തിരുവനന്തപുരം: നിലമ്പൂരില് എല്ഡിഎഫുമായി ഇടഞ്ഞ് എംഎല്എ സ്ഥാനം രാജിവെച്ച് ഉപതെരഞ്ഞെടുപ്പിന് വഴിയൊരുക്കിയ പിവി അന്വര് യുഡിഎഫുമായി തെറ്റിയതിന് പിന്നില് അടുത്ത നിയമസഭ തെരഞ്ഞെടുപ്പിലെ സീറ്റിനെച്ചൊല്ലിയുള്ള തര്ക്കമെന്ന് സൂചന. യുഡിഎഫ് സ്ഥാനാര്ത്ഥിയായി ആര്യാടന് ഷൗക്കത്തിനെ തീരുമാനിച്ചതും തൃണമൂല് കോണ്ഗ്രസിനെ യുഡിഎഫില് ഉള്പ്പെടുത്തുന്നതില് ഉറപ്പു നല്കാത്തതും നിലമ്പൂര് തെരഞ്ഞെടുപ്പില് അന്വറിനെ പ്രകോപിപ്പിച്ചിരുന്നു. എന്നാല്, ഇപ്പോള് പുറത്തുവരുന്ന വാര്ത്തകള് മറ്റൊരു ഉള്ളറക്കഥ കൂടി വ്യക്തമാക്കുന്നതാണ്.
2026 ലെ നിയമസഭാ തിരഞ്ഞെടുപ്പില് തൃണമൂല് കോണ്ഗ്രസിന് ലഭിക്കേണ്ട സീറ്റിനെച്ചൊല്ലിയായിരുന്നു അന്വറിന്റെ വിയോജിപ്പ്. ”മുസ്ലിം ലീഗ് സീറ്റായ കൊടുവള്ളിയാണ് അന്വര് ആഗ്രഹിച്ചത്,” കെപിസിസി ഭാരവാഹിയായ നേതാവ് പറഞ്ഞു. ”എന്നാല്, കോണ്ഗ്രസുമായുള്ള കാര്യങ്ങള് ഒത്തുതീര്പ്പാക്കാന് അന്വറിനോട് ലീഗ് ആവശ്യപ്പെട്ടു. ഇത് ഒരിടത്തും എത്തില്ലെന്ന് ഞങ്ങള്ക്ക് തോന്നി. ഒരു പാര്ട്ടി മുന്നണിയുടെ ഭാഗമാകുന്നതിന് മുമ്പ് തന്നെ സീറ്റ് വിഭജനം ചര്ച്ച ചെയ്യാനോ രേഖാമൂലം ഉറപ്പ് നല്കാനോ യുഡിഎഫിന് എങ്ങനെ കഴിയും?” -അദ്ദേഹം ചോദിച്ചു.
എന്നാല്, യുഡിഎഫിലെ ഉന്നത നേതാക്കളുടെ അഭിപ്രായത്തില്, സ്ഥിതി കൂടുതല് വഷളാക്കിയത് കോഴിക്കോട് ഡിസിസി പ്രസിഡന്റ് കെ പ്രവീണ് കുമാറിന്റെ ഇടപെടലാണ്. പ്രതിസന്ധി പരിഹരിക്കാന്, കോഴിക്കോട് ജില്ലയില് നിന്ന് ഒരു നിയമസഭാ സീറ്റ് നല്കാനുള്ള സാധ്യത കോണ്ഗ്രസ് പരിഗണിക്കാമെന്ന് പ്രവീണ് അന്വറിനോട് പറഞ്ഞതായി റിപ്പോര്ട്ടുണ്ട്. ”കെപിസിസിയുടെ സമ്മതമില്ലാതെ എടുത്ത നീക്കമായിരുന്നു ഇത്,” ഒരു മുതിര്ന്ന യുഡിഎഫ് നേതാവ് പറഞ്ഞു. ”ഇത് നിര്ണായകമായി. ഒരു സീറ്റിനായി രേഖാമൂലമുള്ള ഉറപ്പിനായി അന്വര് വിലപേശല് ആരംഭിച്ചു,” അദ്ദേഹം പറഞ്ഞു.
