തമിഴ് സൂപ്പർതാര ചിത്രങ്ങളിൽ അനിരുദ്ധ് രവിചന്ദറിൻറെ സംഗീതം ഉണ്ടെങ്കിൽ അത് അവയ്ക്ക് നൽകുന്ന ഒരു അധിക മൈലേജ് ഉണ്ട്. റിലീസിനു മുൻപ് തന്നെ ഹിറ്റ് ചാർട്ടുകളിൽ ഇടംപിടിക്കാറുള്ള ഗാനങ്ങൾ ചിത്രങ്ങളുടെ വിജയത്തിൻറെ ആക്കം കൂട്ടാറുമുണ്ട്. അതുകൊണ്ടുതന്നെ തമിഴ് സിനിമയിൽ അനിരുദ്ധിന് തിരക്കൊഴിഞ്ഞ നേരവുമില്ല. ലോകേഷ് കനകരാജിൻറെ സംവിധാനത്തിൽ വിജയ് നായകനാവുന്ന ലിയോ ആണ് അനിരുദ്ധിൻറേതായി പുറത്തെത്താനിരിക്കുന്ന ചിത്രങ്ങളിൽ ഒന്ന്. ഇപ്പോഴിതാ ചിത്രത്തിലെ ആദ്യ ഗാനത്തിൻറെ പ്രൊമോ അവതരിപ്പിച്ചിരിക്കുകയാണ് അണിയറക്കാർ.
ലിയോയിലെ ആദ്യ സിംഗിൾ വിജയ്‍യുടെ പിറന്നാൾ ദിനമായ ജൂൺ 22 ന് അവതരിപ്പിക്കുമെന്ന് അണിയറക്കാർ നേരത്തെ അറിയിച്ചിരുന്നു. ഇതിന് മുന്നോടിയായാണ് ഗാനത്തിൻറെ പ്രൊമോ അവതരിപ്പിച്ചിരിക്കുന്നത്. നാ റെഡി എന്ന് ആരംഭിക്കുന്ന ഗാനത്തിന് വരികൾ എഴുതിയിരിക്കുന്നത് വിഷ്ണു ഇടവൻ ആണ്. അരുദ്ധിൻറെ സംഗീതത്തിൽ ഗാനം ആലപിച്ചിരിക്കുന്നത് സാക്ഷാൽ വിജയ് തന്നെയാണ്. അനിരുദ്ധിൻറെ മറ്റു പല ഫാസ്റ്റ് നമ്പറുകളെയും പോലെ തിയറ്ററുകൾ ഇളക്കിമറിക്കും ഈ ഗാനം എന്ന കാര്യത്തിൽ സംശയമില്ല.
മാസ്റ്റർ ആണ് ഇതിനു മുൻപ് അനിരുദ്ധും ലോകേഷും വിജയ്‍യും ഒരുമിച്ച ചിത്രം. ലോകേഷിൻറെ സൂപ്പർഹിറ്റ് ചിത്രം വിക്രത്തിൻറെ സംഗീത സംവിധാനവും അനിരുദ്ധ് ആയിരുന്നു. തെന്നിന്ത്യൻ സിനിമാലോകത്തുനിന്ന് വരാനിരിക്കുന്നവയിൽ ഏറ്റവും ഹൈപ്പ് നേടിയിട്ടുള്ള ഒന്നാണ് ലിയോ. വിക്രത്തിൻറെ വിജയത്തിനു ശേഷം ലോകേഷ് കനകരാജ് സംവിധാനം ചെയ്യുന്ന ചിത്രം, മാസ്റ്ററിനു ശേഷം വിജയ്‍യും ലോകേഷും ഒന്നിക്കുന്ന ചിത്രം, ഒപ്പം ഇത് എൽസിയുവിൻറെ (ലോകേഷ് സിനിമാറ്റിക് യൂണിവേഴ്സ്) ഭാഗമാകുമോ എന്ന ആകാംക്ഷ അങ്ങനെ ഈ ഹൈപ്പിന് കാരണങ്ങൾ പലതാണ്. ലഭിച്ചിരിക്കുന്ന പ്രീ റിലീസ് ഹൈപ്പ് ചിത്രത്തിൻറെ ബിസിനസിനെ ഇതിനകം തന്നെ സ്വാധീനിച്ചിട്ടുണ്ട്. വിദേശ വിതരണാവകാശം വിറ്റ വകയിൽ ചിത്രം 60 കോടി നേടിയതായാണ് കണക്കുകൾ.
