പ്രധാന വാർത്തകൾ: സാമ്പത്തിക സംവരണ കേസില്‍ സുപ്രിംകോടതി വിധി നാളെ, ഗവര്‍ണറെ സര്‍വകലാശാലാ ചാന്‍സലര്‍ സ്ഥാനത്തുനിന്ന് നീക്കുന്ന ഓര്‍ഡിനന്‍സ് കൊണ്ടുവരുമെന്ന് സിപിഎം, കൊള്ളപ്പലിശക്കാരുടെ ഭീഷണിമൂലം പാലക്കാട് പറളി സ്വദേശിയായ യുവാവ് ആത്മഹത്യ ചെയ്തു, മന്ത്രവാദിനിയെന്ന് ആരോപിച്ച് ദളിത് യുവതിയെ നാട്ടുകാര്‍ ജീവനോടെ തീ കൊളുത്തി കൊന്നു
സാമ്പത്തിക സംവരണ കേസില്‍ സുപ്രിംകോടതി നാളെ വിധി പറയും. മുന്നോക്ക വിഭാഗങ്ങളിലെ സാമ്പത്തികമായി പിന്നാക്കാവസ്ഥയിലുള്ളവര്‍ക്ക് 10 ശതമാനം സംവരണം നല്‍കിയ കേന്ദ്ര സര്‍ക്കാര്‍ തീരുമാനത്തെ ചോദ്യം ചെയ്താണ് ഹര്‍ജികള്‍. തിങ്കളാഴ്ച വിരമിക്കുന്ന ചീഫ് ജസ്റ്റിസ് യു.യു ലളിത് അധ്യക്ഷനായ ബഞ്ചാണ് വിധി പ്രസ്താവിക്കുക.
സംസ്ഥാനങ്ങള്‍ വായ്പ എടുക്കുന്നതില്‍ കേന്ദ്രം ഇടപെടുമെന്നു കേന്ദ്രമന്ത്രി നിര്‍മല സീതാരാമന്‍ തിരുവനന്തപുരത്ത് പറഞ്ഞു. സെസായി പിരിക്കുന്ന തുക സംസ്ഥാനങ്ങള്‍ക്കു നല്‍കുന്നില്ലെന്ന വിമര്‍ശനം തെറ്റാണ്. സംസ്ഥാനങ്ങളില്‍ റോഡുകളും സ്‌കൂളും ആശുപത്രികളും അടക്കമുള്ളവ പണിയാനാണ് സെസ് തുക വിനിയോഗിക്കുന്നത്. സൗജന്യങ്ങള്‍ നല്‍കാന്‍ വായ്പയെടുക്കുന്നത് നല്ല കീഴ് വഴക്കമല്ലെന്നും അവര്‍ പറഞ്ഞു.
മരുന്നു പാക്കറ്റുകളില്‍ ബാര്‍കോഡ് നിര്‍ബന്ധമാക്കുന്നു. 300 ഇനം ബ്രാന്‍ഡ് മരുന്നുകളുടെ പാക്കേജുകളിലാണ് ബാര്‍ കോഡ് മുദ്രണം ചെയ്യാന്‍ ഫാര്‍മസ്യൂട്ടിക്കല്‍ കമ്പനികളോട് സര്‍ക്കാര്‍ ആവശ്യപ്പെട്ടത്.
ഗവര്‍ണറെ സര്‍വകലാശാലാ ചാന്‍സലര്‍ സ്ഥാനത്തുനിന്ന് നീക്കുന്ന ഓര്‍ഡിനന്‍സ് കൊണ്ടുവരുമെന്ന് സിപിഎം. സംസ്ഥാന സമിതിയിലാണ് ഇക്കാര്യം ചര്‍ച്ചയായത്. ഓര്‍ഡിനന്‍സില്‍ ഗവര്‍ണര്‍ ഒപ്പിട്ടില്ലെങ്കില്‍ നിയമസഭയില്‍ ബില്‍ പാസാക്കും. ഒപ്പിടാതെ തിരിച്ചയച്ചാല്‍ കോടതിയെ സമീപിക്കും. ഇന്നും തുടരുന്ന സിപിഎം സംസ്ഥാന സമിതി യോഗം അന്തിമ തീരുമാനമെടുക്കും.
