പലര്‍ക്കും മുന്തിരി ജ്യൂസ് കുടിക്കുമ്പോള്‍ ചുണ്ട് നന്നായി ചൊറിയുന്നത് കാണാം. ചിലപ്പോള്‍ ചുണ്ട് തടിച്ച് വീര്‍ക്കുകയും ചെയ്യും. എന്നാല്‍, ഇത്തരം പ്രശ്നങ്ങള്‍ ഇല്ലാതെ തന്നെ മുന്തിരി ജ്യൂസ് നിങ്ങള്‍ക്ക് വീട്ടില്‍ തയ്യാറാക്കി കുടിക്കാവുന്നതാണ്. വളരെ രുചികരമായി തന്നെ നിങ്ങള്‍ക്ക് ഇത് തയ്യാറാക്കാവുന്നതാണ്.
മുന്തിരിയുടെ ഗുണങ്ങള്‍
മുന്തിരിയില്‍ പൊട്ടാസ്യം അടങ്ങിയിരിക്കുന്നതിനാല്‍ ഇത് രക്തസമ്മര്‍ദ്ദം കുറയ്ക്കാന്‍ വളരെയധികം സഹായിക്കുന്നുണ്ട്. അതുപോലെ തന്നെ കൊളസ്ട്രോള്‍ അമിതമായിട്ടുള്ളവരാണെങ്കില്‍ അതിനെ നിയന്ത്രിച്ച് നിര്‍ത്താനും മുന്തിരി നല്ലതാണ്.
മുന്തിരിയില്‍ ധാരാളം ആന്റിഓക്സിഡന്റ്സ് അടങ്ങിയിരിക്കുന്നതിനാല്‍ ഇത് ചര്‍മ്മത്തിന്റെ ആരോഗ്യം മെച്ചപ്പെടുത്താന്‍ വളരെയധികം സഹായിക്കുന്നുണ്ട്. പ്രത്യേകിച്ച് ചര്‍മ്മത്തിന് നല്ല യുവത്വം നല്‍കാനും ചര്‍മ്മത്തിലെ ചുളിവുകള്‍ നീക്കം ചെയ്യാനും ഇത് സഹായിക്കുന്നു.
ചില പഠനങ്ങള്‍ പ്രകാരം മുന്തിരി കഴിക്കുന്നതിലൂടെ കാന്‍സറിനെ വരെ പ്രതിരോധിക്കാന്‍ സാധിക്കും എന്ന് പറയുന്നു. കൂടാതെ, പ്രമേഹം പോലെയുള്ള അസുഖങ്ങള്‍ നിയന്ത്രിക്കാനും മുന്തിരി നല്ലത് തന്നെയാണ്.
ബോള്‍ മുന്തിരി ജ്യൂസ്
പലരും ബോള്‍ മുന്തിരി ജ്യൂസ് കഴിച്ചിട്ടുണ്ടാകും. സാധാരണഗതിയില്‍ മുന്തിരി ജ്യൂസ് തയ്യാറാക്കുമ്പോള്‍ മൊത്തത്തില്‍ മുന്തിരിയും പഞ്ചസ്സാരയും ചേര്‍ത്ത് അടിച്ച് കുടിക്കുകയാണ് പതിവ്. എന്നാല്‍, ഇത്തരത്തില്‍ മുന്തിരി ജ്യൂസ് തയ്യാറാക്കുന്നത് പലര്‍ക്കും സ്‌കിന്‍ അലര്‍ജി ഉണ്ടാക്കുകയും അതുപോലെ, ചുണ്ടില്‍ അമിതമായി ചൊറിച്ചില്‍ അനുഭവപ്പെടാനും ഇത് കാരണമാകുന്നുണ്ട്. ഇത്തരം പ്രശ്നങ്ങളൊന്നും ഇല്ലാതെ തന്നെ മുന്തിരിയുടെ ഗുണം ലഭിക്കുന്ന വിധത്തില്‍ തയ്യാറാക്കാന്‍ സാധിക്കുന്ന ഒരു ജ്യൂസ് ആണ് ബോള്‍ മുന്തിരി ജ്യൂസ്. ഇത് എങ്ങിനെ തയ്യാറാക്കി എടുക്കാം എന്ന് നോക്കാം.
തയ്യാറാക്കാം
ഇത് തയ്യാറാക്കാന്‍ വൈന്‍ മുന്തിരിയാണ് ബെസ്റ്റ്. ആദ്യം തന്നെ വൈന്‍ മുന്തിരി കുറച്ച് ഉപ്പും മഞ്ഞള്‍പ്പൊടിയും ചേര്‍ത്ത വെള്ളത്തില്‍ 15 മിനിറ്റ് മുക്കി വെക്കുക. ഇതിലെ അഴുക്കെല്ലാം നീക്കം ചെയ്യുന്നതിന് വേണ്ടിയാണ് ഇങ്ങനെ ചെയ്യുന്നത്.
അതിന് ശേഷം നന്നായി കഴുകി മാറ്റി വെക്കുക. അടുപ്പത്ത് ഒരു പാത്രത്തില്‍ കുറച്ച് വെള്ളം ചൂടാക്കാന്‍ വെക്കണം. വെള്ളം ഒന്ന് ചൂടായി വരുമ്പോള്‍ അതിലേയ്ക്ക് ഈ മുന്തിരി ചേര്‍ത്ത് ഒന്ന് ചൂടക്കി വാങ്ങി വെക്കുക. ഈ മുന്തിരി നല്ല തുണത്ത വെള്ളത്തിലേയ്ക്ക് വേണം ഇടാന്‍. അതിന് ശേഷം ഒരു തവി ഉപയോഗിച്ച് ഒനന് പ്രെസ്സ് ചെയ്താല്‍ ഇതിലെ തൊലിയും കുരുവും മാറ്റി കിട്ടുന്നതാണ്. ഇത്തരത്തില്‍ തൊലി വേര്‍തിരിഞ്ഞ് വന്നില്ലെങ്കില്‍ കൈ കൊണ്ട് തന്നെ വേഗത്തില്‍ മാറ്റി എടുക്കാവുന്നതാണ്.
അടുത്ത ഘട്ടം
മുന്തിരിയുടെ പള്‍പ്പ് മാറ്റി വെക്കണം. അതിന് ശേഷം മുന്തിരി വേവിച്ച വെള്ളത്തിലേയ്ക്ക് മുന്തിരിയുടെ തൊലിയും കുറച്ച് പഞ്ചസ്സാരയും ചേര്‍ത്ത് നന്നായി വേവിച്ച് തിളപ്പിച്ച് എടുക്കുക. ഇപ്പോള്‍ വെള്ളത്തിന് ആ മുന്തിരി നിറം വരും. അതിന് ശേഷം തൊലി മാറ്റി അതിലേയ്ക്ക് മാറ്റി വെച്ചിരിക്കുന്ന മുന്തിരിയുടെ പള്‍പ്പ് ചേര്‍ത്ത് കൊടുക്കണം. ഇവ നന്നായി മിക്സ് ചെയ്തതിന് ശേഷം തണുപ്പിച്ച് കുടിക്കാവുന്നതാണ്. ഇത്തരത്തില്‍ കുടിച്ചാല്‍ ഒരിക്കലും ചുണ്ട് ചൊറിയാതെ തന്നെ നിങ്ങള്‍ക്ക് മുന്തിരി ജ്യൂസ് ആസ്വദിക്കാവുന്നതാണ്.
