കൊല്ലപ്പെട്ട മധുവിനെ പരിഹസിച്ചതിന് അഖിൽ മാരാരെ വിമർശിച്ച് മോഹൻലാൽ. ബിഗ് ബോസ് ഷോയിൽ മധുവിനെ പരിഹസിച്ചത് അങ്ങേയറ്റം ഖേദകരം എന്നാണ് മോഹൻലാൽ പറഞ്ഞത്. മോഹൻലാൽ ഇതിനെ കുറിച്ച് അഖിൽ മാരാരോട് ചോദിക്കുകയും ചെയ്‍തു. നടപടിയെടുക്കുമെന്നും മോഹൻലാൽ ഷോയിൽ വ്യക്തമാക്കുന്നതിന്റെ വീഡിയോ പുറത്തുവിട്ടിട്ടുണ്ട്.
ബിഗ് ബോസ് മലയാളം സീസൺ 5 ലെ മത്സരാർഥികളിൽ ഒരാളും സംവിധായകനുമായ അഖിൽ മാരാർ ഷോയ്ക്കിടെ നടത്തിയ പരാമർശം സാമൂഹ്യ മാധ്യമങ്ങളിൽ വൻ വിമർശനത്തിന് ഇടയാക്കിയിരുന്നു. ബിഗ് ബോസിൽ ടാസ്‍ക് നടക്കവേയായിരുന്നു അഖിലിൻറെ വിവാദ പരാമർശം. സിനിമയിലെ ചില കഥാപാത്രങ്ങളുടെ ഗെറ്റപ്പിൽ ഒരുങ്ങാനും ആ കഥാപാത്രങ്ങളായി പെരുമാറാനുമായിരുന്നു മത്സരാർഥികൾക്കുള്ള നിർദേശം. മറ്റൊരു മത്സരാർഥിയായ സാഗർ ‘മീശമാധവനെ’യാണ് ടാസ്‍കിൽ അവതരിപ്പിച്ചത്. തനിക്ക് ലഭിച്ച കഥാപാത്രം മികച്ചതാക്കാനുള്ള പ്രവർത്തികൾക്കിടെ അടുക്കളയിൽ കയറി ഭക്ഷണം മോഷ്‍ടിക്കാൻ ശ്രമിച്ച സാഗറിനെ ആൾക്കൂട്ട വിചാരണയ്ക്കും കൊലയ്ക്കും ഇരയായ മധുവിനോട് ഉപമിക്കുകയാണ് അഖിൽ ചെയ്‍തത്.
‘നിന്നോട് അരിയാഹാരങ്ങൾ മോഷ്‍ടിക്കാനാണോടാ പറഞ്ഞത്? നീയാരാ മധുവോ? നീ പോയി ബാക്കിയുള്ള സാധനങ്ങൾ മോഷ്ടിക്കെടാ. ഭക്ഷണ സാധനങ്ങൾ മോഷ്ടിച്ചാൽ മധുവിൻറെ അവസ്ഥയാവും. ഏതാണ്ട് അട്ടപ്പാടിയിലെ മധുവിൻറെ അവസ്ഥയാ ഇന്ന് ഇവന് ഇവിടെ’ മറ്റു മത്സരാർഥികളോട് അഖിൽ പറഞ്ഞു.
അഖിൽ ഇത് പറഞ്ഞപ്പോൾ അധികം മത്സരാർഥികൾ അടുത്തില്ലായിരുന്നു. ഉറക്കെ അല്ലായിരുന്നു അഖിലിന്റെ പരാമർശം. അതിനാൽത്തന്നെ എപ്പിസോഡ് വന്ന സമയത്ത് പ്രേക്ഷകർ തന്നെ അധികം ഇത് ശ്രദ്ധിച്ചിരുന്നില്ല. പിന്നീട് സോഷ്യൽ മീഡിയയിൽ ഈ രംഗത്തിൻറെ ക്ലിപ്പിംഗുകൾ എത്തിയ സമയത്താണ് ബിഗ് ബോസ് സ്ഥിരം പ്രേക്ഷകരിൽ പലരും തന്നെ ഈ സംഭാഷണം ശ്രദ്ധിക്കുന്നത്. സോഷ്യൽ മീഡിയയിൽ അഖിലിന്റെ വിവാദ പരാമർശം വ്യാപക വിമർശനത്തിന് കാരണമായിരുന്നു.
അഖിൽ മാരാർക്ക് എതിരെ സാമൂഹ്യ പ്രവർത്തകൻ പൊലീസിനും പട്ടിക ജാതി പട്ടിക വർഗ കമ്മിഷനും ഐബിഎഫിനും പരാതിയും നൽകിയിരുന്നു. എന്തായാലും മോഹൻലാലും അഖിലിന്റെ പരാമർശത്തിൽ വിമർശിച്ചിരിക്കുകയാണ് ഇപ്പോൾ. മത്സരാർഥികളിൽ ഒരാൾ രക്തസാക്ഷിയായ സഹോദരൻ മധുവിന്റെ പേര് പരാമർശിച്ച് പരിഹസിച്ചത് അങ്ങേയറ്റം ഖേദകരവും സംഭവിക്കാൻ പാടില്ലാത്തതും ആയിരുന്നുവെന്ന് മോഹൻലാൽ പറയുന്നത് പ്രമൊ വീഡിയോയിൽ കേൾക്കാം. ഞങ്ങൾ ഈ വിഷയം ബന്ധപ്പെട്ട മത്സരാർഥിയുമായി സംസാരിക്കുകയും തുടർ നടപടികൾ സ്വീകരിക്കുന്നതുമാണ് എന്നും മോഹൻലാൽ പറഞ്ഞു. ബിഗ് ബോസ് വാരാന്ത്യ ഷോയായ ഇന്ന് ഇത് സംപ്രേഷണം ചെയ്യും.
