എന്താണ് ഇന്ത്യ തകര്ത്ത ചൈനീസ് നിര്മിത എച്ച്ക്യു-16; വൈദ്യുത കാന്തിക ഇടപെടലുകളെ അതിജീവിക്കും; ഏതു കാലാവസ്ഥയിലും പ്രതിരോധം; യൂണിറ്റ് ഒന്നിന് 1872.5 കോടി പാക് രൂപ ചെലവ്; സ്റ്റോക്ക് ഹോം ആയുധ കൈമാറ്റ റിപ്പോര്ട്ടിലെ വിവരങ്ങള് ഇങ്ങനെ
ന്യൂഡല്ഹി: ഇന്നലെ രാത്രി വിവിധ ഇന്ത്യന് സൈനിക കേന്ദ്രങ്ങളെ ആക്രമിക്കാന് പാകിസ്ഥാന് നടത്തിയ ശ്രമങ്ങള്ക്ക് മറുപടിയായി ലാഹോറിലെ പാകിസ്ഥാന് സൈനിക താവളത്തില് വിന്യസിച്ചിരുന്ന വ്യോമ പ്രതിരോധ സംവിധാനം ഇന്ത്യന് സൈന്യം തകര്ത്തു. ഓപ്പണ് സോഴ്സ് ഡാറ്റ വിശകലനം വ്യക്തമാക്കുന്നത് ഈ സംവിധാനം ചൈനയില് നിന്നുള്ള എച്ച്ക്യു -16 ആണെന്നാണ്. പാകിസ്താനില്നിന്നുള്ള ഔദ്യോഗിക സ്ഥിരീകരണം വൈകുന്നതിനാല് ഇക്കാര്യത്തില് രാജ്യാന്ത മാധ്യമങ്ങളും വ്യക്തത വരുത്തിയിട്ടില്ല.
വ്യാഴാഴ്ച ഡ്രോണുകളും മിസൈലുകളും ഉപയോഗിച്ച് ഇന്ത്യന് സൈന്യം പാകിസ്ഥാനിലെ നിരവധി കേന്ദ്രങ്ങള് ആക്രമിച്ചതായി സര്ക്കാര് പറയുന്നു. രണ്ടാഴ്ച മുമ്പ് കശ്മീരിലെ പഹല്ഗാമില് നടന്ന ഭീകരാക്രമണത്തില് 26 വിനോദസഞ്ചാരികള് കൊല്ലപ്പെട്ടതിന് പ്രതികാരമായി ബുധനാഴ്ച പുലര്ച്ചെ ഇന്ത്യന് സൈന്യം പാകിസ്ഥാനിലെ ഒമ്പത് ഭീകര കേന്ദ്രങ്ങളാണ് ആക്രമിച്ചത്.
എസ്ഐപിഎആര്ഐ (സ്റ്റോക്ക്ഹോം ഇന്റര്നാഷണല് പീസ് റിസര്ച്ച് ഇന്സ്റ്റിറ്റ്യൂട്ട്) ആയുധ കൈമാറ്റ ഡാറ്റാബേസ് പ്രകാരം, 2013 നും 2015 നും ഇടയില് രണ്ട് വ്യത്യസ്ത ഓര്ഡറുകളിലായാണ് ചൈനയുടെ എല്വൈ 80 മീഡിയം-റേഞ്ച് സര്ഫേസ്-ടു-എയര് മിസൈലിന്റെ (എസ്എഎം) കയറ്റുമതി വകഭേദമായ എച്ച് ക്യൂ-16 പാകിസ്ഥാന് സ്വന്തമാക്കിയത്.
599 മില്യണ് യുഎസ് ഡോളറിനാണ് വാങ്ങിയത്. അതായത് ഓരോ യൂണിറ്റിനും 66.56 മില്യണ് യുഎസ് ഡോളര്. ഇന്നത്തെ കറന്സി വിനിമയ നിരക്ക് അനുസരിച്ച്, പാകിസ്താന് ഓരോ യൂണിറ്റിനും ഏകദേശം 1872.5 കോടി പാകിസ്താന് രൂപ ചെലവഴിച്ചു എന്നാണ് അര്ത്ഥമാക്കുന്നത്.
പാകിസ്താന് സായുധ സേനയുടെ മാസികയായ ഹിലാല് പറയുന്നതനുസരിച്ച്, എച്ച്ക്യു -16 താഴ്ന്ന മുതല് ഇടത്തരം ഉയരത്തിലുള്ള പ്രതിരോധം നല്കുന്നു. ഇതിന് ഏകദേശം 40 കിലോമീറ്റര് ദൂരപരിധിയുണ്ട്. എച്ച്ക്യു -16 മിസൈലിന് 400 മുതല് 10,000 മീറ്റര് വരെ ഉയരത്തിലുള്ള ലക്ഷ്യങ്ങളെ ആക്രമിക്കാന് കഴിയും.
പാകിസ്താന് സൈന്യം 2017 ല് എച്ച്ക്യു -16 ഔദ്യോഗികമായി ഉള്പ്പെടുത്തി, 2018 ജനുവരിയില് ആദ്യത്തെ ലൈവ് ഫയറിംഗ് നടത്തി.
എയര്ഫീല്ഡുകള്, പാലങ്ങള്, കമാന്ഡ് പോസ്റ്റുകള്, സൈനികരുടെ കേന്ദ്രീകരണം, മറ്റ് ഉയര്ന്ന മൂല്യമുള്ള ആസ്തികള് എന്നിവ പോലുള്ള സ്റ്റേഷണറി ആസ്തികള് സംരക്ഷിക്കുന്നതിനാണ് എച്ച് ക്യൂ-16 പ്രധാനമായും ഉപയോഗിക്കുന്നത്. എച്ച് ക്യൂ-16 ന്റെ ബറ്റാലിയനില് പന്ത്രണ്ട് ലോഞ്ചര് വാഹനങ്ങള് (ഓരോ ബാറ്ററിയിലും നാല്), ഒരു കമാന്ഡ് ആന്ഡ് കണ്ട്രോള് വെഹിക്കിള്, മൂന്ന് ട്രാക്കിംഗ് ആന്ഡ് ഗൈഡന്സ് റഡാര് വാഹനങ്ങള്, ഒരു ടാര്ഗെറ്റ് സെര്ച്ചിംഗ് റഡാര് വെഹിക്കിള്, നിരവധി മിസൈല് ട്രാന്സ്പോര്ട്ട് ആന്ഡ് റീലോഡിംഗ് വാഹനങ്ങള്, പവര് സപ്ലൈ വാഹനങ്ങള് എന്നിവ ഉള്പ്പെടുന്നുവെന്ന് റിപ്പോര്ട്ടുകള് പറയുന്നു.
2011 സെപ്റ്റംബറില് ചൈനീസ് സായുധ സേനയിലാണ് പ്രതിരോധ സംവിധാനം ആദ്യമായി അവതരിപ്പിച്ചത്. യുഎസ് സൈന്യത്തിന്റെ ഓപ്പറേഷണല് എന്വയോണ്മെന്റ് ഡാറ്റ ഇന്റഗ്രേഷന് നെറ്റ്വര്ക്ക് (ഒഡിഐഎന്) അനുസരിച്ച്, ശക്തമായ വൈദ്യുതകാന്തിക ഇടപെടല് പരിതസ്ഥിതിയിലും എല്ലാ കാലാവസ്ഥയിലും എച്ച് ക്യൂ-16 പ്രവര്ത്തിപ്പിക്കാന് കഴിയും.
