ഓരോ ദിവസം ഓരോ പെണ്ണുങ്ങള്‍, പുണ്യയ്ക്കൊപ്പമുള്ള ഫോട്ടോയെ വിമര്‍ശിച്ചവര്‍ക്ക് ഗോപി സുന്ദറിന്റെ മറുപടി; മകളെ പോലെ കാണുന്നവളാണ്, നിങ്ങളെ നമിച്ചു!
മലയാളത്തിന് അഭിമാനമായ സംഗീത സംവിധായകനാണ് ഗോപി സുന്ദര്‍. മലയാളികള്‍ എക്കാലവും ഓര്‍ക്കുന്ന ചില നല്ല പാട്ടുകള്‍ ഒരുക്കിയിട്ടുണ്ട്. മലയാളത്തില്‍ മാത്രമല്ല, തെലുങ്കിലും തമിഴിലും ഹിന്ദിയിലും ഗോപിയുടെ പാട്ടുകള്‍ക്ക് വലിയ ആരാധകവൃന്തമുണ്ട്. കരിയര്‍ സംബന്ധമായി എതിര്‍പ്പുകള്‍ അധികം ഇല്ലെങ്കിലും, വ്യക്തി ജീവിതത്തില്‍ എന്നും വിമര്‍ശിക്കപ്പെടുന്ന സംഗീത സംവിധായകനാണ് ഗോപി സുന്ദര്‍.
ഗായകന്റെ സ്വകാര്യ ജീവിതത്തിലെ ബന്ധങ്ങള്‍ ഇപ്പോള്‍ ഗോസിപ്പുകാരുടെ സ്ഥിരം ഇരയാണ്. ഒരു ദാമ്പത്യവും ചില ലിവിങ് ടുഗെര്‍ റിലേഷനും കഴിഞ്ഞതോടെ, ഗോപി സുന്ദര്‍ ഏത് സ്ത്രീയ്ക്കൊപ്പം ഫോട്ടോ പങ്കുവച്ചാലും അതിനെ തെറ്റായ അര്‍ത്ഥത്തില്‍ മാത്രമേ സോഷ്യല്‍ മീഡിയയില്‍ ചിലര്‍ വിലയിരുത്തുന്നുള്ളൂ. പലപ്പോഴും അത്തരം മോശം കമന്റുകള്‍ക്ക് മറുപടിയുമായി ഗോപി സുന്ദര്‍ തന്നെ സോഷ്യല്‍ മീഡിയയില്‍ എത്താറുമുണ്ട്.
ഇത് എന്റെ ഒരേ ഒരു ജീവിതമാണ്, എനിക്ക് ഇഷ്ടമുള്ളത് പോലെ ജീവിയ്ക്കും. ഈ നിമിഷത്തിലാണ് ഞാന്‍ വിശ്വസിക്കുന്നത് എന്ന് ഗോപി സുന്ദര്‍ പറഞ്ഞിരുന്നു. അതിനെ പരിഹസിച്ചും പിന്തുണച്ചും പലരും കമന്റ് ബോക്സില്‍ എത്തിയിട്ടുണ്ട്. എന്നാല്‍ അത്തരം വിമര്‍ശനങ്ങളെ സംഗീത സംവിധായകന്‍ മൈന്റ് ചെയ്തില്ല. തന്റെ സംഗീത യാത്രകളുമായി തിരക്കിലായിരുന്നു അദ്ദേഹം.
ഒരു മ്യൂസിക് ഷോയുമായി ബന്ധപ്പെട്ട് സ്വിറ്റ്സര്‍ലാന്റില്‍ പോയതും, അവിടെ വച്ച് ചില ഫോട്ടോകള്‍ പങ്കുവച്ചതും വൈറലായിരുന്നു. പ്രിയയ്ക്കൊപ്പമുള്ള ചിത്രം പങ്കുവച്ചത് സോഷ്യല്‍ മീഡിയ ഏറ്റെടുത്തു. എന്നാല്‍ യുവ ഗായിക പുണ്യ പ്രദീപിനൊപ്പം ഫോട്ടോ പങ്കുവച്ചതിനെയും ചിലര്‍ വിമര്‍ശിച്ചു. പുണ്യയ്ക്കൊപ്പം ചേര്‍ത്ത് ഗോസിപ്പ് പടച്ചുവിട്ടതിന് പ്രതികരണവുമായി എത്തിയിരിക്കുകയാണിപ്പോള്‍ ഗോപി സുന്ദര്‍.
ഷെയര്‍ ചെയ്ത വാര്‍ത്തയ്ക്ക് താഴെയാണ് ഗോപി സുന്ദറിന്റെ പ്രതികരണം. ‘എന്റെ സ്വന്തം പെങ്ങളെ പോലെയോ, മകളെ പോലെയോ കാണുന്ന ഒരാള്‍ക്കൊപ്പം ഫോട്ടോ ഇട്ടാലും നീചമായ രീതിയില്‍ ചിന്തിയ്ക്കുന്ന നിങ്ങളെ നമിച്ചു. നിങ്ങളൊക്കെ നന്നായി വരും. ദൈവം നിങ്ങളെ വാനോളം ഉയര്‍ത്തട്ടെ’ എന്നാണ് ഗോപി സുന്ദറിന്റെ പ്രതികരണം.
സരിഗമപ എന്ന റിയാലിറ്റി ഷോയിലൂടെ ശ്രദ്ധ നേടിയ ഗായികയാണ് പുണ്യ പ്രദീപ്. ജീവിതത്തിലെ പല പ്രതികൂല സാഹചര്യങ്ങളെയും അതിജീവിച്ചുവന്ന പെണ്‍കുട്ടി. ഗോപി സുന്ദറിനൊപ്പം സ്വിറ്റ്സര്‍ലാന്റില്‍ നടത്തിയ മ്യൂസ്‌ക് ഷോ പുണ്യയുടെ കരിയറിലെ മറ്റൊരു നേട്ടമായിരുന്നു. ഗോപി സുന്ദറിനൊപ്പമുള്ള ചിത്രങ്ങള്‍ അഭിമാനത്തോടെ പുണ്യയും ഇന്‍സ്റ്റഗ്രാമില്‍ പങ്കുവച്ചിട്ടുണ്ട്
