ഇതാ ഇതാണ് ഹരിയാനയിലെ വോട്ടറായ ആ ബ്രസീലിയന് മോഡല്: ഇന്ത്യന് രാഷ്ട്രീയവുമായി യാതൊരു ബന്ധവുമില്ലെന്നും അനുവാദമില്ലാതെയാണ് ചിത്രം ഉപയോഗിച്ചിരിക്കുന്നതെന്നും ബ്രസീലിയന് മോഡല്: ഇന്ത്യയിലെ ജനങ്ങളെ വളരെയധികം ഇഷ്ടപ്പെടുന്നുവെന്നും ബ്രസീലിയന് മോഡല് ലാരിസ
ന്യൂഡല്ഹി: ഹരിയാനയിലെ വോട്ടര്പട്ടികയില് ഇടം നേടിയ ബ്രസീലിയന് മോഡല് സോഷ്യല് മീഡിയ വഴി തന്റെ അമ്പരപ്പും ഞെട്ടലും പങ്കിട്ട് അന്തം വിട്ടിരിക്കുന്നു.
ഹരിയാനയില് വോട്ടര് പട്ടികയില് വ്യാപകമായ കൊള്ള നടന്നതിനു തെളിവായി പ്രതിപക്ഷ നേതാവ് രാഹുല് ഗാന്ധി പരാമര്ശിച്ച ബ്രസീലിയന് മോഡല് ആരാണ്, ഇത് എ ഐ ചിത്രമാണോ തുടങ്ങിയ ചോദ്യങ്ങള് ഉയരുമ്പോഴാണ് സാക്ഷാല് മോഡല് അങ്ങ് ബ്രസീലില് നിന്നും സോഷ്യല്മീഡിയ വഴി പ്രത്യക്ഷപ്പെട്ടിരിക്കുന്നത്.
ബ്രസീലിയന് മോഡല് ലാരിസയാണ് ഹരിയാനയിലെ ആ വോട്ടര്.ഇന്സ്റ്റഗ്രാമിലടക്കം ലക്ഷകണക്കിനുപേര് ഫോളോവേഴ്സുള്ള ബ്രസിലീയന് മോഡലാണ് ലാരിസ.
തനിക്ക് ഒരു തമാശപറയാനുണ്ടെന്ന് ആമുഖമായി പറഞ്ഞുകൊണ്ടാണ് ലാരിസ തന്റെ വിഡിയോ തുടങ്ങുന്നത്. തന്റെ പഴയൊരു ചിത്രം ഇന്ത്യയിലെ വോട്ടെടുപ്പ് പ്രക്രിയയില് ഉപയോഗിച്ചുവെന്നും ഇത് വിചിത്രമാണെന്നുമായിരുന്നു മോഡലിന്റെ വാക്കുകള്.
ഇന്ത്യന് രാഷ്ട്രീയവുമായി എനിക്ക് യാതൊരു ബന്ധവുമില്ല. അനുവാദമില്ലാതെയാണ് ചിത്രം ഉപയോഗിച്ചിരിക്കുന്നത്. ഞാന് ഒരിക്കലും ഇന്ത്യയില് പോയിട്ടില്ല. എന്റെ ഫോട്ടോ ഉപയോഗിച്ച് ഇന്ത്യയില് രാഷ്ട്രീയ പാര്ട്ടികള് പരസ്പരം പോരടിക്കുന്നു. തട്ടിപ്പിനെക്കുറിച്ച് വിശ്വസിക്കാനാകുന്നില്ല. ഇതു കണ്ട് എല്ലാവരും ചിരിക്കുകയാണ് – അമ്പരപ്പും അത്ഭുതവും ചിരിയും ഞെട്ടലും വിട്ടുമാറാതെ ലാരിസ പറയുന്നു. താന് ഇന്ത്യയിലെ ജനങ്ങളെ വളരെയധികം ഇഷ്ടപ്പെടുന്നുവെന്നും ഈ ബ്രസീലിയന് മോഡല് സന്തോഷത്തോടെ പറയുന്നു.
കോണ്ഗ്രസ് നേതാവ് സുപ്രിയ ശ്രീനേറ്റാണ് ബ്രസീലിയന് മോഡലിന്റെ പ്രതികരണം അടങ്ങിയ വിഡിയോ സന്ദേശം എക്സില് പങ്കുവെച്ചത്. ഹരിയാനയില് സ്വീറ്റി, സരസ്വതി, സീമ എന്നിങ്ങനെ പല പേരുകളിലായിട്ടായിരുന്നു ലാരിസയുടെ ചിത്രം വച്ച് 22 കള്ളവോട്ടുകള് നടന്നത്.
കോണ്ഗ്രസിന്റെ വന്വിജയം തടയാന് ബ്രസീലിയന് മോഡലിന്റെ ചിത്രമടക്കം വോട്ടര്പട്ടികയില്പ്പെടുത്തിയുള്ള ഓപ്പറേഷന് സര്ക്കാര് ചോരിയാണ് ഹരിയാനയില് നടന്നതെന്നും 2024ലെ ഹരിയാന നിയമസഭാ തിരഞ്ഞെടുപ്പില് 25 ലക്ഷം വ്യാജവോട്ടുകള് രേഖപ്പെടുത്തിയെന്ന് തെളിവുകള് സഹിതം തന്റെ സംഘം കണ്ടെത്തിയെന്നുമാണ് രാഹുല് ഗാന്ധി കഴിഞ്ഞ ദിവസം വാര്ത്താസമ്മേളനം നടത്തി അവകാശപ്പെട്ടത്. ആ വാര്ത്താസമ്മേളനത്തില് ബ്രസീലിയന് മോഡലിന്റെ ചിത്രവും തെളിവായി രാഹുല് പ്രദര്ശിപ്പിച്ചിരുന്നു.
