കല്‍പ്പറ്റ: പതിനാലുകാരിയെ പീഡിപ്പിച്ച്‌ ഗര്‍ഭിണിയാക്കിയ കേസില്‍ കര്‍ണാടക സ്വദേശിയായ യുവാവ് അറസ്റ്റില്‍. മത്തിക്കാടു എസ്റ്റേറ്റില്‍ മണിവണ്ണനെയാണ് മാനന്തവാടി പോലീസ് അറസ്റ്റ് ചെയ്തത്.
വയനാട് മെഡിക്കൽ കോളജില്‍ അമ്മയുടെ പ്രസവത്തിനു കൂട്ടിരിക്കാൻ വന്നതായിരുന്നു പെണ്‍കുട്ടി. അവിടെവച്ചാണ് ഇയാള്‍ പെണ്‍കുട്ടിയെ ലൈംഗികമായി ഉപയോഗിച്ചത്. മണിവണ്ണന്‍ ഭാര്യയുടെ പ്രസവവുമായി ബന്ധപ്പെട്ടാണ് മെഡിക്കല്‍ കോളജില്‍ എത്തിയത്. ഇവരുടെ കിടക്കയ്ക്ക് അരികില്‍ തന്നെയാണ് പെണ്‍കുട്ടിയുടെ അമ്മയും കിടന്നിരുന്നത്.
തുടർന്ന് ഇയാള്‍ പെണ്‍കുട്ടിയുമായി പരിചയത്തിലായി. ഈ പരിചയം മുതലെടുത്താണ് ആശുപത്രിയില്‍ വച്ച്‌ ഇയാള്‍ പെണ്‍കുട്ടിയെ പ്രലോഭിപ്പിച്ച്‌ പീഡനത്തിന് ഇരയാക്കിയത്. കഴിഞ്ഞ വർഷം സെപ്റ്റംബറിലായിരുന്നു സംഭവം. പെണ്‍കുട്ടി ഗർഭിണി ആണെന്നറിഞ്ഞ വീട്ടുകാർ പോലീസില്‍ പരാതി നല്‍കുകയായിരുന്നു. തുടർന്ന് നടത്തിയ ചോദ്യം ചെയ്യലിലാണ് പെണ്‍കുട്ടി വിവരങ്ങള്‍ പുറത്തുപറഞ്ഞത്. പ്രതിക്കെതിരേ പോക്സോ ഉള്‍പ്പടെയുള്ള വകുപ്പുകള്‍ ചുമത്തിയിട്ടുണ്ട്.
