വിജയ് ആയതുകൊണ്ട് ചെരുപ്പേറില്‍ നിന്നു; വടിവേലു വന്നിരുന്നെങ്കില്‍ കൊലപാതകത്തില്‍ കലാശിച്ചേനെ!
എംജിആര്‍, ജയലളിത, കലൈഞ്ജര്‍ എന്നിവരുടെ മരണത്തിന് ശേഷം തമിഴ് സിനിമാ ലോകത്തെയും രാഷ്ട്രീയത്തെയും പിടിച്ചു കുലുക്കിയ ഒരു മരണ വാര്‍ത്ത തന്നെയായിരുന്നു വിജയകാന്തിന്റേത്. പതിനഞ്ച് വര്‍ഷത്തോളമായി സിനിമയിലോ രാഷ്ട്രീയത്തിലോ ഒന്നും അത്രയ്ക്കധികം സജീവമല്ലാതിരുന്നിട്ട് പോലും വിജയകാന്തിന്റെ മരണ വാര്‍ത്ത അറിഞ്ഞ് ഇത്രയും ജനം കൂടുമെന്നോ സെലിബ്രിറ്റികള്‍ വരുമെന്നോ പ്രതീക്ഷിച്ചിരുന്നില്ലത്രെ. എന്നാല്‍, കരഞ്ഞു കലങ്ങിയ കണ്ണുകളുമായി മുന്‍നിര താരങ്ങള്‍ വരെ എത്തി
വിജയകാന്തിന്റെ മരണവിവരം അറിഞ്ഞ് ഇളയദളപതി വിജയ് പാഞ്ഞെത്തിയിരുന്നു. കരഞ്ഞു കലങ്ങിയ കണ്ണുകളോടെ, വിഷമിച്ച് വിജയ് എത്തിയ വീഡിയോകളും ഫോട്ടോകളും എല്ലാം സോഷ്യല്‍ മീഡിയയില്‍ വൈറലായതാണ്. എന്നാല്‍ വിജയ്ക്ക് കിട്ടിയ യാത്രയയപ്പ് അത്ര സുഖകരമായിരുന്നില്ല. വിജയകാന്തിന്റെ ആരാധകര്‍ ചെരുപ്പുകൊണ്ട് അടിച്ചാണ് വിജയിയെ തിരിച്ചുവിട്ടത്. അതിനും മാത്രം എന്ത് തെറ്റാണ് വിജയ് വിജയകാന്തിനോട് ചെയ്തത്?
വിജയകാന്ത് സിനിമയില്‍ വന്ന സമയത്ത് പല സംവിധായകരും അദ്ദേഹത്തെ തഴഞ്ഞിരുന്നു. എന്നാല്‍, വിജയ് യുടെ അച്ഛനും നിര്‍മാതാവും സംവിധായകനുമായ എസ്.എ ചന്ദ്രശേഖരനാണ് അദ്ദേഹത്തിന് അവസരങ്ങള്‍ നല്‍കിയിരുന്നത്. തുടക്കകാലത്ത് വിജയകാന്ത് അഭിനയിച്ച ഭൂരിഭാഗം സിനിമകളും ചന്ദ്രശേഖരന്‍ സംവിധാനം ചെയ്തതാണ്.
വിജയ് അഭിനയത്തിലേക്ക് വന്ന സമയത്ത്, എങ്ങനെയെങ്കിലും മകന്റെ പേരില്‍ രണ്ട് ഹിറ്റുകള്‍ വേണം എന്നായിരുന്നു ചന്ദ്രശേഖറുടെ ആഗ്രഹം. മകന്റെ സിനിമകള്‍ക്ക് സപ്പോര്‍ട്ട് ചെയ്യാനായി അന്നത്തെ പല പ്രമുഖരോടും അദ്ദേഹം അഭ്യര്‍ത്ഥിച്ചിരുന്നു. നിന്ന് തിരിയാന്‍ പോലും നേരമില്ലാത്ത തിരക്കുള്ള സ്റ്റാറായിരുന്നു വിജയകാന്ത്. എന്നിട്ടും തന്നെ വളര്‍ത്തിയ സംവിധായകന്റെ മകന് വേണ്ടി സമയം മാറ്റിവച്ച് വിജയാകാന്ത് വിളിക്കാതെ തന്നെ എത്തി.
എന്നാല്‍, പിന്നീട് വിജയകാന്തിന്റെ മകന് സിനിമയില്‍ തുടക്കം കുറിക്കുമ്പോഴേക്കും വിജയ് ഇളയദളപതിയായി വളര്‍ന്നു പന്തലിച്ചിരുന്നു. ഒരു ഗസ്റ്റ്റോള്‍ ചെയ്ത് മകനെ രക്ഷപ്പെടുത്താന്‍ ആവശ്യപ്പെട്ടിട്ട് വിജയ് അതിന് തയ്യാറായില്ല. ഒരു കാലത്ത് പ്രതിഫലം വാങ്ങാതെ വിജയകാന്ത് വിജയ് യുടെ സിനിമയില്‍ അഭിനയിച്ചിരുന്നു. അത് പോലും ഓര്‍ക്കാതെ വിജയ് നിരസിച്ചതില്‍ വിജയകാന്തിനും വിഷമം തോന്നി.
