കോട്ടയം: ചേർത്തല–കുമരകം റൂട്ടിൽ കൈപ്പുഴ മുട്ട് പാലത്തിനു താഴെ പുഴയിലേക്ക് കാർ മറിഞ്ഞ് 2 പേർ മരിച്ചു. ഒരു സ്ത്രീയുടെയും പുരുഷന്റെയും മൃതദേഹമാണ് കാറിൽ നിന്നു കിട്ടിയത്. ഇവർ മഹാരാഷ്ട്ര താനെ സ്വദേശികളാണെന്നാണ് വിവരം.
എറണാകുളം രജിസ്ട്രേഷനുള്ള റെൻ്റ് എ കാർ ആണ് അപകടത്തിൽ പെട്ടത്. മഹാരാഷ്ട്രയിൽനിന്ന് എറണാകുളത്തെത്തി കാർ വാടകയ്ക്ക് എടുത്ത് കുമരകത്തേക്ക് വന്നവരാകാം അപകടത്തിൽ പെട്ടതെന്നാണ് നിഗമനം. രാത്രി 9 മണിയോടെയാണ് സംഭവം.
കോട്ടയം ഭാഗത്തുനിന്നും വന്ന കാർ കൈപ്പുഴമുട്ട് പാലത്തിൻ്റെ സർവീസ് റോഡ് വഴി നേരെ പുഴയിലേക്ക് മറിയുകയായിരുന്നു. കാറിൻ്റെ ഉള്ളിൽ നിന്നും നിലവിളി ശബ്ദം കേട്ട് നാട്ടുകാർ ഓടിയെത്തിയപ്പോൾ കാർ വെള്ളത്തിൽ മുങ്ങി താണിരുന്നു. രക്ഷാപ്രവർത്തനത്തിൽ കാർ കണ്ടെത്തി കരയ്ക്കെത്തിക്കുകയും കാറിന്റെ ചില്ലുപൊട്ടിച്ച് ഇരുവരെയും പുറത്തെടുക്കുകയുമായിരുന്നു. ഇരുവരെയും കോട്ടയം മെഡിക്കൽ കോളജിലെത്തിച്ചെങ്കിലും മരണം സംഭവിക്കുകയായിരുന്നു.
ചെളി നിറഞ്ഞ നിലയിലാണ് കാർ കണ്ടെത്തിയത്. സായലി രാജേന്ദ്ര സർജേ എന്ന 27 കാരിയുടെ ആധാർകാർഡും കാറിൽ നിന്നും ലഭിച്ചു. പ്രദേശത്തെക്കുറിച്ച് കൃത്യമായ ധാരണയില്ലാതെ ഗൂഗിൾ മാപ്പ് നോക്കി യാത്ര ചെയ്തതാകാം അപകട കാരണമെന്നു പോലീസ് പറഞ്ഞു..
