ചെന്നൈ: ഇഞ്ചമ്പാക്കത്ത് ഒന്നരമാസം പ്രായമുള്ള പെണ്‍കുഞ്ഞിനെ വീടിന്റെ ബാല്‍ക്കണിയില്‍നിന്ന് എറിഞ്ഞു കൊലപ്പെടുത്തിയെന്ന കേസില്‍ മാതാവ് അറസ്റ്റില്‍. ഇരട്ടക്കുട്ടികളിലൊരാള്‍ ജന്മനാ അസുഖ ബാധിതയാണെന്നും കടുത്ത വിഷമത്തിലാണ് ഇങ്ങനെ ചെയ്തതെന്നും മാതാവ് ഭാരതി (30) മൊഴി നല്‍കി. സ്വകാര്യ വാഹന സ്ഥാപനത്തില്‍ ഡ്രൈവറായ അരുണിനും ഭാരതിക്കും 43 ദിവസം മുന്‍പാണ് ഇരട്ടക്കുട്ടികളുണ്ടായത്.
കുട്ടികളില്‍ ഒരാളെ കാണാനില്ലെന്ന ഭാരതിയുടെ നിലവിളി കേട്ടെത്തിയ ബന്ധുക്കള്‍ ഏറെ തിരഞ്ഞിട്ടും കുട്ടിയെ കണ്ടെത്താനായില്ല. ഇതോടെ നീലാങ്കര പൊലീസില്‍ വിവരം അറിയിച്ചു. പൊലീസെത്തി നടത്തിയ തിരച്ചിലില്‍ വീടിനടുത്തുള്ള ഒഴിഞ്ഞ പറമ്പില്‍ കിടന്ന ബാഗില്‍ നിന്ന് കുട്ടിയുടെ മൃതദേഹം കണ്ടെത്തി.
മൃതദേഹം പോസ്റ്റ്‌മോര്‍ട്ടത്തിന് റോയപ്പേട്ട സര്‍ക്കാര്‍ ആശുപത്രിയിലേക്ക് അയച്ച പൊലീസ്, കുടുംബാംഗങ്ങളെ ചോദ്യം ചെയ്തതോടെയാണു മാതാവ് കുറ്റം സമ്മതിച്ചത്. വീട്ടില്‍ ആരും ഇല്ലാതിരുന്നപ്പോള്‍, കുഞ്ഞിനെ ബാഗിലാക്കി ബാല്‍ക്കണിയില്‍ നിന്ന് എറിഞ്ഞെന്നു ഭാരതി വെളിപ്പെടുത്തി. അന്വേഷണം തുടരുകയാണെന്നും പോസ്റ്റ്‌മോര്‍ട്ടം റിപ്പോര്‍ട്ട് വന്നതിനുശേഷം മാത്രമേ മരണകാരണം സ്ഥിരീകരിക്കാന്‍ കഴിയൂവെന്നും പൊലീസ് പറഞ്ഞു.
