുകാര്ക്ക് സസ്പെന്ഷന്, സംഭവം കോടതിയിലേയ്ക്ക് കൊണ്ടുപോകവേ
കണ്ണൂര്: കൊടി സുനി ഉള്പ്പെടെയുള്ള ടി.പി ചന്ദ്രശേഖരന് വധക്കേസിലെ പ്രതികള് പൊലീസിന്റെ സാന്നിധ്യത്തില് മദ്യം കഴിച്ചെന്ന കണ്ടത്തലിനെത്തുടര്ന്ന് മൂന്ന് പൊലീസുകാര്ക്ക് സസ്പെന്ഷന്. എആര് ക്യാമ്പിലെ സിവില് പൊലീസ് ഉദ്യോഗസ്ഥരായ വൈശാഖ്, വിനീഷ്, ജിഷ്ണു എന്നിവരെയാണ് സസ്പെന്ഡ് ചെയ്തത്.
കണ്ണൂര് സെന്ട്രല് ജയിലിലുള്ള പ്രതികളെ കഴിഞ്ഞ 17 ന് തലശേരി അഡീഷണല് ജില്ലാ കോടതിയില് ഹാജരാക്കാന് കൊണ്ടുപോയപ്പോഴാണ് സംഭവം. കൊടി സുനിയെ കൂടാതെ മുഹമ്മദ് റാഫി, ഷിനോജ് എന്നീ പ്രതികളും ഉണ്ടായിരുന്നതായാണ് വിവരം. ഭക്ഷണം കഴിക്കാന് കയറിയ ഹോട്ടലില് മദ്യം കഴിക്കാന് അവസരമൊരുക്കിയെന്നാണ് പരാതി.
ഉച്ചയ്ക്ക് കോടതി പിരിഞ്ഞപ്പോള് സമീപത്തെ ഹോട്ടലില് ഭക്ഷണം കഴിക്കാനായെത്തിച്ചു. ഈ സമയം പ്രതികളുടെ സുഹൃത്തുക്കള് ഹോട്ടലിലെത്തി മദ്യം നല്കുകയായിരുന്നു. പൊലീസിന്റെ സാന്നിധ്യത്തില് പ്രതികള് മദ്യം കഴിക്കുകയും ചെയ്തു. സംഭവം പുറത്ത് വന്നതോടെയാണ് അന്വേഷണം നടത്തി പൊലീസുകാര്ക്കെതിരെ നടപടിയെടുത്തത്.
