വെളിച്ചം
ആ ഗുരുവും ശിഷ്യനും ഏറെ നടന്നു നടന്ന് കുന്നിന്‍ചെരുവിലെത്തി. വിശന്നപ്പോള്‍ അടുത്തുകണ്ട കുടിലില്‍ കയറി ഭക്ഷണം ചോദിച്ചു. അവിടെ ആകെ ഉണ്ടായിരുന്നത് കുറച്ച് സംഭാരം മാത്രമാണ്. അവര്‍ ആര്‍ത്തിയോടെ അത് കുടിച്ചു. പുറത്തിറങ്ങിയപ്പോള്‍ ആ പറമ്പിനരുകിൽ ഒരു പശു നില്‍ക്കുന്നത് കണ്ടു. ഗുരു ആ പശുവിനെ കെട്ടഴിച്ചുവിടാന്‍ ആവശ്യപ്പെട്ടു. ശിഷ്യന്‍പറഞ്ഞു:
“ഇവരുടെ ആകെ വരുമാനമാണ് ഈ പശു. അതിനെ കെട്ടഴിച്ചുവിട്ടാല്‍ അതെവിടെയെങ്കിലും പോകും.”
ഗുരു ആ വാദം അംഗീകരിച്ചില്ല. ഒടുവിൽ ഗുരുവിന്റെ വാക്ക് ധിക്കരിക്കാന്‍ കഴിയാതെ ശിഷ്യന്‍ അങ്ങനെ തന്നെ ചെയ്തു. പശു കുന്നിറങ്ങി ദൂരെ എങ്ങോട്ടോ പോയി.
വര്‍ഷങ്ങള്‍ക്ക് ശേഷം ഗുരുവും ശിഷ്യനും വീണ്ടും അതേ സ്ഥലത്തെത്തിയപ്പോള്‍ അവിടെ വലിയൊരു വീട് കണ്ടു. അവര്‍ ആ വീട്ടിലേക്ക് കയറി. വീട്ടുകാര്‍ പറഞ്ഞു:
“ഞങ്ങളുടെ ആകെ വരുമാനം ആ പശുവായിരുന്നു. അതിനെ നഷ്ടപ്പെട്ടപ്പോള്‍ ജീവിക്കാനായി ഞങ്ങൾക്ക് മറ്റു മാര്‍ഗ്ഗങ്ങള്‍ തേടേണ്ടിവന്നു. അന്നുമുതലാണ് ഞങ്ങളുടെ ജീവിതം രക്ഷപ്പെട്ടത്…”
ഗുരു ശിക്ഷ്യനെ ഒന്നു നോക്കി. ആ കണ്ണുകളുടെ ആഴം മനസിലാക്കിയ ശിഷ്യൻ്റ മുഖത്ത് ഒരു മന്ദഹാസം വിരിഞ്ഞു.
ജീവിച്ചു വരുന്ന അവസ്ഥയെ മറികടക്കാൻ ആരും പെട്ടെന്ന് സന്നദ്ധരാകില്ല. പരിമിതികളുടെ കെട്ടുപാടുകളില്‍ നിന്നും പുറത്തു കടക്കാതെ ആർക്കും അര്‍ഹിക്കുന്ന നേട്ടങ്ങൾ ലഭിക്കുകയുമില്ല.
സൂര്യനാരായണൻ
ചിത്രം: നിപു കുമാർ
