ബംഗളൂരു:നെതര്‍ലൻഡ്സിനെതിരായ ശേഷിക്കുന്ന ഏക ലീഗ് മാച്ച്‌ കളിക്കാനുള്ള മുന്നൊരുക്കങ്ങളിലാണ് രോഹിത്തും സംഘവും. ഞായറാഴ്ചത്തെ മത്സരത്തിന് മുന്നോടിയായി ലഭിച്ച അവസരങ്ങളില്‍ ഇന്ത്യൻ ക്രിക്കറ്റര്‍മാര്‍ നടത്തിയ ദീപാവലി സെലിബ്രേഷന്റെ ചിത്രങ്ങള്‍ സോഷ്യല്‍ മീഡിയയില്‍ വൈറലായിക്കഴിഞ്ഞു.
ഭാര്യയ്ക്കും മകള്‍ക്കുമൊപ്പം പൈജാമയും കുര്‍ത്തയും അണിഞ്ഞാണ് രോഹിത്ത് ഫോട്ടോയ്ക്ക് പോസ് ചെയ്തത്. ഇതിന്റെ വീഡിയോകളും എക്സില്‍ ഉള്‍പ്പടെ പ്രചരിക്കുന്നുണ്ട്.അനുഷ്ക ശര്‍മ്മയ്ക്കൊപ്പമാണ് വിരാട് കോഹ്ലി ദീപാവലി ആഘോഷിക്കാനെത്തിയത്. ഈ ചിത്രങ്ങളും ആരാധകർ ഏറ്റെടുത്ത് കഴിഞ്ഞു.
ഭാര്യയ്ക്കും രണ്ട് മക്കള്‍ക്കുമൊപ്പമാണ് രവിചന്ദ്രൻ അശ്വിൻ ആഘോഷങ്ങള്‍ക്കെത്തിയത്. ജീൻസിനൊപ്പം കുര്‍ത്തയണിഞ്ഞാണ് അശ്വിൻ എത്തിയത്.ഇന്ത്യൻ ടീമംഗങ്ങളുടെ ദീപാവലി സെലിബ്രേഷന്റെ ഗ്രൂപ്പ് ഫോട്ടോയും സോഷ്യല്‍ മീഡിയ ആഘോഷമായി കഴിഞ്ഞു. ചുരുക്കം ചില താരങ്ങള്‍ ഒഴികെ ബാക്കിയെല്ലാവരും കുര്‍ത്തയും പൈജാമയും അണിഞ്ഞാണ് പരിപാടിക്കെത്തിയത്. രാഹുല്‍ ദ്രാവിഡ് ഉള്‍പ്പെടെയുള്ള കോച്ചിങ്ങ് സ്റ്റാഫും ഇവര്‍ക്കൊപ്പം ഫോട്ടോയ്ക്ക് പോസ് ചെയ്തിട്ടുണ്ട്.
