‘വിദ്യാഭ്യാസ കുറവുകൊണ്ട് പറ്റിയ അബദ്ധം; അടുത്ത പടത്തില് മികച്ച പ്രതിഫലം നല്കും’; ചെക്കു കേസില് കുടുങ്ങിയ ബോളിവുഡ് നടന് പിന്തുണയുമായി പ്രിയദര്ശന്; പിന്തുണയുമായി മറ്റു താരങ്ങളും
ന്യൂഡല്ഹി: ചെക്ക് ബോണ്സ് കേസിലെ ഒത്തുതീര്പ്പ് തുക നല്കുന്നതുമായി ബന്ധപ്പെട്ട തര്ക്കങ്ങളെത്തുടര്ന്ന് പ്രമുഖ ബോളിവുഡ് നടന് രാജ്പാല് യാദവ് നിയമക്കുരുക്കില്. ഡല്ഹിയിലെ തിഹാര് ജയില് അധികൃതര്ക്ക് മുന്നില് കീഴടങ്ങിയ അദ്ദേഹത്തിന്റെ ജാമ്യാപേക്ഷ പരിഗണിക്കുന്നത് കോടതി വ്യാഴാഴ്ചത്തേക്ക് മാറ്റി. ഈ സാഹചര്യത്തില് നടന് പിന്തുണയുമായി സംവിധായകന് പ്രിയദര്ശന് രംഗത്തെത്തി. രാജ്പാലിനെ സഹായിക്കുന്നതിനായി തന്റെ അടുത്ത സിനിമയില് അദ്ദേഹത്തിന് ഉയര്ന്ന പ്രതിഫലം ലഭ്യമാക്കുമെന്നും ഇതിനുള്ള ശ്രമത്തിലാണെന്നും പ്രിയദര്ശന് പറഞ്ഞു. ഭാഗം ഭാഗ്, ചുപ് ചുപ് കെ, ദേ ദനാ ദന് തുടങ്ങി നിരവധി ചിത്രങ്ങളില് ഇരുവരും ഒന്നിച്ചു പ്രവര്ത്തിച്ചിട്ടുണ്ട്.
പ്രിയദര്ശന് പറഞ്ഞത്:
തന്റെ പുതിയ ചിത്രമായ ‘ഭൂത് ബംഗ്ല’യുടെ പോസ്റ്റ് പ്രൊഡക്ഷന് തിരക്കുകളിലാണ് പ്രിയദര്ശന് ഇപ്പോള്. ‘കഴിഞ്ഞ 20 വര്ഷമായി എനിക്ക് രാജ്പാലിനെ അറിയാം. ‘ജംഗിള്’ (2000) എന്ന സിനിമയിലാണ് ഞാന് അദ്ദേഹത്തെ ആദ്യമായി കാണുന്നത്, അന്നത്തെ പ്രകടനം കണ്ട് ഞാന് അത്ഭുതപ്പെട്ടു. എന്റെ സിനിമകളില് ‘മാലമാല് വീക്കിലി’ (2006) മുതലാണ് അദ്ദേഹം അഭിനയിച്ചു തുടങ്ങിയത്. അദ്ദേഹത്തിന്റെ ഇപ്പോഴത്തെ സാഹചര്യം കണക്കിലെടുത്ത്, സാധാരണ വാങ്ങുന്നതിനേക്കാള് ഉയര്ന്ന പ്രതിഫലം നല്കണമെന്ന് ഞാന് പുതിയ ചിത്രത്തിന്റെ നിര്മ്മാതാക്കളോട് (ജൂബിലി ഫിലിംസ്) ആവശ്യപ്പെട്ടു. അദ്ദേഹത്തെ രക്ഷിക്കണമെന്ന് ഞങ്ങള്ക്ക് ആഗ്രഹമുണ്ട്. നിര്മ്മാതാക്കള് അത് സമ്മതിച്ചിട്ടുണ്ട്. പുതിയ സിനിമയില് രാജ്പാല് വില്ലന് വേഷത്തിലാണ് എത്തുന്നത്’.