അത് മാത്രമല്ല, വിജയകാന്ത് അസുഖബാധിതനായി ചികിത്സയില്‍ കഴിയാന്‍ തുടങ്ങിയിട്ട് നാളുകളായി. ഇതുവരെ അദ്ദേഹത്തിന്റെ സുഖവിവരം അന്വേഷിച്ച് വീട്ടിലേക്കോ ആശുപത്രിയിലേക്കോ വരികയോ, ഒരു ഫോണ്‍ സംഭാഷണം നടത്തുകയോ ചെയ്തില്ല. മരിച്ചപ്പോള്‍ ഇതുവരെ ഇല്ലാത്ത സ്നേഹ പ്രകടനം നടത്തി എത്തിയത് എന്തിനാണെന്ന് ചോദിച്ചാണ് വിജയ്ക്ക് നേരെ ആക്രമണം ഉണ്ടായത്.
വിജയ്‌യുടെ സ്ഥാനത്ത് വടിവേലുവാണ് വന്നിരുന്നത് എങ്കില്‍ ഇതിലും വലിയ പ്രശ്നം നടന്നേനെ എന്നാണ് തമിഴകം പറയുന്നത്. അത്രയും വലിയ ശത്രുത വിജയകാന്തിന് ഇല്ലെങ്കിലും, വിജയകാന്തിന്റെ ആരാധകര്‍ക്കുണ്ട്. മാറിയുടുക്കാന്‍ ഷര്‍ട്ട് പോലും ഇല്ലാതെ സിനിമയില്‍ വന്ന കാലത്ത് വടിവേലുവിന് അഞ്ച് ജോഡി ഷര്‍ട്ടും പാന്റ്സും വാങ്ങി കൊടുത്ത ആളാണ് വിജയകാന്ത്. ആ നന്ദിപോലും ഇല്ലാതെ അദ്ദേഹത്തെ ഒരു ഇലക്ഷന്‍ കാലത്ത് വളരെ മോശമായി അധിക്ഷേപിച്ചിരുന്നു വടിവേലു.
വിജയകാന്തിന്റെയും വടിവേലുവിന്റെയും വീട് അടുത്തടുത്തായിരുന്നു. വിജയകാന്തിന്റെ വീട്ടില്‍ ഒരു മരണം നടന്ന സമയത്ത് ആളുകള്‍ കൂടി. വണ്ടി പാര്‍ക്ക് ചെയ്യാന്‍ സ്ഥലമില്ലാതെ വടിവേലുവിന്റെ വീടിന്റെ ഗേറ്റിന് മുന്നിലും വാഹനം പാര്‍ക്ക് ചെയ്തിരുന്നു. ഇത് കണ്ട് വടിവേലുവിന് ദേഷ്യം വന്ന് പലതും പറഞ്ഞു. വിജയകാന്തിനെ കുറിച്ച് മോശം പറഞ്ഞത് അദ്ദേഹത്തിന്റെ ആളുകള്‍ക്ക് സഹിച്ചില്ല. വടിവേലുവിന്റെ വീടിന് നേരെ കല്ലെറിയുകയും, കല്ലേറ് വടിവേലുവിന്റെ മകന് കൊള്ളുകയും ചെയ്തു. അന്ന് രക്തം വാര്‍ന്നൊലിക്കുന്ന മകനുമായി വടിവേലു ഓടിയതെല്ലാം വാര്‍ത്തയായിരുന്നു.
അതിന് ശേഷം വടിവേലുവിന് വിജയകാന്തിനോടും അദ്ദേഹത്തിന്റെ ആളുകളോടും കടുത്ത ശത്രതയായിരുന്നു. ഇലക്ഷന്‍ സമയത്ത് ജയലളിതയോട് കക്ഷിചേര്‍ന്ന് വിജയകാന്ത് ഇക്ഷന്‍ പ്രചരണം നടത്തി. എന്നാല്‍, അവര്‍ക്കെതിരെ പ്രചരണം നടത്തിയ വടിവേലു വിജയകാന്തിനെ കുറിച്ച് വളരെ മോശമായി സംസാരിച്ചു. വിജയകാന്തിനെ ലക്ഷ്യം വച്ചായിരുന്നു വടിവേലുവിന്റെ പ്രചരണ പരിപാടി. പറഞ്ഞത് വിജയകാന്തിനെയാണെങ്കിലും കൊണ്ടത് തനിക്കാണ് എന്ന് പറഞ്ഞ് ജയലളിത അതിന് പ്രതികരിച്ചു, അതോടെയാണ് വടിവേലുവിന് തമിഴ് സിനിമയില്‍ അവസരം കുറഞ്ഞത്. പിന്നീട് ജയലളിതയുടെ മരണ ശേഷം ഭരണം മാറിയപ്പോഴാണ് വടിവേലുവിന് അവസരങ്ങള്‍ കിട്ടിത്തുടങ്ങുന്നത്. ഈ പശ്ചാത്തലത്തില്‍ വിജയകാന്തിന്റെ മരണവിവരം അറിഞ്ഞ് വടിവേലു ആ പരിസരത്ത് വന്നിരുന്നെങ്കില്‍ കൊലപാതകം നടന്നേനെ എന്നാണ് തമിഴകത്തിന്റെ പ്രതികരണം.
