കണ്ണൂര്: കാര് കുളത്തിലേക്ക് മറിഞ്ഞുണ്ടായ അപകടത്തില് വിദ്യാര്ത്ഥിക്ക് ദാരുണാന്ത്യം. പരീക്ഷ കഴിഞ്ഞ് മടങ്ങുകയായിരുന്ന കണ്ണൂര് അങ്ങാടിക്കടവ് സ്വദേശി ഇമ്മാനുവല് ആണ് മരിച്ചത്. കണ്ണൂര് അങ്ങാടിക്കടവില് ഇന്ന് പുലര്ച്ചെയോടെയാണ് അപകടമുണ്ടായത്. നിയന്ത്രണം വിട്ട കാര് കുളത്തിലേക്ക് കുത്തനെ മറിയുകയായിരുന്നു. കുളത്തിലേക്ക് മറിഞ്ഞ കാറില് നിന്ന് യാത്രികനെ നാട്ടുകാര് രക്ഷപ്പെടുത്തി ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല.
തൃശൂരില് വിദ്യാര്ത്ഥിയായ ഇമ്മാനുവല് പരീക്ഷ കഴിഞ്ഞ് തിരിച്ച് അങ്ങാടിക്കടവിലേക്ക് വരുന്നതിനിടെയാണ് അപകടമുണ്ടായത്. ഇരിട്ടി മേഖലയില് രാവിലെ മഴ പെയ്യുന്നുണ്ടായിരുന്നു. റോഡിലൂടെ പോകുന്നതിനിടെ മരക്കൊമ്പ് വീഴുന്നത് കണ്ട് കാര് വെട്ടിച്ചതോടെ സമീപത്തെ തെങ്ങില് കാര് ഇടിച്ചുകയറുകയായിരുന്നു. ഇതിനുശേഷം സമീപത്തുള്ള ചെറിയ കുളത്തില് കാര് തലകുത്തനെ മറിഞ്ഞ് വീഴുകയായിരുന്നു.
