കൊച്ചി:സ്വാതന്ത്ര്യ ദിനത്തോട് അനുബന്ധിച്ച്‌ യാത്രക്കാര്‍ക്ക് പ്രത്യേക ഇളവുകളുമായി കൊച്ചി മെട്രോ. ഓഗസ്റ്റ് 15ന് വെറും 20 രൂപയ്ക്ക് കൊച്ചി മെട്രോയില്‍ യാത്ര ചെയ്യാം.ചൊവ്വാഴ്ച രാവിലെ ആറ് മുതല്‍ രാത്രി 11 വരെ ഈ നിരക്കുകളിൽ യാത്ര ചെയ്യാൻ സാധിക്കും.
അന്നേ ദിവസം മെട്രോ യാത്രക്കായുള്ള പരമാവധി ടിക്കറ്റ് നിരക്ക് 20 രൂപ ആയിരിക്കും. 30, 40, 50, 60 രൂപ ടിക്കറ്റുകള്‍ക്ക് യഥാക്രമം 10,20,30,40 രൂപ വീതം ഇളവ് ലഭിക്കും. മിനിമം ടിക്കറ്റ് നിരക്ക് പത്ത് രൂപയായി തുടരും.
കൊച്ചി മെട്രോയിൽ ഓഗസ്റ്റിൽ ഇതുവരെയുള്ള ദിവസേന യാത്രക്കാരുടെ ശരാശരി എണ്ണം 89,401 ആണ്. വിവിധ ഓഫറുകളും യാത്രാ പാസുകളും കൂടുതൽ യാത്രികരെ ആകര്‍ഷിക്കുന്നതില്‍ പങ്കുവഹിച്ചിട്ടുണ്ട്.
ഓണം അവധിക്കാലത്ത് കൂടുതല്‍ യാത്രക്കാരെ മെട്രോയിലേക്ക് ആകര്‍ഷിക്കാനാകുമെന്നാണ് അധികൃതരുടെ പ്രതീക്ഷ. ഇതിനായി മെട്രോ സ്റ്റേഷനുകളില്‍ വിവിധ ഓണാഘോഷ പരിപാടികള്‍ക്കുള്ള തയാറെടുപ്പുകള്‍ പുരോഗമിക്കുകയാണ്
