ഡിഎംകെയെ പുറത്താക്കുന്നതുവരെ ചെരുപ്പണിയില്ലെന്ന ശപഥം പിന്വലിച്ചു; ‘അണ്ണന്’ പറഞ്ഞതുകൊണ്ടെന്ന് അണ്ണാമലൈ! പുതിയ അധ്യക്ഷന് ചുമതലയേറ്റ ചടങ്ങില് പുത്തന് ചെരുപ്പിട്ടു
ചെന്നൈ: ഡിഎംകെയെ അധികാരത്തില്നിന്നു പുറത്താക്കും വരെ ചെരിപ്പണിയില്ലെന്ന ശപഥം തമിഴ്നാട് മുന് അധ്യക്ഷന് കെ.അണ്ണാമലൈ പിന്വലിച്ചു. ബിജെപിയുടെ പുതിയ സംസ്ഥാന അധ്യക്ഷനായി ചുമതലയേറ്റ നൈനാര് നാഗേന്ദ്രന്റെ അഭ്യര്ഥനയെ തുടര്ന്നാണിത്. നൈനാര് ചുമതലയേറ്റ ചടങ്ങു നടന്ന വേദിയില് പുതിയ ചെരിപ്പ് അണ്ണാമലൈ ധരിച്ചു.
2024 ഡിസംബര് അവസാനമാണ് അണ്ണാമലൈ ശപഥം ചെയ്തത്. ഡിഎംകെയെ ഭരണത്തില് നിന്ന് താഴെ ഇറക്കിയ ശേഷം മാത്രമേ താനിനി ചെരുപ്പിടുകയുള്ളൂവെന്ന് വാര്ത്താ സമ്മേളനത്തിലായിരുന്നു അദ്ദേഹം പ്രഖ്യാപിച്ചത്. വാര്ത്താ സമ്മേളനത്തിനിടയില് തന്നെ അണ്ണാമലൈ, ചെരുപ്പ് ഊരിമാറ്റുകയും ചെയ്തിരുന്നു.
എന്ഡിഎ വിട്ട എഐഎഡിഎംകെ അദ്ദേഹത്തെ അധ്യക്ഷ സ്ഥാനത്ത് നിന്നും അണ്ണാമലൈയെ മാറ്റുമെന്ന ഉറപ്പ് ലഭിച്ചതോടെ മുന്നണിയിലേക്ക് തിരിച്ചുവന്നിരുന്നു. അണ്ണാമലൈയുമായുള്ള അഭിപ്രായ ഭിന്നതയെ തുടര്ന്നാണ് നേരത്തെ ഇപിഎസിന്റെ നേതൃത്വത്തില് അണ്ണാ ഡിഎംകെ എന്ഡിഎ മുന്നണി വിട്ടത്.
