ചണ്ഡീഗഡ്: പഞ്ചാബിലെ ധനകാര്യ സ്ഥാപനത്തില്‍ പുലര്‍ച്ചെ കൊള്ള. ആയുധധാരികളായ സംഘം ഏഴു കോടി രൂപ കൊള്ളയടിച്ചു.
ലുധിയാന രാജ്ഗുരു നഗറില്‍ പുലര്‍ച്ചെ ഒന്നരയ്ക്കാണ് സംഭവം. ധനകാര്യ സ്ഥാപനത്തിന്റെ ഓഫീസിലാണ് മോഷണം നടന്നത്. ഒരു സ്ത്രീ അടക്കം എട്ടുപത്ത് പേരടങ്ങുന്ന സംഘമാണ് കവര്‍ച്ച നടത്തിയത്.
കവര്‍ച്ചയ്ക്ക് പിന്നാലെ പുറത്ത് നിര്‍ത്തിയിട്ടിരുന്ന വാനില്‍ മോഷ്ടാക്കള്‍ കടന്നുകളഞ്ഞു. ഓഫീസിലെ സിസി ടിവി ക്യാമറകളുടെ ഡിവിആറും മോഷ്ടാക്കള്‍ കൊണ്ടുപോയതായും പൊലീസ് പറയുന്നു.
ലോക്കറില്‍ ആയിരുന്നില്ല പണം സൂക്ഷിച്ചിരുന്നത്. കേസിന്റെ എല്ലാ വശങ്ങളെ കുറിച്ചും അന്വേഷിക്കുമെന്ന് ലുധിയാന സിറ്റി പോലീസ് കമ്മിഷണര്‍ മന്‍ദീപ് സിങ് സിദ്ദു അറിയിച്ചു.