അതേസമയം, അന്വറിന്റെ ആരോപണങ്ങള് കോണ്ഗ്രസ് നേതൃത്വം തള്ളിക്കളയുന്നു. കോഴിക്കോട്ട് എഐസിസി ജനറല് സെക്രട്ടറി കെസി വേണുഗോപാലുമായി നടത്താന് നിശ്ചയിച്ചിരുന്ന കൂടിക്കാഴ്ച അട്ടിമറിച്ചത് പ്രതിപക്ഷ നേതാവ് വിഡി സതീശനാണെന്ന് അന്വര് ആരോപിച്ചിരുന്നു. വേണുഗോപാല് ബന്ധപ്പെടാന് ആവര്ത്തിച്ച് ശ്രമിച്ചിട്ടും അന്വര് പ്രതികരിച്ചില്ലെന്ന് കോണ്ഗ്രസുമായി ബന്ധപ്പെട്ട വൃത്തങ്ങള് പറഞ്ഞു. ”പല മുതിര്ന്ന നേതാക്കളും അന്വറുമായി ചര്ച്ചകള് നടത്തി. എന്നാല്, അദ്ദേഹം സ്വീകരിച്ച നിലപാടുകളിലെ പൊരുത്തക്കേട് ആ ചര്ച്ചകള് മുന്നോട്ട് പോകുന്നതിനു തടസ്സമായി. അദ്ദേഹം യുഡിഎഫ് സ്ഥാനാര്ത്ഥിയെ കളങ്കപ്പെടുത്തുകയായിരുന്നു. നിലമ്പൂരില് മത്സരിക്കുകയോ വിജയിക്കാവുന്ന ഒരു സീറ്റ് നേടുകയോ ചെയ്യുക എന്നതാണ് അദ്ദേഹത്തിന്റെ യഥാര്ത്ഥ ഉദ്ദേശ്യമെന്ന് ഇത് വ്യക്തമാക്കി. അതിനാല്, തല്ക്കാലം ആ വാതില് അടയ്ക്കാന് ഞങ്ങള് തീരുമാനിച്ചു. യുഡിഎഫ് ചെയര്മാനെ അന്വര് മോശമായി കൈകാര്യം ചെയ്യുമ്പോള് അദ്ദേഹവുമായി ഒരു ഒത്തുതീര്പ്പിനും സാധ്യതയില്ല, ”ഒരു കോണ്ഗ്രസ് നേതാവ് പറഞ്ഞു.
അതേസമയം, ഈ തര്ക്കങ്ങള് മൂലം മത്സര രംഗത്ത് എല്ഡിഎഫിനെതിരെ തുടക്കത്തിലുണ്ടായിരുന്ന മുന്തൂക്കം നഷ്ടപ്പെട്ടതായാണ് പല യുഡിഎഫ്, കോണ്ഗ്രസ് നേതാക്കളുടെയും അഭിപ്രായം. അന്വര് സംഭവം കോണ്ഗ്രസിന്റെ പ്രതിച്ഛായയെ മോശമായി ബാധിച്ചുവെന്നും അവര് ആശങ്കപ്പെടുന്നു. ‘സതീശനും നിലമ്പൂരിലെ പാര്ട്ടി ചുമതലയുള്ള എപി അനില് കുമാറും സ്വീകരിച്ച നിലപാട് ശരിയായിരുന്നു. അന്വറിന്റെ സമ്മര്ദ്ദത്തിന് അവര് വഴങ്ങിയില്ല,’ ഒരു കെപിസിസി ഭാരവാഹി പറഞ്ഞു.
അന്വറിനെ സംബന്ധിച്ച് വരാനിരിക്കുന്ന ദിവസങ്ങള് രാഷ്ട്രീയ അതിജീവനത്തിന് നിര്ണായകമായിരിക്കും, ജീവിതത്തിലെ ഏറ്റവും വലിയ രാഷ്ട്രീയ പ്രതിസന്ധിയാണ് അദ്ദേഹം നേരിടുന്നത്. നേരത്തെ കോണ്ഗ്രസ് വിട്ടപ്പോള് അന്വറിന് ഡിഐസി എന്ന പാര്ട്ടി, അതിന് ശേഷം സിപിഎം പിന്നീട് കെപിസിസി പ്രസിഡന്റായിരുന്ന കെ. സുധാകരന് എന്നിവരുടെ പിന്തുണ ഉണ്ടായിരുന്നു. ഇപ്പോള് ആ സാഹചര്യമല്ല നിലവിലുള്ളത്.
