ബിഗ് ബോസ് മലയാളം സീസൺ 5 ഇന്ന് മൂന്നാം വാരത്തിലേക്ക്. ആദ്യ എവിക്ഷൻ നടക്കുമെന്ന് പ്രതീക്ഷിക്കുന്ന ഇന്ന് ഏഴ് മത്സരാർഥികൾ ഉൾപ്പെട്ട നോമിനേഷൻ ലിസ്റ്റിൽ നിന്നാണ് പുറത്താവുന്ന ഒന്നോ അതിലധികമോ പേരുടെ പേര് പ്രഖ്യാപിക്കുക. ശനിയാഴ്ച എപ്പിസോഡിൽ പുറത്താക്കലുകൾ ഒന്നും ഇല്ലായിരുന്നു. അതേസമയം ഇന്നത്തെ എപ്പിസോഡിൻറെ ഏഷ്യാനെറ്റ് പുറത്തുവിട്ട ഒരു പ്രൊമോ ബിഗ് ബോസ് പ്രേക്ഷകർക്കിടയിൽ വലിയ ചർച്ചയാവുകയാണ്. മത്സരാർഥികളോട് കടുത്ത ഭാഷയിൽ സംസാരിക്കുന്ന മോഹൻലാൽ ആണ് പ്രൊമോ വീഡിയോയിൽ ഉള്ളത്.
ഈസ്റ്റർ ദിനമായ ഇന്ന് ബിഗ് ബോസ് ഹൗസിലും അതിൻറെ ആഘോഷം നടക്കുമെന്ന് ഇന്നലെ മോഹൻലാൽ അറിയിച്ചിരുന്നു. ഈസ്റ്റർ ദിനത്തിൽ താൻ ധരിക്കേണ്ട വസ്ത്രത്തിൻറെ നിറം തെരഞ്ഞെടുക്കാൻ മത്സരാർഥികൾക്ക് മോഹൻലാൽ അവസരം നൽകിയിരുന്നു. എന്നാൽ ഈസ്റ്റർ ദിന ആഘോഷങ്ങൾക്കിടയിൽ നൽകിയ ഒരു ഗെയിം കളിക്കവെ മത്സരാർഥികൾക്കിടയിൽ വലിയ തർക്കം നടന്നതായാണ് പുറത്തെത്തിയ പ്രൊമോ വീഡിയോകളിൽ നിന്ന് അറിയാനാവുന്നത്. പ്രൊമോയിൽ താൻ ഈ ഷോ അവസാനിപ്പിക്കുകയാണെന്നാണ് മത്സരാർഥികളോട് മോഹൻലാൽ പറയുന്നത്.
“വളരെ സന്തോഷകരമായിട്ട് ഒരു ഈസ്റ്റർ ദിവസം എത്രയോ മൈലുകൾ സഞ്ചരിച്ച് നിങ്ങളെ കാണാനായിട്ടാണ് ഞാൻ വന്നിരിക്കുന്നത്. പക്ഷേ എനിക്ക് വളരെ സങ്കടകരമായ കാര്യങ്ങളായി മാറി. അതുകൊണ്ട് ഞാൻ ഈ ഷോ ഇവിടെവച്ച് അവസാനിപ്പിക്കുകയാണ്”, എന്നാണ് മത്സാരർഥികളോടുള്ള മോഹൻലാലിൻറെ വാക്കുകൾ. ഈ വാക്കുകളുടെ ഞെട്ടലിൽ മോഹൻലാലിനോട് മത്സരാർഥികൾ ക്ഷമ ചോദിച്ച് തുടങ്ങുമ്പോഴേക്ക് ഹൗസിലേക്കുള്ള ലൈവ് ടെലി ലൈൻ കട്ട് ചെയ്യാൻ പറയുകയാണ് മോഹൻലാൽ. പിന്നാലെ സ്ക്രീൻ കട്ട് ആവുന്നതും പ്രൊമോയിൽ കാണാം. മോഹൻലാൽ എത്തുന്ന ശനി, ഞായർ ദിവസങ്ങളിലെ പ്രൊമോകൾ പലപ്പോഴും ബിഗ് ബോസ് പ്രേക്ഷകർക്ക് വലിയ കൗതുകം പകർന്നാണ് എത്താറ്.
