സംസ്ഥാനത്തെ ഭൂരിഭാഗം ചെറുകിട നാമമാത്ര കർഷകരുടെയും പ്രധാന ഉപജീവനമാണ് തോട്ടവിളകൾ എന്നും ഇത്തരം വിളകളുടെ സംരക്ഷണത്തിനായി ഏർപ്പെടുത്തിയിട്ടുള്ള വിവിധ കാർഷിക കമ്മോഡിറ്റി ബോർഡുകളെ ഇല്ലാതാക്കാനുള്ള ശ്രമം കർഷക വിരുദ്ധമാണെന്നും ചൂണ്ടിക്കാട്ടി കൃഷിമന്ത്രി പി പ്രസാദ് കേന്ദ്ര സർക്കാരിനു കത്തയച്ചു. കൃഷിയുമായി ബന്ധപ്പെട്ട വിവിധ കമ്മോഡിറ്റി ബോർഡുകൾ കാര്യക്ഷമമല്ലെന്നും അവ പിൻവലിക്കണമെന്നുമുള്ള നീതി ആയോഗ് ശുപാർശമേൽ പ്രതിഷേധ മറിയിച്ചാണ് കേന്ദ്ര വാണിജ്യ വ്യവസായ വകുപ്പ് മന്ത്രി പിയുഷ് ഘോയലിനു കത്തയച്ചത്.
പരമ്പരാഗത റബ്ബർ കൃഷിയിൽ മുൻനിരയിൽ നിൽക്കുന്ന രണ്ട് സംസ്ഥാനങ്ങളാണ് കേരളവും തമിഴ്നാടും. ഇപ്പോൾ വടക്കു കിഴക്കൻ സംസ്ഥാനങ്ങളിലേക്കും റബർകൃഷി വ്യാപിച്ചിട്ടുണ്ട്. 2015 ൽ തന്നെ റബ്ബർ ഉൽപാദനത്തിൽ സ്വയം പര്യാപ്തത കൈവരിച്ച ഭാരതം, ഉത്പാദന ക്ഷമതയുടെ കാര്യത്തിൽ ഒന്നാമതുമാണ്. എന്നാൽ റബർ കർഷകർക്ക് മതിയായ പിന്തുണ സർക്കാരിന്റെ ഭാഗത്തുനിന്നും ലഭിക്കാത്തതുകൊണ്ടും, അനിയന്ത്രിതമായുള്ള ഇറക്കുമതി പ്രോത്സാഹനത്താലും ഉൽപാദനത്തിന്റെ കാര്യത്തിൽ കഴിഞ്ഞ കുറച്ചു വർഷങ്ങളിലായി ക്രമാതീതമായ കുറവ് വന്നിട്ടുണ്ട്. വ്യവസായ മേഖലയിലെ ഒരു വിഭവം എന്ന നിലയിൽ റബ്ബറിന്റെ ഈ പ്രതിസന്ധി ആ മേഖലയിലും കനത്ത പ്രത്യാഘാതങ്ങൾ സൃഷ്ടിക്കുമെന്നതിൽ സംശയമില്ല. റബർ ബോർഡ്, സ്പൈസസ് ബോർഡ് എന്നിവ ഇല്ലാതായാൽ അത് ഏറ്റവും കൂടുതൽ പ്രതികൂലമായി ബാധിക്കുക സംസ്ഥാനത്തെ ചെറുകിട ഇടത്തരം കർഷകരെയാണെന്നും കത്തിലുണ്ട്.
സുഭിക്ഷ കേരളം, ഞങ്ങളും കൃഷിയിലേക്ക് എന്നീ പ്രവർത്തനങ്ങളിലൂടെ കാർഷിക മേഖലയിൽ പുനരുജ്ജീവനം കൈവരിക്കുവാനുള്ള ശ്രമങ്ങളാണ് സംസ്ഥാന സർക്കാരും കൃഷിവകുപ്പും നടത്തുന്നത്. ഈ അവസരത്തിൽ കർഷകർക്കു കൈത്താങ്ങായി അവർക്ക് സമാശ്വാസം പകരുന്ന തീരുമാനങ്ങളും സഹായങ്ങളുമാണ് കേന്ദ്രസർക്കാരിന്റെ ഭാഗത്തുനിന്നും പ്രതീക്ഷിക്കുന്നതെന്നും മന്ത്രി പ്രസാദ് കത്തിൽ വ്യക്തമാക്കി.
