കണ്ണൂര്‍: കാപ്പ ചുമത്തി വിയ്യൂര്‍ സെന്‍ട്രല്‍ ജയിലില്‍ അടയ്ക്കപ്പെട്ട കൊടുംക്രിമിനല്‍ ആകാശ് തില്ലങ്കേരിക്ക് ജാമ്യംലഭിച്ചു. സിപിഎം ഇടപെടലിനെ തുടര്‍ന്ന് കഴിഞ്ഞ മാസം 27 നാണ് കാപ്പ ബോര്‍ഡ് ജാമ്യം അനുവദിച്ചത്. ആകാശ് തില്ലങ്കേരി പ്രതിയായ യൂത്ത് കോണ്‍ഗ്രസ് നേതാവ് എടയന്നൂരിലെ ശുഹൈബ് വധക്കേസ് കോടതിയില്‍ വിചാരണയ്ക്കായി വരുന്ന സാഹചര്യത്തിലാണ് ആകാശ് തില്ലങ്കേരിക്കെതിരെയുളള നിയമ നടപടികളില്‍ നിന്നും സര്‍ക്കാരും പാര്‍ട്ടിയും പിന്‍വലിഞ്ഞതെന്നാണ് സൂചന.
ഇതിനു പുറമേ ആകാശ് തില്ലങ്കേരിക്കെതിരെയുള പോലീസ് നടപടി പ്രാദേശികമായി പാര്‍ട്ടിയില്‍ പൊട്ടിത്തെറിക്ക് ഇടയാക്കിയിരുന്നുവെന്ന് സ്ഥിരീകരിക്കാത്ത വിവരങ്ങളുണ്ട്. തില്ലങ്കേരിയിലെ ഒരു വിഭാഗം പാര്‍ട്ടി പ്രവര്‍ത്തകരും ആകാശിന്റെ സുഹൃത്തുക്കളും പാര്‍ട്ടി അനുഭാവികളായ ബന്ധുക്കളും ആകാശിനെതിരെ കാപ്പ ചുമത്തിയതിന് എതിരെ രംഗത്ത് വന്നിരുന്നു. ആകാശ് തില്ലങ്കേരിയെ പൊലീസ് നിരന്തരം വേട്ടയാടുന്നുവെന്ന് ആരോപിച്ച് പാര്‍ട്ടി അംഗങ്ങളും, ആകാശിന്റെ ബന്ധുക്കള്‍ ഉള്‍പ്പടെയുള്ള ആളുകളാണ് സിപിഎം കണ്ണൂര്‍ ജില്ലാനേതൃത്വത്തെ സമീപിച്ചിരുന്നുവെന്നാണ് സൂചന.
മൂന്നാഴ്ച്ച മുന്‍പ് തില്ലങ്കേരിയില്‍ നിന്നും മുഴക്കുന്നില്‍ നിന്നുള്ള അറുപതോളം പേര്‍ ജില്ലാകമ്മിറ്റി ഓഫീസിലെത്തി ആകാശിനെതിരെയുളള നടപടിയില്‍ തങ്ങള്‍ക്കുള്ള പ്രതിഷേധം നേതൃത്വത്തെ അറിയിച്ചെന്നാണ് പുറത്ത് വരുന്ന സൂചനകള്‍. വരുന്ന ലോക്സഭാതെരഞ്ഞെടുപ്പിന്റെ പശ്ചാത്തലത്തിലാണ് കാപ്പ ചുമത്തപ്പെട്ട ആകാശ് തില്ലങ്കേരിക്ക് ജാമ്യം ലഭിച്ചത്. കഴിഞ്ഞമാസം 27നാണ് തില്ലങ്കേരിക്ക് ജാമ്യം ലഭിച്ചത്.
ജയില്‍ മോചിതനായ ആകാശ് ഈ മാസം ഒന്നാംതീയ്യതി മുതല്‍ തില്ലങ്കേരിയിലെ വീട്ടിലുണ്ട്. എന്നാല്‍, പോലീസ് നിര്‍ദ്ദേശമുള്ളതിനാല്‍ സോഷ്യല്‍ മീഡിയയില്‍ ഉള്‍പ്പടെ സജീവമല്ലെന്നാണ് സൂചന. ഭാവിയില്‍ പ്രശ്നങ്ങളില്‍ ഇടപെടാതിരിക്കാന്‍ തില്ലങ്കേരിയിലെ വീട്ടില്‍ നിന്നും ആകാശ് മാറിതാമസിക്കുമെന്ന വിവരവും പുറത്തുവന്നിട്ടുണ്ട്.
