അഡ്‌ലെയ്ഡ്: ടി20 ലോകകപ്പില്‍ അവസാനപന്ത് വരെ നീണ്ട് നിന്ന ത്രില്ലര്‍ പോരാട്ടത്തില്‍ ബംഗ്ലാദേശിനെ വീഴ്ത്തി സെമി ഫൈനല്‍ ഉറപ്പിച്ച്‌ ഇന്ത്യ. മഴ രസംകൊല്ലിയായെത്തിയ മത്സരത്തില്‍ ബംഗ്ലാദേശിന്‍്റെ വിജയലക്ഷ്യം 16 ഓവറില്‍ 151 റണ്‍സാക്കി പുനക്രമീകരിക്കുകയായിരുന്നു.
നേരത്തെ മഴയെത്തും മുന്‍പെ ഇന്ത്യ ഉയര്‍ത്തിയ 185 റണ്‍സ് വിജയലക്ഷ്യവുമായി ഇറങ്ങിയ ബംഗ്ലാദേശ് 7 ഓവറില്‍ വിക്കറ്റ് നഷ്ടപ്പെടാതെ 66 റണ്‍സ് നേടിയിരുന്നു.27 പന്തില്‍ നിന്നും 60 റണ്‍സുമായി ലിറ്റണ്‍ ദാസ് റണ്ണൗട്ടായതോടെയാണ് മത്സരം ഇന്ത്യന്‍ കൈപ്പിടിയിലായത്.
ആദ്യം ബാറ്റുചെയ്ത ഇന്ത്യ നിശ്ചിത 20 ഓവറിൽ ആറ് വിക്കറ്റ് നഷ്ടത്തിൽ 184 റൺസെടുത്തിരുന്നു.32 പന്തിൽ 52 റൺസെടുത്ത രാഹുലും 44 പന്തില്‍ ഒരു സിക്‌സും എട്ട് ഫോറും ഉള്‍പ്പെടെ 64 റൺസെടുത്ത വിരാട് കോലിയും ചേർന്നാണ് ഇന്ത്യൻ സ്കോർ പടുത്തുയർത്തിയത്.
അവസാന മത്സരത്തില്‍ സിംബാബ്‌വെയാണ് ഇന്ത്യയുടെ എതിരാളി. ബംഗ്ലാദേശ്, പാകിസ്ഥാനേയും നേരിടും.