‘അദ്ദേഹത്തിന്റെ പ്രശ്നങ്ങളെക്കുറിച്ച് എനിക്ക് നേരത്തെ അറിയാമായിരുന്നു. അതുകൊണ്ടാണ് എന്റെ എല്ലാ സിനിമകളിലും ഞാന് അദ്ദേഹത്തിന് വേഷം നല്കിയത്. പരസ്യചിത്രങ്ങളിലും ഞാന് അദ്ദേഹത്തെ നിര്ദ്ദേശിച്ചു. വിദ്യാഭ്യാസത്തിന്റെ കുറവ് മൂലം ആ പാവത്തിന് പറ്റിയ ഒരു വലിയ അബദ്ധമാണിത്. രാജ്പാല് ഒരു നല്ല മനുഷ്യനാണ്.’
എന്താണ് കേസ്?
ദീര്ഘകാലമായി നിലനില്ക്കുന്ന ചെക്ക് ബോണ്സ് കേസുകളില് കൂടുതല് സമയം അനുവദിക്കാന് ഡല്ഹി ഹൈക്കോടതി വിസമ്മതിച്ചതിനെത്തുടര്ന്ന് ഫെബ്രുവരി 5-നാണ് രാജ്പാല് യാദവ് തിഹാര് ജയിലില് കീഴടങ്ങിയത്. മുജ്സെ ശാദി കരോഗി, വഖ്ത്, ഫിര് ഹേരാ ഫേരി, ഭൂല് ഭുലയ്യ തുടങ്ങിയ ചിത്രങ്ങളിലൂടെ പ്രശസ്തനായ അദ്ദേഹത്തിന് ഏകദേശം 9 കോടി രൂപയുടെ ബാധ്യതയുണ്ടെന്നാണ് റിപ്പോര്ട്ടുകള്.
2010-ലാണ് കേസിന്റെ തുടക്കം. തന്റെ ആദ്യ സംവിധാന സംരംഭമായ ‘Ata Pata Laapata ‘ (2012) എന്ന ചിത്രത്തിനായി ഡല്ഹി ആസ്ഥാനമായുള്ള മുരളി പ്രോജക്ട്സ് പ്രൈവറ്റ് ലിമിറ്റഡില് നിന്ന് രാജ്പാല് 5 കോടി രൂപ കടം വാങ്ങിയിരുന്നു. എന്നാല് ചിത്രം പരാജയപ്പെട്ടതോടെ സാമ്പത്തിക തര്ക്കങ്ങള് ഉടലെടുത്തു. 2018-ല് മജിസ്ട്രേറ്റ് കോടതി അദ്ദേഹത്തിന് ആറുമാസത്തെ തടവുശിക്ഷ വിധിച്ചു. പിന്നീട് സെഷന്സ് കോടതിയും ഇത് ശരിവെച്ചു. കാലക്രമേണ നല്കേണ്ട തുക പലിശയടക്കം 9 കോടി രൂപയോളമായി ഉയര്ന്നു.
താരങ്ങളുടെ പിന്തുണ
രാജ്പാല് ജയിലിലായ വാര്ത്ത പുറത്തുവന്നതോടെ നിരവധി സെലിബ്രിറ്റികള് അദ്ദേഹത്തിന് പിന്തുണയുമായി എത്തിയിട്ടുണ്ട്. സോനു സൂദ് ആണ് ആദ്യം സഹായവാഗ്ദാനം നടത്തിയത്. ഇതിന് പുറമെ ഗുര്മീത് ചൗധരി, ഗുരു രണ്ധാവ, മീക്ക സിംഗ് എന്നിവരും അദ്ദേഹത്തെ സാമ്പത്തികമായി സഹായിക്കാന് സന്നദ്ധത അറിയിച്ചിട്ടുണ്ട്.
#keralanews, #malayalamnews, #breakingnews, #bollywoodnews, #latestupdates, #dailyhuntmalayalam, #malayalamvartha, #cinemanews, #keralaupdates, #trendingnow #rajpalyadav, #priyadarshan, #tiharjail, #bhoothbangla, #sonusood, #mikasingh, #gururandhawa, #bollywoodupdates, #celebritynews, #legalnews, #financialcrisis, #malamaalweekly, #chupchupke #standwithrajpalyadav, #filmindustry, #humanity, #actorslife, #cinemaunites, #supportsystem, #bollywoodstars
