മലപ്പുറം: ചുങ്കത്തറ പഞ്ചായത്ത് പ്രസിഡന്റ് എം കെ നജ്മുന്നീസയെ തെരഞ്ഞെടുപ്പ് കമ്മിഷന്‍ അയോഗ്യയാക്കി. കൂറുമാറ്റ നിരോധന നിയമ പ്രകാരമാണ് നടപടി. ചുങ്കത്തറ കളക്കുന്ന് പതിനാലാം വാര്‍ഡില്‍ യുഡിഎഫ് സ്വതന്ത്രയായി മത്സരിച്ച് വിജയിച്ച നജ്മുന്നീസ പിന്നീട് എല്‍ഡിഎഫ് പക്ഷത്തേക്ക് മാറുകയായിരുന്നു. ഇതോടെയാണ് തെരഞ്ഞെടുപ്പ് കമ്മിഷന്റെ നടപടിയുണ്ടായത്.
എല്‍ഡിഎഫിനും യുഡിഎഫിനും 10 സീറ്റുകള്‍ വീതമാണ് ഉണ്ടായിരുന്നത്. നറുക്കെടുപ്പിലൂടെ യുഡിഎഫിന് പ്രസിഡന്റ് പദവി ലഭിച്ചു. എന്നാല്‍, നജ്മുന്നീസയുടെ ചുവടുമാറ്റത്തോടെ എല്‍ഡിഎഫിന് ഭൂരിപക്ഷമായി. പ്രസിഡന്റ് സ്ഥാനം ഏറ്റെടുത്ത് ഒരു കൊല്ലമാവുമ്പോഴാണ് നജ്മുന്നീസയെ തേടി അയോഗ്യതാ വിധിയെത്തുന്നത്. ഇപ്പോള്‍ യുഡിഎഫിന് ഒമ്പതും എല്‍ഡിഎഫിന് പത്തും അംഗങ്ങളാണുള്ളത്. ചുങ്കത്തറ ചെമ്പന്‍കൊല്ലി വാര്‍ഡംഗം ലീഗിലെ സൈനബ മാമ്പള്ളിയുടെ പരാതിയിലാണ് കമ്മിഷന്റെ നടപടി.
സ്ഥാന മോഹത്തിന് വേണ്ടിയാണു നടപടിയെന്നായിരുന്നു നജ്മുന്നീസക്കെതിരെ യുഡിഎഫ് ആരോപണം ഉന്നയിച്ചിരുന്നത്.
നജ്മുന്നീസ കൂറുമാറിയതോടെ 11 വര്‍ഷത്തിന് ശേഷമായിരുന്ന ചുങ്കത്തറ പഞ്ചായത്തില്‍ എല്‍ഡിഎഫ് ഭരണം തിരിച്ച് പിടിച്ചിരുന്നത്. യുഡിഎഫ് പ്രസിഡന്റ് വത്സമ്മ സെബാസ്റ്റ്യന് അവിശ്വാസത്തിലൂടെ പുറത്തായതിനാലാണ് തെരഞ്ഞെടുപ്പ് വന്നത്. ഒമ്പതിനെതിരെ 11 വോട്ട് നേടിയാണ് എല്‍ഡിഎഫിലെ നജ്മുന്നീസ പ്രസിഡന്റായിരുന്നത്. പഞ്ചായത്ത് ഹാളില്‍ നടന്ന വോട്ടെടുപ്പില്‍ യുഡിഎഫിന്റെ സ്ഥാനാര്‍ത്ഥി നിഷിദ മുഹമ്മദലിയെ 9 നെതിരെ 11 വോട്ടുകള്‍ക്കാണ് തോല്‍പ്പിച്ചത്.
മുന്‍പ് നടന്ന തദ്ദേശ സ്വയംഭരണ തെരഞ്ഞെടുപ്പില്‍ 10 വീതം സീറ്റുകള്‍ നേടി ഇരുപക്ഷവും തുല്യത പാലിച്ചെങ്കിലും പ്രസിഡന്റ് തെരഞ്ഞെടുപ്പില്‍ യുഡിഎഫിലെ വത്സമ്മ സെബാസ്റ്റ്യന് നറുക്ക് വീണു. പ്രസിഡന്റ് യുഡിഎഫ് അംഗങ്ങളെ വിശ്വാസത്തിലെടുക്കുന്നില്ലെന്നും തന്നിഷ്ടം പോലെ പ്രവര്‍ത്തിക്കുന്നതായും യുഡിഎഫില്‍ ആരോപണമുയര്‍ന്നിരുന്നു.
കളക്കുന്ന് 14-ാം വാര്‍ഡില്‍ നിന്നും സ്വതന്ത്രയായി വിജയിച്ച നജ്മുന്നീസ ഇടതുപക്ഷത്തേക്ക് വന്നതോടെ യുഡിഎഫിന്റെ അംഗസംഖ്യ 9 ആയി. കഴിഞ്ഞ ഇലക്ഷനില്‍ സിപിഐ (എം) 10, ലീഗ്, 3 കോണ്‍ഗ്രസ് 7 എന്നിങ്ങനെയായിരുന്നു കക്ഷിനില. 20 ല്‍ 10 സീറ്റ് നേടിയെങ്കിലും നറുക്കെടുപ്പിലാണ് എല്‍ഡിഎഫിന് ഭരണം നഷ്ടമായത്. സ്വതന്ത്രയുടെ പിന്തുണകൂടി ലഭിച്ചതോടെ എല്‍ഡിഎഫിന് 11 അംഗങ്ങളാവുകയായിരുന്നു.
