ബ്ലാസ്റ്റേഴ്സിന്റെ യുവ മിഡ്ഫീല്‍ഡര്‍ ഫ്രെഡി ലാല്ലമാവ്മയ്ക്കാണ് ബൈക്ക് അപകടത്തില്‍ പരിക്കേറ്റത്.ഫ്രെഡിയുടെ പരിക്ക് അല്‍പ്പം ഗുരുതരമാണെന്നാണ് റിപ്പോര്‍ട്ട്. മിസോറമുകാരനായ താരത്തിന്റെ താടിയെല്ലിനും തോളിനുമാണ് പരിക്ക് പറ്റിയിരിക്കുന്നത്. ഫ്രെഡിക്ക് അടിയന്തര സര്‍ജറി വേണ്ടി വരുമെന്നാണ് വിവരം.
പഞ്ചാബ് എഫ്സിയില്‍ നിന്ന് ഈ സീസണിലാണ് 21കാരനായ ഫ്രെഡി കേരള ബ്ലാസ്റ്റേഴ്‌സിലേക്ക് ചേക്കേറുന്നത്. ഡിഫൻസീവ് മിഡ്ഫീല്‍ഡറായ താരം, മികച്ച പോരാട്ട വീര്യം തന്നെയായിരുന്നു കളിക്കളത്തില്‍ പുറത്തെടുത്തിരുന്നത്.
ഈ സീസണില്‍ മികച്ച പ്രകടനം നടത്തുമ്ബോഴും കേരള ബ്ലാസ്റ്റേഴ്സിനെ പ്രധാനമായും അലട്ടുന്നത് താരങ്ങളുടെ പരിക്കാണ്. പരിക്കിനെ തുടര്‍ന്ന് ഡിഫൻഡര്‍ ഐബാന് സീസണ്‍ നഷ്ടമായിരുന്നു. മിഡ്ഫീല്‍ഡര്‍ ജീക്സൻ സിംഗും പരിക്ക് കാരണം കളത്തിന് പുറത്താണ്. സെന്റര്‍ ബാക്ക് ലെസ്കോവിച്ചിനും പരിക്കില്‍ നിന്ന് പൂര്‍ണ്ണമായും മോചിതനാകാൻ കഴിഞ്ഞിട്ടില്ല. ഇതിനിടയില്‍ ഫ്രെഡിക്ക് കൂടി പരിക്കേറ്റത് ബ്ലാസ്റ്റേഴ്‌സിന് വലിയ തിരിച്ചടിയാണ്.