സമുദ്രാര്‍തിര്‍ത്തി ലംഘിച്ചതിന് മൂന്നു മലയാളികള്‍ ഉള്‍പ്പെടെ 26 നാവികര്‍ ആഫ്രിക്കന്‍ രാജ്യമായ എക്വറ്റോറിയല്‍ ഗിനിയില്‍ അറസ്റ്റില്‍. സ്ത്രീധന പീഡനത്തെത്തുടര്‍ന്ന് കൊല്ലത്ത് ജീവനൊടുക്കിയ വിസ്മയയുടെ സഹോദരന്‍ വിജിത്ത് ഉള്‍പ്പെടെ ഉള്ളവരാണ് അറസ്റ്റിലായത്. പിടിയിലായ 26 പേരില്‍ 16 പേര്‍ ഇന്ത്യക്കാരാണ്.
രാജ്ഭവനില്‍ ഡെന്റല്‍ ക്ലിനിക്കിന് പത്തു ലക്ഷം രൂപ വേണമെന്ന ഗവര്‍ണറുടെ ആവശ്യം ധനവകുപ്പ് അംഗീകരിച്ചു. മുഖ്യമന്ത്രി തീരുമാനമെടുത്താല്‍ ഉത്തരവിറങ്ങും. നേരത്തെ രാജ്ഭവനില്‍ ഇ ഓഫീസ് സംവിധാനം ഒരുക്കാന്‍ 75 ലക്ഷം രൂപ അനുവദിച്ചിരുന്നു.
ഷാരോണ്‍ കൊല കേസിലെ പ്രധാന പ്രതി ഗ്രീഷ്മയുടെ, പോലീസ് സീല്‍ചെയ്ത, വീടിന്റെ വാതില്‍ തകര്‍ത്ത് അജ്ഞാതന്‍ അകത്തു കയറി. സംഭവത്തിലെ ദുരൂഹതയെക്കുറിച്ച് തമിഴ്നാട് പോലീസ് കേസെടുത്ത് അന്വേഷണം തുടങ്ങി.
തലശേരിയില്‍ കാറില്‍ ചാരി നിന്നതിന് ആക്രമിക്കപ്പെട്ട ആറുവയസുകാരനെ ആദ്യം അടിച്ചയാളെ അറസ്റ്റു ചെയ്തു. വഴിയാത്രക്കാരനായ മുഴപ്പിലങ്ങാട് സ്വദേശി മഹമൂദിനെയാണ് അറസ്റ്റു ചെയ്തത്. അടിച്ചിട്ടില്ലെന്നും മാറ്റിനിര്‍ത്തുകയാണ് ചെയ്തതെന്നുമാണു മഹമൂദ് പൊലീസിനോട് പറഞ്ഞത്. ഭിക്ഷ ചോദിച്ചപ്പോള്‍ പൈസ കൊടുത്തെന്നും പറഞ്ഞു. ഇതോടെ ഇയാളെ വിട്ടയച്ചു. എന്നാല്‍ മഹമൂദ് തലയ്ക്ക് അടിക്കുന്നത് സിസിടവി ദൃശ്യങ്ങളില്‍ വ്യക്തമായതിനാല്‍ രാത്രിയോടെ അറസ്റ്റ് ചെയ്യുകയായിരുന്നു. കേസ് ക്രൈംബ്രാഞ്ചിനു കൈമാറി.
ലാവലിന്‍ കേസ് കാലതാമസം വരുത്തുന്നതിനു സുപ്രീംകോടതി രജിസ്റ്ററിക്കെതിരെ അന്വേഷണം നടത്തണമെന്ന് ബെന്നി ബഹനാന്‍ എംപി സുപ്രീംകോടതി ചീഫ് ജസ്റ്റിസിനു കത്തെഴുതി.
ആലപ്പുഴ കന്നിട്ട ബോട്ട് ജെട്ടിക്ക് സമീപം ഹൗസ് ബോട്ടിന് തീപിടിച്ചു. ഹൗസ് ബോട്ടിലെ പാചകക്കാരനായ ആലപ്പുഴ സ്വദേശി നിഷാദിനു പൊള്ളലേറ്റു. ഹൗസ് ബോട്ടിലെ വിനോദ സഞ്ചാരികള്‍ ബീച്ച് കാണാന്‍ പോയപ്പോഴാണ് തീ പിടിച്ചത്.
