ഹൃദയത്തിനൊരു ഹിമകണം 8
രാത്രി ഒരു വഞ്ചിവീട്ടിൽ ഇരുന്ന് ഒരാൾ ഒരു പുസ്‌തകം വായിക്കുകയാണ്. വഞ്ചിവീട്ടിൽ കറണ്ടില്ല. മെഴുതിരി വെട്ടത്തിലാണ് വായന.
പുസ്‌തകം അഹംബോധത്തെക്കുറിച്ചാണ്. ഈഗോ എന്നാൽ എഡ്‌ജിങ്ങ് ഗോഡ് ഔട്ട് എന്നൊക്കെ പുസ്‌തകം പറയുന്നു.
പെട്ടെന്ന് കാറ്റിൽ മെഴുകുതിരി അണഞ്ഞു. അയാൾ ലോകത്തെയാകെ ശപിച്ച് പുറത്തേയ്‌ക്ക്‌, വഞ്ചിവീടിന്റെ തട്ടിലേയ്ക്ക് വന്നു. കണ്ട കാഴ്‌ച അദ്‌ഭുതപ്പെടുത്തുന്നതായിരുന്നു. പുഴ മുഴുവൻ നിലാവ്! ചുറ്റും വെളിച്ചത്തിന്റെ വിസ്‌മയം! ഈ വിസ്‌മയത്തെ പുറത്താക്കി വാതിലടച്ചാണ് കേവലം ഒരു മെഴുകുതിരി കത്തിച്ചത്.
ഓർക്കണം ഈഗോ എന്തിനെയൊക്കെയാണ് പുറത്താക്കുന്നതെന്ന്. വലിയ വെളിച്ച വിസ്‌മയങ്ങളെ കാണാതെ, ചെറിയ മിന്നാമിന്നി മാന്ത്രികതയാൽ വശീകരിക്കപ്പെടുന്നു മനുഷ്യർ.
അവതാരക: ഉണ്ണിമായ ഉണ്ണിക്കൃഷ്ണൻ
സമ്പാദകൻ: സുനിൽ കെ ചെറിയാൻ
