കോട്ടയം: വീട്ടമ്മയ്ക്ക് നേരേ ലൈംഗികാതിക്രമം നടത്തിയ കേസില്‍ പ്രതിയെ പോലീസ് അറസ്റ്റ് ചെയ്തു. ഏറ്റുമാനൂര്‍ ഓണംതുരുത്ത് പ്രാവട്ടം ഭാഗത്ത് കളത്തില്‍പറമ്പില്‍ വീട്ടില്‍ മുത്തുപ്പട്ടര്‍ എന്ന് വിളിക്കുന്ന അനില്‍കുമാറി (35)നെയാണ് ഏറ്റുമാനൂര്‍ പോലീസ് അറസ്റ്റ് ചെയ്തത്.
ഇയാള്‍ കഴിഞ്ഞ ദിവസം വീട്ടമ്മയുടെ നേരേ ലൈംഗികാതിക്രമം നടത്തുകയായിരുന്നു. വീട്ടമ്മയുടെ പരാതിയെ തുടര്‍ന്ന് ഏറ്റുമാനൂര്‍ പോലീസ് കേസ് രജിസ്റ്റര്‍ ചെയ്യുകയും പ്രതിയെ പിടികൂടുകയുമായിരുന്നു. അന്വേഷിച്ചുചെന്ന പോലീസ് ഉദ്യോഗസ്ഥരുടെ നേരേ അനില്‍കുമാര്‍ വധഭീഷണി മുഴക്കി. പട്ടിക കഷണം കൊണ്ട് ആക്രമിച്ച് രക്ഷപ്പെടാന്‍ ശ്രമിച്ചുവെങ്കിലും പോലീസ് സംഘം പിന്തുടര്‍ന്ന് പിടികൂടുകയായിരുന്നു. ഇയാളുടെ ആക്രമണത്തില്‍ പോലീസ് ഉദ്യോഗസ്ഥന് പരുക്കേല്‍ക്കുകയുംചെയ്തു.
പ്രതി അനില്‍കുമാര്‍ ഏറ്റുമാനൂര്‍ സ്റ്റേഷനിലെ ‘ആന്റി സോഷ്യല്‍ ലിസ്റ്റില്‍’ ഉള്‍പ്പെട്ട ആളാണ്. ഗാന്ധിനഗര്‍ സ്റ്റേഷനില്‍ മോഷണക്കേസും, ഏറ്റുമാനൂര്‍ സ്റ്റേഷനില്‍ നിരവധി ക്രിമിനല്‍ കേസുകളും നിലവിലുണ്ട്.