പട്ടാമ്പിക്കടുത്ത് മണ്ണേങ്ങോട് അത്താണിയില്‍ അബ്ദുള്‍ സലാമിന്റെ മകന്‍ ഹര്‍ഷാദ് ദുരൂഹ സാഹചര്യത്തില്‍ മരിച്ച സംഭവത്തില്‍ സുഹൃത്തും ബന്ധുവുമായ ഹക്കീമിനെ പൊലീസ് കസ്റ്റഡിയിലെടുത്തു. കൊലപാതകമാണെന്ന് ആരോപിച്ചാണ് കസ്റ്റഡിയിലെടുത്തത്. നായയ്ക്കു തീറ്റ കൊടുക്കുന്നതുമായി ബന്ധപ്പെട്ട തര്‍ക്കമാണ് കൊലപാതത്തില്‍ കലാശിച്ചതെന്നു പോലീസ്.
മലപ്പുറം പാണ്ടിക്കാട് ഭാര്യക്കുനേരെ ഭര്‍ത്താവിന്റെ ആസിഡ് ആക്രമണം. പാണ്ടിക്കാട് ചെമ്പ്രശ്ശേരി അമ്പലക്കള്ളി സ്വദേശി ഫഷാനയെ (27) ആണ് ഭര്‍ത്താവ് വണ്ടൂര്‍ സ്വദേശി ഷാനവാസ് ആക്രമിച്ചത്.
മക്കളെ കൊലപ്പെടുത്തി യുവതി ആത്മഹത്യ ചെയ്ത സംഭവത്തില്‍ ഭര്‍ത്താവിനെ അറസ്റ്റ് ചെയ്തു. മലപ്പുറത്തിനടുത്ത് കല്‍പകഞ്ചേരിയിലാണ് സംഭവം. ചെട്ടിയാംകിണര്‍ സ്വദേശി നാവുന്നത്ത് റാഷിദലിയെയാണ് കല്‍പകഞ്ചേരി പൊലീസ് അറസ്റ്റ് ചെയ്തത്.
വിദ്യാര്‍ത്ഥി സംഘര്‍ഷത്തെത്തുടര്‍ന്ന് അടച്ച എറണാകുളം മഹാരാജാസ് കോളജ് തിങ്കളാഴ്ച തുറക്കും. കോളജില്‍ നടന്ന സര്‍വകക്ഷി യോഗത്തിലാണ് തീരുമാനം. അടിയുണ്ടാക്കിയ വിദ്യാര്‍ത്ഥികള്‍ക്കെതിരെ പരാതി ലഭിക്കുന്ന മുറയ്ക്ക് മാതൃകാപരമായ നടപടി സ്വീകരിക്കുമെന്ന് കോളജ് അധികൃതര്‍ അറിയിച്ചു.
വിദ്യാര്‍ത്ഥിയെ ബസില്‍നിന്ന് പുറത്തേക്കു വലിച്ചിട്ട കണ്ടക്ടര്‍ കസ്റ്റഡിയില്‍. വെളിയങ്കോട് സ്വദേശി ഉമ്മറിനെയാണ് ചാവക്കാട് പൊലീസ് കസ്റ്റഡിയിലെടുത്തത്. ചാവക്കാട് – പൊന്നാനി റൂട്ടില്‍ സര്‍വീസ് നടത്തുന്ന ഹനീഫ ബസിലെ കണ്ടക്ടറാണ് ഇയാള്‍.
ഭൂമി തരം മാറ്റുന്നതിനുള്ള രേഖക്കായി എത്തിയ എണ്‍പതുകാരിക്കു നീതി നിഷേധിച്ച് കൃത്യനിര്‍വഹണത്തില്‍ അലംഭാവം കാട്ടിയെന്ന് ആരോപിച്ച് കൃഷി ഓഫീസര്‍ക്കെതിരെ നടപടി. എറണാകുളം പായിപ്ര പഞ്ചായത്തിലെ കൃഷി ഓഫീസര്‍ എം.ബി രശ്മിയെ കണ്ണൂര്‍ ജില്ലയിലെ ന്യൂ മാഹി കൃഷി ഭവനിലേക്കു സ്ഥലം മാറ്റി.
