പണ്ടു കാലത്ത് അടുക്കളയിലെ മിക്കവാറും വിഭവങ്ങള്‍, പ്രത്യേകിച്ചു കറികള്‍ക്കു തോരനുമെല്ലാം ഉപയോഗിച്ചിരുന്ന പലതും പ്രകൃതിദത്ത വസ്തുക്കളായിരുന്നു. തൊടിയില്‍ തന്നെ വളരുന്ന പല തരം പച്ചക്കറി, ഇല വിഭവങ്ങള്‍. തൊടിയിലേയ്ക്കിറങ്ങി അന്നന്നേയ്ക്കുള്ള കറിക്കും തോരനുമുള്ള വകകള്‍ ശേഖരിച്ച് അടുക്കളയില്‍ പാചകമെന്നതായിരുന്നു രീതി.
തൊടിയില്‍ വലിയ ശ്രദ്ധ കൊടുക്കാതെ തന്നെ വളരുന്ന പല പച്ചക്കറികളുമുണ്ട്. ഇതിലൊന്നാണ് ചേമ്പ്. ചേമ്പ് നാം കറികള്‍ക്കും പുഴുക്കുണ്ടാക്കാനുമെല്ലാം മികച്ചതാണ്. ഇതിന്റെ വേരു മാത്രമല്ല, ഇലയും ആരോഗ്യപരമായ ഗുണങ്ങള്‍ ഏറെയുള്ളതാണ്. ഇലയും തണ്ടുമെല്ലാം കറികകള്‍ക്കും തോരനുമായി ഉപയോഗിയ്ക്കാറുമുണ്ട്.
ചേമ്പിന്റെ ഇല, പ്രത്യേകിച്ചും തളിരില ഏറെ സ്വാദുള്ള നാടന്‍ ഇലക്കറിയാണ്. സ്വാദു മാത്രമല്ല, ആരോഗ്യപരമായ ഗുണങ്ങള്‍ ഏറെയുള്ള ഇത് ഇപ്പോള്‍ വളപ്പില്‍ ലഭിയ്ക്കുന്നവര്‍ പോലും പലപ്പോഴും അവഗണിയ്ക്കാറാണ് പതിവ്. ചേമ്പില കൊണ്ടു തോരന്‍ വച്ചു കഴിയ്ക്കുന്നത് ആരോഗ്യപരമായ പല ഗുണങ്ങളും നല്‍കുന്ന ഒന്നാണ്.
ചേമ്പിന്റെ ഇളം ഇലകള്‍ തോരന്‍ വച്ചു കഴിയ്ക്കാന്‍ ഏറെ നല്ലതാണ്. മറ്റേത് ഇലക്കറികളേയും പോലെ. നമ്മുടെ പറമ്പില്‍ തന്നെയുള്ളതു കൊണ്ട് കെമിക്കലുകളെ ഭയക്കുകയും വേണ്ട. പ്രോട്ടീന്‍, ഡയറ്റെറി ഫൈബര്‍, ആസ്‌കോര്‍ബിക് ആസിഡ്, അയേണ്‍, റൈബോഫ്ളേവിന്‍, തയാമിന്‍, ഫോസ്ഫറസ്, വൈറ്റമിന്‍ ബി 6, വൈറ്റമിന്‍ സി, പൊട്ടാസ്യം, നിയാസിന്‍, മാംഗനീസ്, കോപ്പര്‍ തുടങ്ങിയ ധാരാളം പോഷകങ്ങള്‍ അടങ്ങിയ ഒന്നാണിത്.
കൊളസ്ട്രോള്‍
ചേമ്പിലയില്‍ കൊളസ്ട്രോള്‍ തീരെയില്ലെന്നതാണ് ഒരു ഗുണം. കൊളസ്ട്രോള്‍ കുറയ്ക്കാനും ഇതു നല്ലതാണ്. കൊളസ്ട്രോള്‍ പ്രശ്നങ്ങളുളളവര്‍ക്ക് ശീലമാക്കാവുന്ന ഒരു ഭക്ഷണമാണിത്. ഇതിലെ ഡയറ്റെറി ഫൈബറും മെഥിയോനൈന്‍ എന്ന വസ്തുവുമാണ് കൊളസ്ട്രോള്‍ കുറയ്ക്കാന്‍ സഹായിക്കുന്നത്.
