അക്രമികളെ കസ്റ്റഡിയിലെടുക്കുന്നതിന് പകരം പോലീസ് ഇറക്കി വിട്ടു..ട്രെയിനില്‍ ഉണ്ടായ മോശം അനുഭവം വെളിപ്പെടുത്തി ഹനാന്‍
ഹനാനെ മലയാളികള്‍ മറക്കാന്‍ ഇടയില്ല. കോളജ് യൂണിഫോമില്‍ മീന്‍ വിറ്റ് മലയാളികള്‍ വൈറലാക്കിയ ഹനാനിന്റെ ഏറ്റവും പുതിയ വാര്‍ത്തകള്‍ ആണ് ഇപ്പോള്‍ സമൂഹ മാധ്യമങ്ങളില്‍ ഇടം പിടിക്കുന്നത്. സമൂഹ മാധ്യമങ്ങളില്‍ വളരെ സജീവമായിട്ടുള്ള ഹനാന്‍ പങ്കു വെച്ച ഏറ്റവും പുതിയ വീഡിയോ ആണ് ഇപ്പോള്‍ ചര്‍ച്ചയാവുന്നത്. യാത്രക്കിടയില്‍ മദ്യലഹരിയില്‍ ഉള്ള യാത്രക്കാര്‍ അപമര്യാദമായി പെരുമാറിയെന്നും ആക്രമിക്കാന്‍ ശ്രമിച്ചുവെന്നും ഹനാന്‍ പറയുന്നു.
ജലന്ധറില്‍ പരീക്ഷ എഴുതാന്‍ പോകുന്നതിനിടെയാണ് ഹനാനിന് ഈ ദുരനുഭവം ഉണ്ടായത്. ട്രെയിന്‍ യാത്രയ്ക്കിടെ ഒരാള്‍ ഹനാനിനെ കയറി പിടിക്കുകയായിരുന്നു. ഒരു സംഘം ആളുകള്‍ ട്രെയിനില്‍ ഇരുന്ന് പരസ്യമായി മദ്യപിച്ചത് വീഡിയോയില്‍ പകര്‍ത്തിയപ്പോള്‍ ആണ് അവര്‍ യുവതിയോട് അപമര്യാദമായി പെരുമാറിയത്. ഇതോടെ അവര്‍ തന്നെ ആക്രമിക്കാന്‍ ശ്രമിക്കുകയായിരുന്നു എന്ന് ഹനാന്‍ പറഞ്ഞു.
സംഭവം അറിഞ്ഞെത്തിയ പോലീസും ഹനാനിനോട് മോശമായിട്ട് ആണ് പെരുമാറിയത്. അക്രമികളെ കസ്റ്റഡിയില്‍ എടുക്കുന്നതിന് പകരം ഹനാനിനോട് ട്രെയിനില്‍ നിന്ന് ഇറങ്ങാന്‍ ആണ് പോലീസ് ആവശ്യപ്പെട്ടത്. പെണ്‍കുട്ടികള്‍ അപകടത്തിലാണ് എന്ന് പറഞ്ഞു കൊണ്ട് ഹനാന്‍ കഴിഞ്ഞ ദിവസം പങ്കു വെച്ച ഈ വീഡിയോ ആണ് ഇപ്പോള്‍ സമൂഹ മാധ്യമങ്ങളില്‍ വൈറല്‍ ആയിരിക്കുന്നത്. നിരവധി പേരാണ് യുവതിയെ പിന്തുണച്ച് രംഗത്തെത്തുന്നത്.
കോളജ് യൂണിഫോമില്‍ പാലാരിവട്ടം തമ്മനം ജംഗ്ഷനില്‍ മീന്‍ വില്‍ക്കാന്‍ എത്തിയതോടെ ആണ് ഹനാനിനെ മലയാളികള്‍ അറിഞ്ഞത്. ഈ പെണ്‍കുട്ടിയുടെ വീഡിയോയും ചിത്രങ്ങളും സമൂഹ മാധ്യമങ്ങളില്‍ വൈറല്‍ ആവുകയായിരുന്നു. പഠനത്തോടൊപ്പം ഉപജീവനത്തിനായി മീന്‍ വില്‍ക്കാനെത്തിയ ഹനാന്‍ എന്ന പെണ്‍കുട്ടിയെ മലയാളികള്‍ നെഞ്ചിലേറ്റി. തുടര്‍ന്ന് സഹതാപത്തിന്റെ വാര്‍ത്തകളും അഭിനന്ദനങ്ങളുടെ സന്ദേശങ്ങളും സഹായഹസ്തങ്ങളും ആയിരുന്നു ഹനാനിനെ തേടിയെത്തിയത്.
ചാനലുകളിലെല്ലാം ഹനാന്‍ നിറഞ്ഞു നിന്നു. എന്നാല്‍, വാനോളം പുകഴ്ത്തിയവര്‍ തന്നെ അടുത്ത ദിവസം ഹനാനിനെ വലിച്ചു താഴെ ഇടുന്ന കാഴ്ചയായിരുന്നു കാണാന്‍ സാധിച്ചത്. സമൂഹ മാധ്യമങ്ങളില്‍ വൈറലായതെല്ലാം നുണക്കഥകള്‍ ആണ് എന്ന് ആരോപിച്ച് ഹനാനെ അധിക്ഷേപിക്കുകയും അസഭ്യം പറയുന്ന കുറിപ്പുകളും ആയിരുന്നു പിന്നീട് നിറഞ്ഞത്. ഹനാനെതിരെ ഒരുപാട് സൈബര്‍ ആക്രമണങ്ങളും വിമര്‍ശനങ്ങളും ഉയര്‍ന്നു.
ഒരു കാലത്ത് സമൂഹ മാധ്യമങ്ങള്‍ ഏറെ ചര്‍ച്ച ചെയ്ത ഹനാനെ പിന്നീട് മലയാളികള്‍ അധികമൊന്നും കണ്ടില്ല. ജീവിതത്തിലെ പ്രതിസന്ധികളെ മറികടന്ന് വിജയിക്കുവാന്‍ ആയിരുന്നു ഹനാന്റെ ഉറച്ച തീരുമാനം എങ്കിലും, വിധി ഈ കൊച്ചു പെണ്‍കുട്ടിക്ക് മുന്നില്‍ ഓരോ വെല്ലുവിളികളും തടസങ്ങളും വീണ്ടും തീര്‍ത്തു കൊണ്ടേയിരുന്നു. ഇടയ്ക്ക് വാഹനാപകടത്തില്‍ അകപ്പെട്ട ഹനാന്‍ ഒരുപാട് കാലം ചികിത്സയില്‍ ആയിരുന്നു.