കൊള്ളപ്പലിശക്കാരുടെ ഭീഷണിമൂലമാണ് പാലക്കാട് പറളി സ്വദേശിയായ യുവാവിന്റെ ആത്മഹത്യയെന്നു പരാതി. കിണാവല്ലൂര്‍ അനശ്വര നഗറിലെ നിര്‍മ്മാണ തൊഴിലാളി പ്രവീണാണ് വീട്ടില്‍ തൂങ്ങിമരിച്ചത്. രാത്രിയില്‍ പോലും പലിശക്കാര്‍ വീട്ടിലെത്തി ഭീഷണിപ്പെടുത്തി എന്നാണു പരാതി.
നാദാപുരത്ത് ബോംബുകള്‍ കണ്ടെത്തി. പേരോടുള്ള ഒരാളുടെ പറമ്പിലാണ് എട്ട് നാടന്‍ ബോംബുകള്‍ കണ്ടെത്തിയത്. പി വി സി പൈപ്പിലാക്കി സൂക്ഷിച്ച നിലയിലായിരുന്നു ബോംബുകള്‍.
കോയമ്പത്തൂര്‍ ചാവേര്‍ സ്ഫോടനക്കേസിലെ പ്രതി കൊല്ലപ്പെട്ട ജമേഷ മുബീന്റെ വീട്ടില്‍നിന്ന് അയാളുടെ പെന്‍ഡ്രൈവ് കണ്ടെത്തി. തീവ്രവാദ പ്രസ്ഥാനമായ ഐ.എസ് പ്രചാരണ വീഡിയോകളാണ് പെന്‍ഡ്രൈവില്‍. നൂറോളം വീഡിയോകളില്‍ നാല്‍പതോളവും ശ്രീലങ്കന്‍ ഭീകരാക്രമണത്തിലെ മുഖ്യസൂത്രധാരന്‍ സെഹ്റാന്‍ ബിന്‍ ഹാഷിമുമായി ബന്ധപ്പെട്ടതാണ്.
ഭാരത് ജോഡോ യാത്രക്ക് സൂപ്പര്‍ ഹിറ്റ് ചിത്രമായ കെജിഎഫിലെ ഗാനം ഉപയോഗിച്ചതിന് രാഹുല്‍ ഗാന്ധിയടക്കം മൂന്നു പേര്‍ക്കെതിരെ പകര്‍പ്പവകാശ നിയമപ്രകാരം കേസ്. ബെംഗളൂരുവിലെ മ്യൂസിക് കമ്പനിയായ എം.ആര്‍.ടിയുടെ ബിസിനസ് പങ്കാളിമാളിമാരിലൊരാളായ നവീന്‍ കുമാറാണ് പരാതി നല്‍കിയത്.
ഉല്‍പാദന ചെലവു വര്‍ധിക്കുകയും ആപ്പിളിനു താങ്ങുവില വര്‍ധിപ്പിക്കാതിരിക്കുകയും ചെയ്ത സര്‍ക്കാര്‍ നടപടിയില്‍ പ്രതിഷേധവുമായി ഹിമാചല്‍ പ്രദേശിലെ ആപ്പിള്‍ കര്‍ഷകര്‍. നിയമസഭാ തെരഞ്ഞെടുപ്പില്‍ ആപ്പിള്‍ കര്‍ഷകര്‍ ബിജെപിക്കെതിരായ നിലപാടെടുക്കുമെന്ന് സൂചന.
പഞ്ചാബിലെ അമ്യത് സറില്‍ സുധീര്‍സുരി എന്ന ശിവസേന നേതാവ് വെടിയേറ്റ് കൊല്ലപ്പെട്ട സംഭവത്തില്‍ ഉത്തരവാദിത്വം ഏറ്റെടുത്ത് കാനഡയിലെ അധോലോക നേതാവ് ലഖ്ബീര്‍ സിംഗ് ലാന്‍ഡ.
