പാലക്കാട് ജില്ലയിൽ വിമാനത്താവളം സ്ഥാപിക്കുന്നതിനുള്ള നടപടികൾ വേഗത്തിലാക്കണമെന്ന് വി കെ ശ്രീകണ്ഠൻ എംപി ലോക്സഭയിൽ ആവശ്യപ്പെട്ടു.വ്യോമയാന മന്ത്രാലയത്തിന്റെ ധനാഭ്യർത്ഥന ചർച്ചയിൽ പങ്കെടുത്തുകൊണ്ട് സംസാരിക്കുകയായിരുന്നു അദ്ദേഹം.
കേരള സംസ്ഥാനത്തിന്റെ മധ്യഭാഗത്ത് സ്ഥിതിചെയ്യുന്ന ജില്ലയായ പാലക്കാട് തമിഴ്നാടിനോട് ചേർന്നുകിടക്കുന്ന പ്രദേശം കൂടിയാണ്. കേന്ദ്ര-സംസ്ഥാന സർക്കാറുകളുടെ പൊതുമേഖല സ്ഥാപനങ്ങൾ ഉൾപ്പെടെ എല്ലാ തരം വ്യവസായങ്ങളും ഉള്ള കേരളത്തിലെ രണ്ടാമത്തെ വലിയ വ്യവസായ ജില്ലയാണ് പാലക്കാട്.അതോടൊപ്പം തന്നെ കേരളത്തിലെ ഏക ഐഐടി പ്രവർത്തിക്കുന്നതും പാലക്കാട് ജില്ലയിലാണ്.
ദക്ഷിണ റെയിൽവേയുടെ ഡിവിഷണൽ ആസ്ഥാനം കൂടിയായ പാലക്കാട് ജില്ല കോയമ്പത്തൂരിനും -കൊച്ചിക്കും ഇടയിലുള്ള വ്യവസായ ഇടനാഴി പൂർത്തിയാകുന്നതോടുകൂടി കൂടുതൽ വിദേശ നിക്ഷേപം നടക്കുന്ന ജില്ലയായി മാറുമെന്നും എം പി പറഞ്ഞു.
