കോട്ടയം: ജനങ്ങളെ ഭീതിയിലാക്കി പെരുന്തേനീച്ച കൂട്. മുണ്ടക്കയം നഗര പ്രദേശത്തിലാണ് തേനീച്ച കൂട് ജനങ്ങള്‍ക്ക് ഭീഷണിയാകുന്നത്.നഗര പ്രദേശത്ത് മാത്രം പത്തിലധികം പെരുന്തേനിച്ച കൂടുകളുണ്ട്. ഹോസ്പിറ്റല്‍ ജംഗ്ഷന് സമീപത്തെ സ്വകാര്യ ബില്‍ഡിങ്ങിന് മുകളില്‍ നിരവധി കൂടുകളുണ്ട്. ദിവസേന ആയിരക്കണക്കിന് വാഹനങ്ങള്‍ കടന്നുപോകുന്ന ദേശീയപാതയോട് ചേര്‍ന്നു നില്‍ക്കുന്ന പ്രദേശമാണിത്. അര്‍മാണി ഹോട്ടലിന് സമീപത്തെ മറ്റൊരു കെട്ടിടത്തിലും തേനീച്ചകള്‍ കൂട് കൂട്ടിയിട്ടുണ്ട്.
കാക്കയും പരുന്തും ഉള്‍പ്പെടെയുളള പക്ഷികള്‍ കൂട് ആക്രമിച്ചാല്‍ തേനീച്ചകള്‍ ഇളകുമെന്ന ഭീതിയിലാണ് നാട്ടുക്കാര്‍. കഴിഞ്ഞ ദിവസം മരണാനന്തര ചടങ്ങിനിടെ ആളുകളെ തേനീച്ചകള്‍ ആക്രമിച്ചിരുന്നു. അപകട സാധ്യത മുന്നില്‍ക്കണ്ട് നാട്ടുകാര്‍ പൊലീസിലും ഫയര്‍ഫോഴ്‌സിലും വിവരം അറിയിച്ചിട്ടുണ്ട്. വനം വകുപ്പിന്റെ സഹകരണത്തോടെ തേനീച്ച കൂടുകള്‍ നീക്കാനാണ് ശ്രമം.
