തിരുവനന്തപുരം: മദ്യലഹരിയില് നൃത്തം ചെയ്തത് തടഞ്ഞതിന് ജയില് ഉദ്യോഗസ്ഥന്റെ മൂക്കിടിച്ച് തകര്ത്തു. പൂജപ്പുര സെന്ട്രല് ജയിലിലെ ഡപ്യൂട്ടി പ്രിസണ് ഓഫീസര് എസ്.എല്.അനീഷിനാണ് മര്ദനമേറ്റത്. സംഭവത്തില് കുപ്രസിദ്ധ കുറ്റവാളി പന്തം ജയനും സംഘവും പിടിയിലായി. പരുക്കേറ്റ ഡപ്യൂട്ടി പ്രിസണ് ഓഫിസര് സ്വകാര്യ ആശുപത്രിയില് ചികിത്സയിലാണ്. ഞായറാഴ്ച രാത്രി പൂജപ്പുര ജയിലിന്റെ സമീപമുള്ള ഗണപതി ക്ഷേത്രത്തിലായിരുന്നു സംഭവം. ജഗതി സ്വദേശി പന്തം ജയന് എന്നുവിളിക്കുന്ന ജയന് (42), ജയന്റെ സഹോദരന് പ്രദീപ് (46), ദിനേശ് (30) എന്നിവരാണ് അറസ്റ്റിലായത്.
ക്ഷേത്രോത്സവത്തോട് അനുബന്ധിച്ച് ഗാനമേള നടക്കുന്നതിനിടെ പന്തം ജയന് ഉള്പ്പെടുന്ന സംഘമെത്തുകയും മദ്യലഹരിയില് ഡാന്സ് കളിക്കുകയും ചെയ്തു. ഇതു തടഞ്ഞ അനീഷിന്റെ മുഖത്ത് ജയന് തലകൊണ്ട് ശക്തിയായി ഇടിക്കുകയായിരുന്നു. ഇടിയുടെ ആഘാതത്തില് അനീഷിന്റെ മൂക്കിന്റെ അസ്ഥി തകര്ന്നു. അറസ്റ്റിലായ പ്രതികളെല്ലാം നേരത്തെ വിവിധ കേസുകളില് പൂജപ്പുരയില് തടവില് കഴിഞ്ഞിട്ടുണ്ട്.
