ഇവിടെ ഒറ്റപ്പെട്ടയിടങ്ങളില് അതിശക്തമായ മഴക്കുള്ള സാദ്ധ്യതയാണ്. 24 മണിക്കൂറില് 115.6 മി.മി മുതല് 204.4 മി.മി വരെ മഴ ലഭിക്കുമെന്നാണ് അതിശക്തമായ മഴ എന്നത് കൊണ്ട് അര്ത്ഥമാക്കുന്നത്. മറ്റ് ജില്ലകളില് ഇന്ന് യെല്ലോ അലര്ട്ടാണ്.
ശനിയാഴ്ച രാത്രിയുണ്ടായ കനത്ത മഴയില് നിരവധിയിടങ്ങളില് വെള്ളംകയറിയതിനാലും കനത്ത മഴ മുന്നറിയിപ്പിനെ തുടര്ന്നും തിരുവനന്തപുരം ജില്ലയില് ഇന്ന് പ്രൊഫഷണല് കോളേജുകളടക്കം വിദ്യാഭ്യാസ സ്ഥാപനങ്ങള്ക്ക് ജില്ലാ കളക്ടര് ജെറോമിക് ജോര്ജ് അവധി പ്രഖ്യാപിച്ചിരിക്കുകയാണ്.
ഇന്ന് ഗള്ഫ് ഓഫ് മന്നാര് ,കന്യാകുമാരി തീരം, തെക്കൻ തമിഴ്നാട് തീരം എന്നിവിടങ്ങളില് മണിക്കൂറില് 40 മുതല് 45 കിലോമീറ്റര് വരെയും ചില അവസരങ്ങളില് മണിക്കൂറില് 55 കിലോമീറ്റര് വരെയും വേഗതയില് ശക്തമായ കാറ്റിനും മോശം കാലാവസ്ഥയ്ക്കും സാദ്ധ്യതയാണ് കേന്ദ്ര കാലാവസ്ഥാ വകുപ്പ് പ്രവചിക്കുന്നത്.
തിങ്കളാഴ്ച രാത്രി 11.30 വരെ കേരള തീരത്ത് 0.6 മുതല് 1.9 മീറ്റര് വരെയും തെക്കൻ തമിഴ്നാട് തീരത്ത് രാത്രി 11.30 വരെ 0.9 മുതല് 1.9 മീറ്റര് വരെയും ഉയര്ന്ന തിരമാലയ്ക്കും കടലാക്രമണത്തിനും സാദ്ധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രവും മുന്നറിയിപ്പ് നല്കിയിട്ടുണ്ട്.
