പരാതിപ്പെടാന് മെനക്കെട്ടില്ല; കേസിനുപോയി വര്ഷങ്ങള് കളയാനും ശ്രമിച്ചില്ല; പെണ്കുട്ടിയോട് അശ്ലീല പരാമര്ശം നടത്തിയ യുവാവിന്റെ തല അടിച്ചു പൊട്ടിച്ച് ആണ്സുഹൃത്ത്; ആര്ക്കും പരാതിയില്ലാത്തതിനാല് കേസില്ല; സംഭവം തിരുവല്ലയില്
ചങ്ങനാശേരി; തന്നോട് അശ്ലീല പരാമര്ശം നടത്തിയ യുവാവിനെക്കുറിച്ച് പോലീസില് പരാതിപ്പെടാനോ കേസുകൊടുക്കാനോ ഒന്നും ആ പെണ്കുട്ടി നിന്നില്ല. തന്നോട് അശ്ലീല വര്ത്തമാനം പറഞ്ഞ അവനെക്കുറിച്ച് നേരെ ഫോണ് ചെയ്ത്് ആണ്സുഹൃത്തിനോട് പറഞ്ഞു. കേട്ടമാത്രയില് പാഞ്ഞെത്തി അവള്ക്കൊപ്പം നിന്നവന് ആ അശ്ലീലവീരനെ തല്ലി. തല തല്ലിപ്പൊട്ടിച്ചു. ആര്ക്കും പരാതിയില്ലാത്തതിനാല് പോലീസ് കേസെടുത്തിട്ടുമില്ല. തിരുവല്ലയിലാണ് സംഭവം.
ചങ്ങനാശ്ശേരി സ്വദേശി 27 വയസുകാരന് വിഷ്ണുവിനാണ് പരിക്കേറ്റത്. തിരുവല്ല കെഎസ്ആര്ടിസി സ്റ്റാന്ഡില് ബസ് കാത്തുനിന്ന പെണ്കുട്ടിയോട് ആണ് വിഷ്ണു അശ്ലീല പരാമര്ശം നടത്തിയത്.
രാവിലെ 10 മണിയോടെയാണ് സംഭവം. പെണ്കുട്ടി കെഎസ്ആര്ടിസി സ്റ്റാന്ഡില് ബസ് കാത്തുനില്ക്കുകയായിരുന്നു. പെണ്കുട്ടിയുടെ അടുത്ത് എത്തിയ വിഷ്ണു മോശം പദപ്രയോഗം നടത്തി. ഭയന്ന് പോയ പെണ്കുട്ടി ഉടന് തന്റെ ആണ് സുഹൃത്തിനെ ഫോണില് വിളിച്ചു വിവരമറിയിച്ചു. സ്ഥലത്തെത്തിയ പെണ്കുട്ടിയുടെ ആണ് സുഹൃത്ത് വിഷ്ണുവുമായി വാക്ക് തര്ക്കത്തില് ഏര്പ്പെട്ടു.
ഇതിനിടെ കയ്യില് കരുതിയിരുന്ന ചങ്ങല ഉപയോഗിച്ച് വിഷ്ണു പെണ്കുട്ടിയുടെ ആണ് സുഹൃത്തിനെ ആക്രമിക്കാന് ശ്രമിച്ചു. ചങ്ങല പിടിച്ചുവാങ്ങി പെണ്കുട്ടിയുടെ സുഹൃത്ത് വിഷ്ണുവിന്റെ തല അടിച്ചു പൊട്ടിച്ചു. പോലീസും നാട്ടുകാരും എത്തിയാണ് രംഗം ശാന്തമാക്കിയത്. പെണ്കുട്ടിയുടെ ആണ് സുഹൃത്തിനോട് കാണിച്ചു തരാം എന്നും നിന്നെ സ്കെച്ച് ചെയ്തിട്ടുണ്ടെന്നും വിഷ്ണു ഭീഷണിപ്പെടുത്തുകയും ചെയ്തു. ആര്ക്കും പരാതിയില്ലാത്തതിനാല് പോലീസ് കേസെടുത്തില്ല. ഇരു കൂട്ടരെയും സ്റ്റേഷനിലേക്ക് വിളിച്ചു വരുത്തിയിരുന്നു.
