കാസര്‍കോട്: കേരളത്തിലേക്ക് കടത്തുകയായിരുന്ന വൻ വിദേശ മദ്യ ശേഖരം പിടികൂടി. 2,484 ലിറ്റര്‍ ഗോവൻ നിര്‍മിത വിദേശ മദ്യമാണ് പിടികൂടിയത്.സംഭവത്തിൽ കര്‍ണാടക സ്വദേശി രാധാകൃഷ്‌ണ കമ്മത്തി (59)നെ എക്സൈസ് സംഘം കസ്റ്റഡിയിലെടുത്തു.
മഞ്ചേശ്വരം എക്സൈസ് ചെക്പോസ്റ്റിലെ, എക്സൈസ് ഇൻസ്പെക്‌ടര്‍ ആര്‍ റിനോഷും പാര്‍ട്ടിയും ചേര്‍ന്ന് നടത്തിയ വാഹന പരിശോധനയിലാണ് മദ്യം പിടികൂടിയത്.
KA 19 AC 7246 നമ്ബര്‍ ദോസ്‌ത ഗുഡ്‌സ് കാരിയര്‍ വാഹനവും പിടികൂടിയിട്ടുണ്ട്. 750ന്‍റെ 720 കുപ്പികളിലായി 540 ലിറ്ററും 180ന്‍റെ 10,800 കുപ്പികളിലായി 1,944 ലിറ്ററും ആകെ 2,484 ലിറ്റര്‍ ഗോവൻ മദ്യവും 90,000 രൂപയുമാണ് പിടിച്ചെടുത്തത്.
കഴിഞ്ഞ ദിവസം മഞ്ചേശ്വരം മുഗുവിലെ ബെപ്പാരിപ്പൊന്നത്ത് കാറില്‍ കടത്തുകയായിരുന്ന 672 കുപ്പി വിദേശ മദ്യം എക്സൈസ് സംഘം പിടികൂടിയിരുന്നു. സംഭവത്തിൽ മുഗു ചെന്നക്കുണ്ടിലെ കൃഷ്‌ണകുമാര്‍ എന്നയാളെ എക്സൈസ് അറസ്റ്റ് ചെയ്‌തിരുന്നു.
