കോഴിക്കോട്: കോഴിക്കോട് ,താമരശ്ശേരി താലൂക്കുകളുടെ കിഴക്കന്‍ മലയോര മേഖലയിലെ വെള്ളച്ചാട്ടങ്ങൾ അപകടക്കെണിയാ
മുന്നറിയിപ്പില്ലാത്ത മഴയും വെള്ളത്തിന്റെ അനിയന്ത്രിതമായ കുത്തൊഴുക്കും ഉയര്‍ന്ന ജലനിരപ്പുമാണ് മലയോര മേഖലയിലെ വെള്ളച്ചാട്ടങ്ങളെ ഭീകരമാക്കുന്നത്. ജില്ലയിലെ വിവിധ വെളളച്ചാട്ടങ്ങളില്‍ ജീവന്‍ നഷ്ടമായത് നൂറു കണക്കിന് ആളുക്കള്‍ക്കാണ്. തിരുവമ്ബാടി പഞ്ചായത്തിലെ അരിപ്പാറയില്‍ മാത്രം മരണസംഖ്യ 27 ആണ്. അടുത്തുള്ള പതങ്കയത്ത് ഇതിനകം 18 പേര്‍ അപകടത്തില്‍പെട്ടു.
ഔദ്യോഗിക വിനോദ സഞ്ചാര കേന്ദ്രമല്ലാത്ത ഇവിടെ വേനലില്‍ സഞ്ചാരികളുടെ അനിയന്ത്രിത ഒഴുക്കാണ്. വിശാലമായ തീരവും നാലു വെളളച്ചാട്ടങ്ങളും ഉള്‍പെടുന്നതാണ് ഇരുവഞ്ഞിപ്പുഴയിലെ അരിപ്പാറ. ജില്ലാ ടൂറിസം പ്രമോഷന്‍ കൗണ്‍സിലിന്റെ അധീനതയിലാണ് ഈ കേന്ദ്രം.
പുഴകളില്‍ നിറയെ ഭീമാകാരമായ പാറക്കെട്ടുകളും ഉരുണ്ട പാറക്കെട്ടുകളുമാണ്. പാറക്കെട്ടിലെ വഴുവഴുപ്പില്‍ പലരും വെള്ളത്തില്‍ വീഴാറുണ്ട്. നീന്താനറിയുന്നവര്‍പോലും വെള്ളത്തിലെ ചുഴികളില്‍പ്പെട്ടാല്‍ രക്ഷപ്പെടാറില്ല. കൂടാതെ കടുത്ത വേനലിലും വെള്ളം നിറഞ്ഞ ആഴമേറിയ കയങ്ങളാണ് ഇവിടെയെത്തുന്നവരുടെ ജീവന്‍ അപഹരിക്കുന്നത്.
തെളിഞ്ഞ മാനംകണ്ട് പുഴിലിറങ്ങുന്ന ഇവര്‍ക്ക് വനമേഖലയിലെ മഴയെ കുറിച്ചും അറിയില്ല. ഇരുവഞ്ഞിപ്പുഴയുടെ ഉത്ഭവസ്ഥലമായ വെളളരിമലയിലെ വൃഷ്ടി പ്രദേശങ്ങളില്‍ കടുത്ത വേനലിലും മഴ പെയ്യാം. ഇങ്ങനെ പൊടുന്നനെയെത്തുന്ന മലവെളളപ്പാച്ചിലാണ് പലരുടെയും ജീവന്‍ അപഹരിച്ചത്.
ആവശ്യമായ സുരക്ഷാസംവിധാനങ്ങളും മതിയായ ജീവനക്കാരെയും ഇവിടങ്ങളിൽ നിയമിച്ചാൽ ഒരുപരിധിവരെ അപകടങ്ങൾ ഒഴിവാക്കാൻ സാധിക്കും.
കേരളത്തിൽ പ്രതിവര്‍ഷം ആയിരം പേരെങ്കിലും വെള്ളത്തില്‍ മുങ്ങിമരിക്കുന്നുവെന്നാണ് ദുരന്ത നിവാരണ വിഭാഗം ചൂണ്ടിക്കാണിക്കുന്നത്. കേരളത്തില്‍ റോഡപകടങ്ങള്‍ കഴിഞ്ഞാല്‍ ഏറ്റവും കൂടുതല്‍ പേർ മരിക്കുന്നതും വെള്ളത്തിൽ വീണാണ്. റോഡപകടങ്ങള്‍ തടയാന്‍ ബോധവത്കരണങ്ങള്‍ നടക്കുന്നു. എന്നാല്‍ ആഴവും ഒഴുക്കുമുള്ള വെള്ളത്തില്‍ ഇറങ്ങുമ്പോള്‍ ഉണ്ടാകുന്ന അപകടങ്ങളെക്കുറിച്ച് അവബോധമുണ്ടാക്കാന്‍ ആരും മിനക്കെടാറില്ല എന്നതാണ് സത്യം.
കേരളം പുഴകളുടെയും നദികളുടെയും വെള്ളച്ചാട്ടങ്ങളുടെയും നാടാണ്.കാഴ്ചയിൽ പാൽനുര ചിതറിയൊഴുകുന്ന വെള്ളച്ചാട്ടങ്ങൾ അതിലേക്കിറങ്ങാൻ മനസ്സിനെ ക്ഷണിക്കും.ഒഴുക്കുവെള്ളത്തിന്റെ ശക്തി പ്രവചനാതീതമാണ്.വെള്ളച്ചാട്ടങ്ങൾ
കാണാനുള്ളതാണ്.സാഹസികതയ്ക്കു മുതിർന്ന് അത് വീടിനും നാടിനും തോരാക്കണ്ണീരാകാതിരിക്കാനുള്ള ഉത്തരവാദിത്വം ഓരോ യാത്രികനും ഉണ്ടെന്ന ഓർമ്മപ്പെടുത്തലോടെ..
