മറ്റൊന്നാണ് ട്രെയിനുകളുടെ സമയമാറ്റം. വന്ദേഭാരതിനായി പാലരുവിയുടെ കോട്ടയത്തെ സമയം പുലര്‍ച്ചെ 06 55 ലേയ്ക്ക് മാറ്റിയതോടെ റെയില്‍വേ കടുത്ത ദുരിതമാണ് യാത്രക്കാര്‍ക്ക് സമ്മാനിച്ചത്. ബസ് സര്‍വീസുകള്‍ ആരംഭിക്കുന്നതിന് മുൻപ് സ്റ്റേഷനുകളില്‍ എത്തിച്ചേരാന്‍ കഴിയാതെ എറണാകുളത്തും മറ്റും ജോലി നോക്കുന്നവര്‍ ഇപ്പോള്‍ ജോലി ഉപേക്ഷിക്കേണ്ട ഗതികേടിലാണുള്ളത്.
വന്ദേഭാരതിന് വേണ്ടി വേണാട് 10 മിനിറ്റ് വൈകിയാണ് ഇപ്പോള്‍ രാവിലെ പുറപ്പെടുന്നത്.അതുകൊണ്ട് തന്നെ രാവിലെ എറണാകുളത്ത് ഓഫീസ് സമയം പാലിക്കുവാന്‍ ഏക ആശ്രയമായ പാലരുവിയിലെ ജനറല്‍ കോച്ചുകളില്‍ യാത്രക്കാര്‍ തിങ്ങിഞെരിയുകയാണ്.പാലരുവി പിടിക്കണമെങ്കില്‍ ചെങ്ങന്നൂര്‍, തിരുവല്ല, കോട്ടയം ഭാഗത്തുനിന്നുള്ള യാത്രക്കാര്‍ സൂര്യനുദിക്കും മുൻപേ വീടുകളില്‍ നിന്ന് പുറപ്പെടേണ്ട അവസ്ഥയുമാണുള്ളത്.
വെയിറ്റിംഗ് ലിസ്റ്റില്‍ ഉള്‍പ്പെട്ട 2 .70 കോടിയോളം ട്രെയിന്‍ യാത്രക്കാര്‍ക്ക് കഴിഞ്ഞ സാമ്ബത്തിക വര്‍ഷത്തില്‍ യാത്ര ഉപേക്ഷിക്കേണ്ടി വന്നതായാണ് റിപ്പോർട്ട്.രാജ്യത്തെ തിരക്കേറിയ റൂട്ടുകളില്‍ ട്രെയിനുകളുടെ കുറവാണ് ഇതിന് പ്രധാന കാരണമായി ചൂണ്ടിക്കാട്ടുന്നത്.കോട്ടയത്ത് നിലവിൽ ഏഴ് പ്ലാറ്റ്ഫോം വന്നതോടെ കൂടുതൽ ട്രെയിനുകൾക്ക് ഇവിടെ നിന്നും സർവീസ് ആരംഭിക്കാൻ സാധിക്കും.
കോട്ടയം പാതയിൽ യാത്രക്കാർ ആവശ്യപ്പെടുന്ന പാസഞ്ചറുകൾ
∙ വൈകിട്ട് 6ന് കോട്ടയത്തുനിന്ന് പുറപ്പെട്ടിരുന്ന കൊല്ലം പാസഞ്ചർ
∙ രാവിലെ 5.50ന് എറണാകുളത്തുനിന്ന് പുറപ്പെട്ടിരുന്ന കൊല്ലം മെമു
∙ വൈകിട്ട് 5.05ന് കായംകുളത്തുനിന്ന് പുറപ്പെട്ടിരുന്ന എറണാകുളം പാസഞ്ചർ
∙ വൈകിട്ട് 5.20ന് കോട്ടയത്തുനിന്ന് പുറപ്പെട്ടിരുന്ന എറണാകുളം പാസഞ്ചർ
∙ ഉച്ചയ്ക്ക് 2.20ന് എറണാകുളത്തുനിന്ന് പുറപ്പെട്ടിരുന്ന കൊല്ലം മെമു
∙ രാവിലെ 7.50ന് കൊല്ലത്തുനിന്ന് പുറപ്പെട്ടിരുന്ന എറണാകുളം മെമു
