ആലപ്പുഴ: നാടിനാകെ നൊമ്പരമായി കുട്ടനാട് തകഴിയിൽ ആത്മഹത്യ ചെയ്ത കർഷകൻ പ്രസാദിന്‍റെ സംസ്കാര ചടങ്ങുകൾ. പ്രസാദിന് കണ്ണീരോടെ വിട നൽകാൻ നാടൊന്നാകെ ഒഴുകിയെത്തുകയായിരുന്നു. സങ്കടങ്ങൾ ബാക്കിയാക്കി പ്രസാദ് മടങ്ങിയപ്പോൾ അവസാന നോക്ക് കാണാനായി ആ കുഞ്ഞുവീടിന് താങ്ങാനാവുന്നതിലധികം പേരാണ് എത്തിയത്. സംസ്കാര ചടങ്ങുകള്‍ ശനിയാഴ്ച വൈകിട്ടോടെയാണ് നടന്നത്.
പ്രസാദിന്‍റെ ആ ചെറിയ വീടിന് ഉള്‍കൊള്ളാന്‍ കഴിയുന്നതിലും ഏറെയായിരുന്നു അവസാന നോക്ക് കാണാനായി എത്തിയവ‍ർ. ചെറിയ വീട്ടിലേക്ക് ആളുകൾ ഹൃദയവേദനയോടെ എത്തിയതോടെ സമീപത്തെ വീട്ടിലേക്ക് പന്തല്‍ കെട്ടിയാണ് സ്ഥലം കണ്ടെത്തിയത്. കര്‍ഷകന്‍ എന്നതിനേക്കാള്‍ ഉപരി നാട്ടുകാർക്ക് പ്രിയപ്പെട്ട പൊതു പ്രവര്‍ത്തകൻ കൂടിയായിരുന്നു പ്രസാദ്. മകനാണ് പ്രസാദിന്‍റെ ചിതക്ക് തീകൊളുത്തിയത്. ഭാര്യയെയും മറ്റു കുടുംബാംഗങ്ങളയും ആശ്വസിപ്പിക്കാനാകാതെ അവിടെയെത്തിയവര്‍ കുഴങ്ങി. കണ്ണീരോടെയാണ് ഏവരും പ്രസാദിന് യാത്രമൊഴിയേകിയത്.