ഗുജറാത്ത് തെരഞ്ഞെടുപ്പില്‍നിന്നു മാറിനിന്നാല്‍ കേന്ദ്ര ഏജന്‍സികളുടെ അന്വേഷണം ഒഴിവാക്കാമെന്ന് ഡല്‍ഹിയിലെ മന്ത്രിമാരായ ആം ആദ്മി പാര്‍ട്ടി നേതാക്കള്‍ക്കു ബിജെപി വാഗ്ദാനമെന്ന് മുഖ്യമന്ത്രി അരവിന്ദ് കേജരിവാള്‍. ഉപമുഖ്യമന്ത്രി മനീഷ് സിസോദിയയെയും സത്യേന്ദര്‍ ജെയിനിനെയും കേസില്‍നിന്ന് ഒഴിവാക്കാം എന്നായിരുന്നുവത്രേ വാഗ്ദാനം.
തമിഴ്നാട്ടില്‍ ഇന്നു നടത്താനിരുന്ന റൂട്ട് മാര്‍ച്ച് ആര്‍എസ്എസ് ഉപേക്ഷിച്ചു. മാര്‍ച്ച് ഏതെങ്കിലും നിശ്ചയിക്കപ്പെട്ട സ്റ്റേഡിയങ്ങളിലോ മറ്റോ നടത്തണമെന്ന് മദ്രാസ് ഹൈക്കോടതി ഉത്തരവിട്ടതിനാലാണ് മാര്‍ച്ച് ഉപേക്ഷിച്ചത്. 44 ഇടങ്ങളില്‍ മാര്‍ച്ച് നടത്താനാണ് അനുമതി നല്‍കിയിരുന്നത്.
അയോധ്യയിലെ രാമക്ഷേത്ര നിര്‍മ്മാണം വിജയകരമായി പൂര്‍ത്തിയാക്കുന്നതു ഗുജറാത്ത്, ഹിമാചല്‍ പ്രദേശ് തെരഞ്ഞെടുപ്പില്‍ പ്രചാരണ വിഷയമാക്കി പ്രധാനമന്ത്രി നരേന്ദ്രമോദി. കോണ്‍ഗ്രസിന്റെ വാഗ്ദാനങ്ങള്‍ പൊള്ളയാണെന്നും മോദി കുറ്റപ്പെടുത്തി.
മന്ത്രവാദിനിയെന്ന് ആരോപിച്ച് ദളിത് യുവതിയെ നാട്ടുകാര്‍ ജീവനോടെ തീ കൊളുത്തി കൊന്നു. ബിഹാറിലെ ഗയാ ജില്ലയിലെ പച്മാ ഗ്രാമത്തിലാണ് 45 കാരിയായ റിതാദേവി കൊല്ലപ്പെട്ടത്. വിവരമറിഞ്ഞെത്തിയ പൊലീസുകാരെയും നാട്ടുകാര്‍ ആക്രമിച്ചു. പ്രതികളായ ഉയര്‍ന്ന സമുദായത്തിലുള്ള ഒമ്പത് സ്ത്രീകളെ അറസ്റ്റു ചെയ്തു.
സ്വതന്ത്ര ഇന്ത്യയിലെ ആദ്യ വോട്ടറായ ശ്യാം ശരണ്‍ നേഗി നൂറ്റാറാം വയസില്‍ അന്തരിച്ചു. സ്വന്തം നാടായ ഹിമാചല്‍ പ്രദേശിലെ കിന്നൗറിലെ കല്‍പയിലായിരുന്നു അന്ത്യം. 1951 ഓക്ടോബര്‍ 25 ന് ഇന്ത്യയിലെ ആദ്യ പൊതുതെരഞ്ഞെടുപ്പില്‍ ഇദ്ദേഹമാണ് ആദ്യത്തെ വോട്ട് ചെയ്തത്.
ആം ആദ്മി പാര്‍ട്ടിക്കെതിരെ കൈക്കൂലി പരാതി ഉന്നയിച്ച തനിക്കെതിരേ ഭീഷണിയുണ്ടെന്ന് ജയിലിലുള്ള കോടികളുടെ തട്ടിപ്പുകാരന്‍ സുകേഷ് ചന്ദ്രശേഖര്‍. ജയിലില്‍ കഴിയുന്ന മന്ത്രി സത്യേന്ദ്രജയിനും മുന്‍ തിഹാര്‍ ജയില്‍ ഡിജിയുമാണ് ഭീഷണിപ്പെടുത്തിയതെന്ന് അയാള്‍ പറഞ്ഞു.
