ഡീസലിന്റെയും സ്പെയര്‍ പാര്‍ട്സുകളുടെയും വിലവര്‍ധനയില്‍ ബസ് വ്യവസായം തന്നെ പ്രതിസന്ധി നേരിടുമ്ബോള്‍ കേവലം ഒരു ബസ് സര്‍വീസിന്റെ പേര് പറഞ്ഞു കോടതികളില്‍ കേസ് നടത്തിപ്പിനായി ഇത്രയും തുക ഒരാളുടെ പേരില്‍ മുടക്കുമ്ബോള്‍ ചെറിയൊരു സംശയം പോലും മനസ്സില്‍ തോന്നാത്ത വിധം അത്രയും നിഷ്കളങ്കരാണോ നിങ്ങള്‍..?
അതും പത്തു മുപ്പതു കൊല്ലം ബസ് വ്യവസായത്തില്‍ നിറഞ്ഞും നീന്തിയും നടന്നൊരാള്‍ സ്റ്റേജ് കാര്യേജ് കോണ്‍ട്രാക്‌ട് കാര്യേജ് വത്യാസം അറിയാത്ത വണ്ണം മനോഹരമായി അഭിനയിക്കുമ്ബോള്‍ പ്രത്യേകിച്ചും…!
ചില്ലിട്ട കൊട്ടാരങ്ങള്‍ എന്ന പോലെയുള്ള ബസുകളുമായി നാട്ടില്‍ നിയമപരമായും ഒളിഞ്ഞും തെളിഞ്ഞും അത് തെറ്റിച്ചും സര്‍വീസ് നടത്തുന്ന ഒരു വിഭാഗമുണ്ട്.കല്യാണത്തിന് പോകുന്ന പാവം ടൂറിസ്റ്റ് ബസുകള്‍ അല്ല.. ലക്ഷ്വറി ബസുകളുടെ ഏറ്റവും എലൈറ്റ് വിഭാഗം. ഒന്ന് കാലെടുത്തു വെക്കണം എങ്കില്‍ സാധാരണക്കാരൻ രണ്ടു പ്രാവശ്യം പോയിട്ട് വരേണ്ട പൈസ കൊടുക്കേണ്ട ബസുകള്‍.അവര്‍ക്ക് വേണ്ടി അവരുടെ വരവിന് വേണ്ടി കൂലിക്കെടുത്ത ആള്‍ മാത്രമാണ് നമ്മളില്‍ ചിലര്‍ ആഘോഷിക്കുന്ന മുതലാളി. യഥാര്‍ത്ഥ മുതലാളിമാര്‍ പുറകില്‍ ചിയേര്‍സ് പറഞ്ഞു ചിരിക്കുന്നുണ്ട്..
ഓള്‍ ഇന്ത്യ ടൂറിസ്റ്റ് പെര്മിറ്റ് എന്ന AITP നിയമത്തെ വളച്ചൊടിച്ച്‌ KSRTC യും പ്രൈവറ്റ് ബസും അടങ്ങുന്ന പൊതുഗതാഗത മേഖലയെ അപ്പാടെ തകര്‍ക്കാൻ ശ്രമിക്കുന്ന ഗൂഢാലോചനയുടെ പ്രസക്ത രംഗങ്ങള്‍ മാത്രമാണ് നമ്മള്‍ കണ്ടു കൊണ്ടിരിക്കുന്നത്.
കാഞ്ഞിരപ്പള്ളിയില്‍ നിന്നും ഈരാറ്റുപേട്ടയിലേക്ക് കേവലം 15 കിലോമീറ്റര്‍ സര്‍വീസ് നടത്തണമെങ്കില്‍ പോലും ഒരു സാധാരണ പ്രൈവറ്റ് ബസുകാരന് കലക്ടറുടെ അധ്യക്ഷതയില്‍ ഉള്ള RTA ബോര്‍ഡിന്റെ അനുമതി വരെ വേണം എന്നിരിക്കെ AITP നിര്‍ദേശങ്ങളില്‍ ഒരിടത്തും പറഞ്ഞിട്ടില്ലാത്ത സ്റ്റേജ് കാരിയേജ് ആയി സര്‍വീസ് നടത്തുന്നതിന് ദീര്‍ഘദൂര സര്‍വീസുകള്‍ക്കും അന്തര്‍ സംസ്ഥാന സര്‍വീസുകള്‍ക്കും വേണ്ടിയുള്ള നിയമത്തെ വെല്ലുവിളിച്ചു ഒരാള്‍ തുനിഞ്ഞിറങ്ങുന്നുവെങ്കില്‍, ഉറപ്പായും അയാള്‍ കളിക്കുന്നത് തിരശീലയ്ക്ക് പിറകിലെ വലിയൊരു ഗൂഡാലോചനയുടെ തിരക്കഥയുടെ ഭാഗമായി തന്നെയാണ്..
പൊതു ഗതാഗതം തകരുന്നതോടെ സര്‍വീസ് സെക്ടറില്‍ നിന്ന് സര്‍ക്കാരാകും ആദ്യം പിന്മാറുക.കാരണം ഇന്നത്തെ സാഹചര്യത്തില്‍ അവര്‍ക്കതാണ് ലാഭം.ഒരു ചായക്കാശിനേക്കാള്‍ ചെറിയ ചിലവില്‍ തുടങ്ങുന്ന യാത്ര ടിക്കറ്റുകള്‍ അപ്പോള്‍ തന്നെ ഇല്ലാതാകും.പകരം യാത്ര ചെയ്യേണ്ട തുക നാളെ അവര്‍ തീരുമാനിക്കും…
ദീര്‍ഘ ദൂര യാത്രകള്‍ സാധാരണക്കാരന് താങ്ങാവുന്നതിലും അപ്പുറമാകും..അന്ന് അവര്‍ കര്‍ട്ടന് പിന്നില്‍ ആവില്ല.. മുൻപില്‍ ആയിരിക്കും..ഈ നാട്ടിലെ യാത്രാ സംവിധാനങ്ങളെ വെല്ലു വിളിച്ചുകൊണ്ടും നിയന്ത്രിച്ചു കൊണ്ടും..!
