കെ.ജി.എഫ് നായകൻ യാഷിന്റെ പുതിയ ചിത്രം ഗീതു മോഹന്‍ദാസ് സംവിധാനം ചെയ്യുന്നു. യാഷിന്റെ കരിയറിലെ പത്തൊന്‍പതാം ചിത്രമാണിത്.
കെ.ജി.എഫ് ഫ്രാഞ്ചൈസിയിലൂടെ പാന്‍ ഇന്ത്യന്‍ സൂപ്പര്‍താരമായി വളര്‍ന്ന നടനാണ് യാഷ്. 2022 ല്‍ റിലീസ് ചെയ്ത കെ.ജി.എഫ് രണ്ടാം ഭാഗത്തിന് ശേഷം യാഷിന്റേതായി പുതിയ ചിത്രങ്ങളൊന്നും പ്രഖ്യാപിച്ചിരുന്നില്ല. എന്നാല്‍ ആരാധകരെ ആവേശത്തിലാഴ്ത്തി ഇന്ന് യാഷിന്റെ പുതിയ ചിത്രത്തിന്റെ വിവരങ്ങള്‍ ഔദ്യോഗികമായി പുറത്തുവിട്ടു.
കഴിഞ്ഞ ഏപ്രില്‍ മുതലാണ് ഗീതുവിനൊപ്പം യാഷ് സിനിമ ചെയ്യുന്നുവെന്ന അഭ്യൂഹങ്ങള്‍ വന്നത്. ഗീതു പറഞ്ഞ കഥ യാഷിന് ഇഷ്ടമായെന്നും അന്ന് റിപ്പോര്‍ട്ടുകളായിരുന്നു.
”ഞാന്‍ എപ്പോഴും എന്റെ ആഖ്യാന ശൈലിയില്‍ പരീക്ഷണം നടത്തിയിട്ടുണ്ട്. ലയേഴ്സ് ഡൈസിനും മൂത്തോനും അന്താരാഷ്ട്ര തലത്തില്‍ നല്ല സ്വീകാര്യത ലഭിച്ചെങ്കിലും, എന്റെ രാജ്യത്ത് എന്റെ സ്വന്തം പ്രേക്ഷകരെ കണ്ടെത്താന്‍ ഞാന്‍ എപ്പോഴും കൊതിച്ചിരുന്നു. ആ ചിന്തയില്‍ നിന്നാണ് ഈ പദ്ധതി ഉടലെടുത്തത്. ഈ സിനിമ രണ്ട് വിപരീത ലോകങ്ങളുടെ സംയോജനമാണ്, കഥ പറയുന്നതിലെ സൗന്ദര്യശാസ്ത്രം കൂടിച്ചേര്‍ന്ന് ഞാന്‍ യാഷിനെ കണ്ടെത്തി. ഞാന്‍ മനസ്സില്‍ കണ്ട ഏറ്റവും മിടുക്കനായ ഒരാള്‍ ആണ് യാഷ്, ഞങ്ങളുടെ ടീം ഈ മാന്ത്രിക യാത്ര ആരംഭിക്കുന്നതില്‍ ആവേശത്തിലാണ് ഞാന്‍’
ഗീതു മോഹന്‍ദാസ് പറയുന്നു.
‘ഞങ്ങളുടെ ഏറ്റവും വലിയ പ്രോജക്റ്റിനായി റോക്കിംഗ് സ്റ്റാര്‍ യാഷുമായി സഹകരിക്കുന്നതില്‍ ഞങ്ങള്‍ക്ക് സന്തോഷമുണ്ട്. യഷും ഗീതുവും ശക്തമായ ആഖ്യാനത്തിലൂടെയും ബൃഹത്തായ ആക്ഷനിലൂടെയും ചലനാത്മകമായ ഒന്നില്‍ യാതൊരു മാറ്റവും വരുത്താത്തതിനാല്‍ ഇതിന് സമയമെടുത്തു. ഞങ്ങള്‍ നിര്‍മ്മിക്കുന്ന ഈ മികവുറ്റതും ഗംഭീരവുമായ ഈ സിനിമയ്ക്ക് ലോകം സാക്ഷ്യം വഹിക്കാന്‍ പോകുന്നു’
നിര്‍മാതാവ് ശ്രീ. വെങ്കട്ട് കെ നാരായണ പറഞ്ഞു.
ചിത്രത്തില്‍ മൂന്ന് നായികമാര്‍ ഉണ്ടായിരിക്കം. എന്നാല്‍ അവര്‍ ആരാണെന്ന വിവരം പുറത്തുവിട്ടിട്ടില്ല. സായ് പല്ലവിയായിരിക്കുമത്രേ അതിലൊരാള്‍.
മുന്‍ അഭിനേത്രിയായ ഗീതു മോഹന്‍ദാസ് ‘കേള്‍ക്കുന്നുണ്ടോ’ എന്ന ഹ്രസ്വ ചിത്രത്തിലൂടെയാണ് സംവിധാന രംഗത്ത് അരങ്ങേറ്റം കുറിച്ചത്. 2013 ല്‍ ലയേഴ്സ് ഡയസ്‌, 2019 ല്‍ മൂത്തോന്‍ എന്നീ ചിത്രങ്ങള്‍ സംവിധാനം ചെയ്തു. മികച്ച നടി, ഛായാഗ്രഹണം എന്നീ വിഭാഗങ്ങളില്‍ രണ്ട് ദേശീയ പുരസ്‌കാരങ്ങളാണ് ലയേഴ്സ് ഡയസിന് ലഭിച്ചത്. കൂടാതെ ഓസ്‌കറിനുള്ള ഇന്ത്യയുടെ ഔദ്യോഗിക നാമനര്‍ദ്ദേശവും ചിത്രത്തിന് ലഭിച്ചത്.
യാഷിന്റെ കരിയറിലെ പത്തൊന്‍പതാം ചിത്രമായ ഇത് കെവിഎന്‍ പ്രൊഡക്ഷന്‍സും മോണ്‍സ്റ്റര്‍ മൈന്‍ഡ് ക്രിയേഷന്‍സും ചേര്‍ന്നാണ് നിര്‍മിക്കുന്നത്. ചിത്രം 2025 ഏപ്രില്‍ 10 ന് ലോകമെമ്പാടും റിലീസ് ചെയ്യും.
