കോഴിക്കോട്: കുറ്റ്യാടി സര്ക്കാര് ഹയര്സെക്കന്ഡറി സ്കൂളില് പ്ലസ് വണ് വിദ്യാര്ഥിയുടെ പല്ല് അടിച്ചുകൊഴിച്ച് പ്ലസ് ടു വിദ്യാര്ഥികള്. സംഭവത്തില് 12 സീനിയര് വിദ്യാര്ഥികള്ക്കെതിരെ ജാമ്യമില്ലാ വകുപ്പ് പ്രകാരം പൊലീസ് കേസെടുത്തു. ചൊവാഴ്ച സ്കൂള് വിട്ട് വീട്ടിലേക്ക് പോകുന്ന വഴി ഇരുപതോളം സീനിയര് വിദ്യാര്ഥികള് ചേര്ന്ന് മര്ദിച്ചുവെന്നാണ് പ്ലസ് വണ് വിദ്യാര്ഥി ഇഷാമിന്റെ ആരോപണം.
പരുക്കേറ്റ ഇഷാമിനെ കോഴിക്കോട് മെഡിക്കല് കോളജ് ആശുപത്രിയില് പ്രവേശിപ്പിച്ചു. കുന്നുമ്മല് ഉപജില്ലാ സ്കൂള് കലോത്സവത്തിലെ കോല്ക്കളിയില് മത്സരിച്ച പ്ലസ് വണ് വിദ്യാര്ഥികള് അവരുടെ വീഡിയോ ഇന്സ്റ്റഗ്രാമില് റീലായി പോസ്റ്റ് ചെയ്തതാണ് ആക്രമണത്തിനിടയാക്കിയത്. ജൂനിയര് വിദ്യാര്ഥികള് അവരുടെ അക്കൗണ്ടില് പോസ്റ്റ് ചെയ്ത റീലിനു കാഴ്ചക്കാര് കൂടിയതോടെ ഇത് പിന്വലിക്കാര് സീനിയര് വിദ്യാര്ഥികള് ആവശ്യപ്പെട്ടെങ്കിലും ജൂനിയേഴ്സ് തയാറായില്ല.
രണ്ടു ദിവസംമുന്പ് ഈ വിഷയത്തില് വിദ്യാര്ഥികള് സ്കൂള് ഗ്രൗണ്ടില് വച്ച് വഴക്കിട്ടിരുന്നു. അധ്യാപകര് ഇടപെട്ടാണ് അന്ന് സംഘര്ഷം ഒഴിവാക്കിയത്. ആക്രമണവുമായി ബന്ധപ്പെട്ട് കുറ്റ്യാടി സര്ക്കാര് ഹയര് സെക്കന്ഡറി സ്കൂളിലെ 14 വിദ്യാര്ഥികളെ അന്വേഷണ വിധേയമായി സ്കൂളില്നിന്നും മാറ്റി നിര്ത്താന് തീരുമാനമായി.