റഷ്യയിലെ കൊസ്ട്രോമയിലെ കഫേയിലുണ്ടായ തീപിടുത്തത്തില്‍ 15 പേര്‍ മരിച്ചു. തര്‍ക്കത്തിടെ ആരോ എയര്‍ ഗണ്‍ ഉപയോഗിച്ചതിനെത്തുടര്‍ന്നാണ് തീപിടുത്തമുണ്ടായത്. 250 പേരെ അപകട സ്ഥലത്തുനിന്ന് ഒഴിപ്പിച്ചു.
ട്വിറ്ററില്‍ കൂട്ടപ്പിരിച്ചുവിടലുമായി ശതകോടീശ്വരന്‍ ഇലോണ്‍ മസ്‌ക്. ജോലി നഷ്ടമായ വിവരം എന്‍ജിനിയറിംഗ്, മാര്‍ക്കറ്റിംഗ്, സെയില്‍സ് വിഭാഗത്തിലെ ആളുകള്‍ സമൂഹമാധ്യമങ്ങളില്‍ പങ്കുവച്ചു. പകുതിയോളം പേരെ പിരിച്ചുവിടുമെന്നാണു വിവരം.
ലോകമെങ്ങും നുണകള്‍ പ്രചരിപ്പിക്കുന്ന സോഷ്യല്‍ മീഡിയ പ്ലാറ്റ്ഫോം വാങ്ങിയയാളെന്ന് ഇലോണ്‍ മസ്‌കിനെ വിമര്‍ശിച്ച് അമേരിക്കന്‍ പ്രസിഡന്റ് ജോ ബൈഡന്‍. ട്വിറ്ററില്‍ വംശീയ- വിദ്വേഷ പ്രചരണങ്ങള്‍ വര്‍ധിച്ചിട്ടുണ്ടെന്ന റിപ്പോര്‍ട്ടുകള്‍ക്ക് പിന്നാലെയാണ് ബൈഡന്റെ വിമര്‍ശനം.
കേരള ബ്ലാസ്റ്റേഴ്‌സ് വിജയവഴിയില്‍. തുടര്‍ച്ചയായ മൂന്ന് തോല്‍വികള്‍ക്കു ശേഷം നോര്‍ത്ത് ഈസ്റ്റിനെ ഏകപക്ഷീയമായ മൂന്ന് ഗോളുകള്‍ക്ക് കീഴടക്കിയാണ് മഞ്ഞപ്പട വിജയവഴിയില്‍ തിരിച്ചെത്തിയത്. കേരള ബ്ലാസ്റ്റേഴ്‌സ സ്‌ട്രൈക്കര്‍ ദിമിത്രിയോസ് ഡയമന്റക്കോസ് ആദ്യ ഗോള്‍ നേടിയപ്പോള്‍ പകരക്കാരനായിറങ്ങിയ മലയാളി താരം സഹല്‍ അബ്ദുള്‍ സമദ് ഇരട്ട ഗോളുകള്‍ നേടി. ഇതോടെ അഞ്ച് മത്സരങ്ങളില്‍ നിന്ന് ആറ് പോയന്റുമായി ബ്ലാസ്റ്റേഴ്‌സ് പട്ടികയില്‍ ഏഴാം സ്ഥാനത്താണ്.
ട്വൻ്റി 20 ലോകകപ്പില്‍ ഇന്ന് മൂന്ന് നിര്‍ണായക കളികള്‍. ആദ്യ മത്സരം സൗത്ത് ആഫ്രിക്കയും നെതര്‍ലന്ഡ്സും തമ്മിലാണ്. രണ്ടാമത്തെ മത്സരം പാകിസ്ഥാനും ബംഗ്ലാദേശും തമ്മില്‍. മൂന്നാമത്തെ മത്സരത്തില്‍ ഇന്ത്യ സിംബാബ്വേയുമായി ഏറ്റുമുട്ടും. ഗ്രൂപ്പ് ബിയിലെ സെമി ഫൈനലിസ്റ്റുകളെ നിശ്ചയിക്കുന്നത് ഇന്നത്തെഫലം അനുസരിച്ചായിരിക്കും.
