റിയാദ്: സൗദിയില്‍ പ്രവാസി മലയാളി യുവാവിനെ നാല് ദിവസമായി കാണാനില്ല. തിരൂര്‍ കാരത്തൂര്‍ സ്വദേശിയായ ആഷിഖിനെയാണ് ജിദ്ദയില്‍ കാണാതായത്. ജിദ്ദയിലെ ബഖാലകളില്‍ സാധനങ്ങള്‍ വിതരണം ചെയ്തുവരികയായിരുന്നു ആഷിഖ്. എന്നാല്‍ കഴിഞ്ഞ നാല് ദിവസമായി യാതൊരു വിധത്തിലുമുള്ള വിവരം ലഭ്യമല്ല എന്നാണ് സുഹൃത്തുക്കള്‍ അറിയിക്കുന്നത്. മൊബൈല്‍ ഫോണ്‍ വഴിയും ബന്ധപ്പെടാന്‍ സാധിക്കുന്നില്ല. ആഷിഖിന്റെ 0533490943 എന്ന ഫോണ്‍ നമ്പര്‍ പ്രവര്‍ത്തനരഹിതമാണെന്നാണ് ജോലി ചെയ്യുന്ന സ്ഥാപനത്തില്‍ നിന്ന് അറിയിച്ചത്. നേരത്തെ യാംബുവിലും യുവാവ് ജോലി ചെയ്തുവന്നിരുന്നു.
ആഷിഖിനെക്കുറിച്ച് ഏതെങ്കിലും തരത്തിലുള്ള വിവരം ലഭിക്കുന്നവര്‍ 0592720100 എന്ന ഫോണ്‍ നമ്പറില്‍ ബന്ധപ്പെടാം. നിലവില്‍ സുഹൃത്തുക്കളും ബന്ധുക്കളും ചേര്‍ന്ന് വ്യാപകമായി തിരച്ചില്‍ നടത്തി വരികയാണ്.
അതേസമയം, ഇന്ത്യക്കാരനായ വിദ്യാര്‍ത്ഥി സൗദിയില്‍ പനി ബാധിച്ച് മരിച്ചു. ഹൈദരാബാദ് സ്വദേശിയായ മുഹമ്മദ് അബ്ദുള്‍ ഹയ്യ് പാഷ (16) ആണ് കഴിഞ്ഞ ദിവസം മരിച്ചത്. റിയാദ് ഇന്റര്‍നാഷണല്‍ ഇന്ത്യന്‍ സ്‌കൂളിലെ പ്‌ളസ് വണ്‍ വിദ്യാര്‍ത്ഥിയാണ്. അസുഖബാധിതനായതിന് പിന്നാലെ ഒരാഴ്ചയായി ആശുപത്രിയില്‍ ചികിത്സയില്‍ തുടരുകയായിരുന്നു. ചൊവ്വാഴ്ച രാവിലെയോടെ മരണം സംഭവിക്കുകയായിരുന്നു
