പുടിന് നന്നായി സംസാരിക്കും, പിന്നാലെ ബോംബിട്ട് കൊല്ലും; യുക്രൈന് ആയുധങ്ങള് നല്കുമെന്ന് ട്രംപ്, റഷ്യയ്ക്കെതിരേ ഉപരോധത്തിനും സാധ്യത
വാഷിങ്ടണ്: യുക്രൈനില് റഷ്യ നടത്തുന്ന ആക്രമണത്തില് റഷ്യന് പ്രസിഡന്റ് വ്ളാദിമിര് പുടിനെതിരേ അമേരിക്കന് പ്രസിഡന്റ് ഡോണാള്ഡ് ട്രംപ്. വളരെ നന്നായി സംസാരിക്കുന്ന ആളാണ് പുടിനെന്നും എന്നാല്, തൊട്ടുപിന്നാലെ എല്ലാവരെയും അയാള് ബോംബിട്ട് കൊല്ലുമെന്നും ട്രംപ് പറഞ്ഞു. റഷ്യയ്ക്കെതിരേ പുതിയ ഉപരോധമേര്പ്പെടുത്തുമെന്ന സൂചനയും അദ്ദേഹം നല്കി. അമേരിക്കയുടെ വ്യോമപ്രതിരോധ സംവിധാനമായ ‘പാട്രിയോട്ട്’ യുക്രൈന് നല്കുമെന്നും ട്രംപ് അറിയിച്ചു.
തിങ്കളാഴ്ച റഷ്യയുമായി ബന്ധപ്പെട്ട സുപ്രധാന പ്രഖ്യാപനമുണ്ടാകുമെന്ന് ട്രംപ് അറിയിച്ചിരുന്നു. ഇതിന് പിന്നാലെയാണ് യുക്രൈനിന് ആവശ്യമായ ആയുധം നല്കുന്നത് സംബന്ധിച്ച പ്രഖ്യാപനം നടത്തിയിരിക്കുന്നത്. യുഎസില് നിന്നുള്ള പ്രത്യേക പ്രതിനിധി സംഘം യുക്രൈനിലേക്ക് തിരിക്കും. അതേസമയം, നാറ്റോ സെക്രട്ടറി ജനറല് മാര്ക്ക് റുട്ടുമായി ട്രംപ് വാഷിങ്ടണില് കൂടിക്കാഴ്ച നടത്തുമെന്നും റിപ്പോര്ട്ടുണ്ട്.
മൂന്നുവര്ഷത്തോളമായി തുടരുന്ന റഷ്യ-യുക്രൈന് സംഘര്ഷത്തിന് ഇനിയും അറുതിയായിട്ടില്ല. അടുത്തിടെ ഇത് രൂക്ഷമാവുകയും ചെയ്തിരുന്നു. ഇരു രാജ്യങ്ങള്ക്കിടയില് സമാധാനം പുനഃസ്ഥാപിക്കാന് അമേരിക്കയുടെ ശ്രമമുണ്ടായെങ്കിലും വിജയം കണ്ടിരുന്നില്ല. തുടര്ന്നാണ് ട്രംപ് യുക്രൈന് ആയുധം നല്കുന്നതുമായി ബന്ധപ്പെട്ട സുപ്രധാന തീരുമാനം പ്രഖ്യാപിച്ചിരിക്കുന്നത്.
യുക്രൈന് ആവശ്യമായ വ്യോമപ്രതിരോധ സംവിധാനമായ ‘പാട്രിയോട്ട്’ അമേരിക്ക നല്കുമെന്ന് ട്രംപ് വ്യക്തമാക്കി. എത്രയെണ്ണമാണ് നല്കുക എന്നത് സംബന്ധിച്ച് വ്യക്തമാക്കിയില്ല. യുക്രൈന് ആവശ്യമായത്ര നല്കുമെന്ന് ട്രംപ് പറഞ്ഞു. ന്യൂജഴ്സിയില് ഫിഫ ക്ലബ്ബ് ലോകകപ്പ് ഫൈനല് കണ്ട് മടങ്ങുമ്പോഴായിരുന്നു അദ്ദേഹം മാധ്യമങ്ങളോട് ഇക്കാര്യം വ്യക്തമാക്കിയത്.
കീവിലേക്കുള്ള ആയുധവിതരണം താത്ക്കാലികമായി നിര്ത്തിവെക്കുമെന്ന് നേരത്തെ അമേരിക്ക പ്രഖ്യാപിച്ചിരുന്നു. എന്നാല്, ഈ നിലപാടില്നിന്ന് യുഎസ് പിന്നോട്ടുപോകുകയാണെന്നാണ് ഇപ്പോഴത്തെ പ്രഖ്യാപനം നല്കുന്ന സൂചന. യുക്രൈനിലേക്ക് അയക്കുന്ന ആയുധങ്ങള്ക്കുള്ള പണം നാറ്റോ നല്കുമെന്നും പ്രഖ്യാപിച്ചിട്ടുണ്ട്. യുക്രൈന് വിവിധതരം അത്യാധുനിക സൈനിക ഉപകരണങ്ങള് നല്കുമെന്നും തങ്ങളെ സംബന്ധിച്ച് ഇത് വ്യാപരമാണെന്നും ട്രംപ് പറഞ്ഞു.
റഷ്യന് പ്രസിഡന്റിന്റെ കാര്യത്തില് തനിക്ക് നിരാശയുണ്ടെന്നും ട്രംപ് പറഞ്ഞു. പുടിനോട് കൂടുതല് ദേഷ്യം തോന്നുന്നുവെന്നും അദ്ദേഹം പ്രതികരിച്ചു. ‘ഒരുപാട് ആളുകളെ അത്ഭുതപ്പെടുത്തുന്നയാളാണ് പുടിന്. നല്ല രീതിയില് അദ്ദേഹം സംസാരിക്കും. വൈകുന്നേരമാകുമ്പോള് എല്ലാവരേയും ബോംബിട്ട് നശിപ്പിക്കും’, ട്രംപ് പറഞ്ഞു.
