‘തമിഴ്നാടിന്റെ ഡൽഹിയിലെ പ്രത്യേക പ്രതിനിധി ആകാൻ വിളിയെത്തി; ജമ്മു കശ്മീർ,പഞ്ചാബ്,ഹിമാചൽ സംസ്ഥാനങ്ങളും സമീപിച്ചിട്ടുണ്ട്‘- കെ.വി തോമസ്
ന്യൂഡൽഹി: തമിഴ്നാടിന്റെ ഡൽഹിയിലെ പ്രത്യേക പ്രതിനിധിയായി ചുമതലയേൽക്കാൻ ക്ഷണം ലഭിച്ചതായി കെ.വി. തോമസ്. മുഖ്യമന്ത്രി വിജയിയുടെ നിലപാട് അറിഞ്ഞതിന് ശേഷമായിരിക്കും അന്തിമ തീരുമാനം എടുക്കുകയെന്ന് അദ്ദേഹം വ്യക്തമാക്കി.
തമിഴ്നാട്ടിലെ ചില വ്യാപാരി സുഹൃത്തുക്കളാണ് ഇത്തരമൊരു നിർദേശം മുന്നോട്ടുവെച്ചതെന്നും, പിണറായി വിജയനുമായി ഇക്കാര്യം ചർച്ച ചെയ്യുമെന്നും കെ.വി. തോമസ് പറഞ്ഞു. ജമ്മു കശ്മീർ, പഞ്ചാബ്, ഹിമാചൽ പ്രദേശ് സംസ്ഥാനങ്ങളും സമാന ആവശ്യങ്ങളുമായി സമീപിച്ചിട്ടുണ്ടെന്നും അദ്ദേഹം കൂട്ടിച്ചേർത്തു. തന്റെ അനുഭവപരിചയം പ്രയോജനപ്പെടുമെന്നാണ് ആ സംസ്ഥാനങ്ങൾ വ്യക്തമാക്കിയതെന്നും അദ്ദേഹം പറഞ്ഞു.
അതേസമയം, സോഷ്യൽ മീഡിയ ട്രോളുകളെ കുറിച്ചും കെ.വി. തോമസ് പ്രതികരിച്ചു. “ട്രോളുകൾ ഞാൻ കാര്യമാക്കുന്നില്ല. തിരുതതോമയെന്ന് എന്നെ വിളിക്കുന്നുണ്ട്. അതിൽ ഒരു വിഷമവുമില്ല ഞാനൊരു മത്സ്യത്തൊഴിലാളിയാണ്. തന്നെ മാന്തി സുഖിക്കുന്നവർ സുഖിക്കട്ടെ. ട്രോളുകൾ നോക്കി ജീവിക്കാനാവില്ല. മകളോടാണ് അവ നോക്കാൻ പറഞ്ഞിട്ടുള്ളത്,” എന്നാണ് അദ്ദേഹത്തിന്റെ പ്രതികരണം.