പ്രമുഖ വായ്പാ സ്ഥാപനം എച്ച്ഡിഎഫ്‌സിയുടെ സെപ്റ്റംബര്‍ പാദത്തിലെ അറ്റാദായം 18 ശതമാനം ഉയര്‍ന്ന് 4454 കോടി രൂപയായി. കഴിഞ്ഞ വര്‍ഷം ഇതേ പാദത്തിലെ 3,781 കോടി രൂപയുമായി താരതമ്യം ചെയ്യുമ്പോള്‍ മികച്ച നേട്ടമാണ് ഉണ്ടായിരിക്കുന്നത്. ഈ ത്രൈമാസത്തിലെ അറ്റ പലിശ വരുമാനം മുന്‍ വര്‍ഷത്തെ അപേക്ഷിച്ച് 13 ശതമാനം ഉയര്‍ന്ന് 4639 കോടി രൂപയായി. മൊത്ത വ്യക്തിഗത നിഷ്‌ക്രിയ വായ്പകള്‍ വ്യക്തിഗത പോര്‍ട്ട്‌ഫോളിയോയുടെ 0.91 ശതമാനവും, മൊത്ത നിഷ്‌ക്രിയ നോണ്‍-വ്യക്തിഗത വ്യക്തികള്‍ വ്യക്തി ഇതര പോര്‍ട്ട്‌ഫോളിയോയുടെ 3.99 ശതമാനവുമാണ്. സെപ്റ്റംബര്‍ 30ലെ കണക്കനുസരിച്ച് മൊത്തം എന്‍പിഎല്‍ 9355 കോടി രൂപയാണ്. ആകെ ആസ്തി 6,90,284 കോടി രൂപയായി ഉയര്‍ന്നു.
അറ്റാദായത്തില്‍ 74 ശതമാനം വര്‍ദ്ധനവ് രേഖപ്പെടുത്തി സ്റ്റേറ്റ് ബാങ്ക് ഓഫ് ഇന്ത്യ ത്രൈമാസ ഫലം പുറത്തുവിട്ടു. റിഫിനിറ്റീവ് ഐബിഇ എസ് ഡാറ്റ പ്രകാരം, ബാങ്കിന്റെ ജൂണ്‍-സെപ്റ്റംബര്‍ മാസങ്ങളില്‍ അറ്റാദായം 132.64 ബില്യണ്‍ ഇന്ത്യന്‍ രൂപയായി ഉയര്‍ന്നു. നിക്ഷേപം 9.99 ശതമാനം ഉയര്‍ന്നു. നടപ്പ് സാമ്പത്തിക വര്‍ഷത്തില്‍ 14 മുതല്‍ 16 ശതമാനം വായ്പാ വളര്‍ച്ച കൈവരിക്കാന്‍ ലക്ഷ്യമിടുന്നു. ഒക്ടോബര്‍ ഏഴ് വരെയുള്ള രണ്ടാഴ്ചയ്ക്കുള്ളില്‍ ഇന്ത്യന്‍ ബാങ്കുകള്‍ വായ്പാ വളര്‍ച്ചയില്‍ 17.95 ശതമാനം വാര്‍ഷിക കുതിപ്പ് രേഖപ്പെടുത്തിയാതായി റിസര്‍വ് ബാങ്ക് ഓഫ് ഇന്ത്യയുടെ ഡാറ്റ വ്യക്തമാക്കുന്നു. ഈ കാലയളവില്‍ നിക്ഷേപ വളര്‍ച്ച 9.63 ശതമാനം ആയിരുന്നു. എസ്ബിഐയുടെ മുഖ്യ അറ്റ പലിശ മാര്‍ജിന്‍ കഴിഞ്ഞ വര്‍ഷം 3.50 ശതമാനത്തില്‍ നിന്ന് 3.55 ശതമാനമായി മെച്ചപ്പെട്ടു.
വിജയ് ചിത്രം ‘വരിശി’ലെ ഗാനത്തിന്റെ ലിറിക്ക് വീഡിയോ പുറത്തുവിട്ടു. ‘രഞ്ജിതമേ’ എന്ന ഗാനമാണ് പുറത്തുവന്നത്. ഗാനത്തിന്റെ ടീസര്‍ വന്നപ്പോള്‍ തന്നെ തരംഗമായിരുന്നു. എസ് തമന്റെ സംഗീത സംവിധാനത്തില്‍ വിജയ് തന്നെ ആലപിച്ചുവെന്ന പ്രത്യേകതയും ഈ ഗാനത്തിനുണ്ട്. വംശി പൈഡിപ്പള്ളി സംവിധാനം ചെയ്യുന്ന ചിത്രത്തില് രശ്മിക മന്ദാന ആണ് നായിക. കാര്‍ത്തിക് പളനിയാണ് ചിത്രത്തിന്റെ ഛായാഗ്രാഹണം നിര്‍വഹിക്കുന്നത്. പ്രവീണ്‍ കെ എല്‍ ചിത്രസംയോജനം നിര്‍വഹിക്കുന്ന ചിത്രം പൊങ്കല്‍ റിലീസായിട്ടായിരിക്കും തിയറ്ററുകളില്‍ എത്തുക. ശ്രീ വെങ്കടേശ്വര ക്രിയേഷന്‍സിന്റെ ബാനറില്‍ ദില്‍ രാജുവും ശിരീഷും ചേര്‍ന്നായിരിക്കും ചിത്രത്തിന്റെ നിര്‍മ്മാണം. ശരത് കുമാര്‍, പ്രകാശ് രാജ്, ശ്യാം, പ്രഭു, ജയസുധ, ശ്രീകാന്ത്, ഖുശ്ബു, സംഗീത കൃഷ്ണ തുടങ്ങിയവരും അഭിനയിക്കുന്നു. വിജയ്യുടെ അറുപത്തിയാറാം ചിത്രമാണ് ഇത്. തമിഴിലും തെലുങ്കിലുമായിട്ടാണ് ചിത്രം.
ഏറ്റവും അധികം വില്‍പനയുള്ള പത്തുകാറുകളില്‍ ഏഴും മാരുതി തന്നെ. രണ്ട് ടാറ്റ വാഹനങ്ങളും ഒരു ഹ്യുണ്ടേയും ആദ്യ പത്തില്‍ ഇടം പിടിച്ചു. ചെറു എസ്യുവി വിഭാഗത്തില്‍ മാരുതി സുസുക്കി വിറ്റാര ബ്രെസയെ പിന്തള്ളി നെക്സോണ്‍ ഒന്നാമതെത്തി. മാരുതി സുസുക്കിയുടെ ചെറു കാര്‍ ഓള്‍ട്ടോയാണ് വില്‍പനയില്‍ ഒന്നാം സ്ഥാനത്ത്. രണ്ടാം സ്ഥാനം ഹാച്ച്ബാക്കായ വാഗണ്‍ആറിനാണ്. മൂന്നാം സ്ഥാനത്ത് സ്വിഫ്റ്റും നാലാം സ്ഥാനത്ത് ബലേനോയും. ആദ്യ നാലു സ്ഥാനവും ഹാച്ച്ബാക്കുകളാണ് സ്വന്തമാക്കിയത്. അഞ്ചാം സ്ഥാനത്ത് ടാറ്റയുടെ ചെറു എസ്യുവി നെക്സോണാണ്. ആറാം സ്ഥാനത്ത് മാരുതിയുടെ കോംപാക്റ്റ് സെഡാന്‍ ഡിസയര്‍. ഏഴാം സ്ഥാനത്ത് ഹ്യുണ്ടേയ് ക്രേറ്റയും എട്ടാം സ്ഥാനത്ത് ടാറ്റ പഞ്ചുമുണ്ട്. മാരുതി സുസുക്കി എംപിവി എര്‍ട്ടിഗയും ചെറു എസ്യുവി വിറ്റാര ബ്രെസയുമാണ് ഒമ്പതും പത്തും സ്ഥാനങ്ങളില്‍.