ദഹനേന്ദ്രിയത്തിന്റെ ആരോഗ്യത്തിന്
ദഹനേന്ദ്രിയത്തിന്റെ ആരോഗ്യത്തിന് ഏറെ ഉത്തമമായ ഒന്നാണിത്. ദഹനം എളുപ്പമാക്കാന്‍ ഇത് സഹായിക്കുന്നു. കുടല്‍ ആരോഗ്യത്തിന് ഏറെ ആരോഗ്യകരമായ ഇത് മലബന്ധം നീക്കാനും ഇറിട്ടബില്‍ ബൗള്‍ സിന്‍ഡ്രോം അകറ്റാനും കുടല്‍ ക്യാന്‍സര്‍ തടയാനുമെല്ലാം ഏറെ ആരോഗ്യകരമാണ്. ഇതിലെ ഫൈബറുകളാണ് കുടല്‍ ക്യാന്‍സറിനെ പ്രതിരോധിയ്ക്കുന്നത്.
ഹൃദയാരോഗ്യത്തിന്
ഹൃദയാരോഗ്യത്തിന് ഉത്തമമാണ് താളില. കൊളസ്ട്രോള്‍ കുറയ്ക്കുന്ന ഗുണം തന്നെയാണ് ഏറെ ഗുണകരം. ഇതിനൊപ്പം ഇതിലുള്ള പൊട്ടാസ്യം ബിപി നിയന്ത്രണത്തിനും ഏറെ സഹായകമാണ്. സ്ട്രോക്കിനും ഹൃദയ പ്രശ്നങ്ങള്‍ക്കും കാരണമാകുന്ന രക്തത്തിലെ ഹീമോസെസ്റ്റീന്‍ തോതു കുറയ്ക്കാന്‍ ചേമ്പില ഏരെ നല്ലതാണ്.
ഇലക്ട്രോളൈറ്റ് ബാലന്‍സ്
ശരീരത്തിന് ഇലക്ട്രോളൈറ്റ് ബാലന്‍സ് നല്‍കുന്ന ഒന്നാണിത്. ഇതിലെ പൊട്ടാസ്യമാണ് ഈ ഗുണം നല്‍കുന്നത്. ഇത് കഴിയ്ക്കുന്നത് ശരീരത്തിന് ആവശ്യമായ പൊട്ടാസ്യം തോതു നല്‍കും. മസില്‍ വളരാനും ഹൃദയത്തിനും കാര്‍ബോഹൈഡ്രേറ്റുകളുടെ ബ്രേക്ക് ഡൗണിനും ആസിഡ് ബേസ് നില നിര്‍ത്തുന്നതിനുമെല്ലാം പൊട്ടാസ്യം ഏറെ പ്രധാനമാണ്.
ക്യാന്‍സറുകള്‍
ഇതു വേവിച്ചു കഴിയ്ക്കുന്നത് ക്യാന്‍സറുകള്‍ തടയാന്‍ സഹായകമാണെന്നു പഠനങ്ങള്‍ പറയുന്നു. കുടല്‍ ക്യാന്‍സര്‍ മാത്രമല്ല, മറ്റു ക്യാന്‍സറുകളും. ഇതിലെ വൈറ്റമിന്‍ സി നല്ലൊരു ആന്റിഓക്സിഡന്റ് ഗുണം നല്‍കുന്നതാണ് കാരണം. വൈറ്റമിന്‍ സി കാരണം ശരീരത്തിന്റെ പ്രതിരോധ ശേഷിയും മെച്ചപ്പെടുന്നു.
അനീമിയ (വിളര്‍ച്ച)
അനീമിയയ്ക്കുള്ള നല്ലൊരു പരിഹാരമാണ് ചേമ്പിലത്തോരന്‍. അയേണ്‍ സമ്പുഷ്ടമായ ഇത് ഹീമോഗ്ലോബിന്‍ ഉല്‍പാദനത്തിനു സഹായിക്കുന്നു. ഇതു കൊണ്ടു തന്നെ ശരീരത്തിലുണ്ടാകുന്ന തളര്‍ച്ചയും ക്ഷീണവുമെല്ലാം പരിഹരിയ്ക്കുന്നു. അയേണ്‍ കുറവിലൂടെ ഓക്സിജന്‍ രക്തത്തിലൂടെ ശരീര ഭാഗങ്ങള്‍ക്കു ലഭ്യമാകാതിരിയ്ക്കുന്നത് ക്ഷീണത്തിനുള്ള പ്രധാനപ്പെട്ട ഒരു കാരണമാണ്.
കണ്ണിന്റെ ആരോഗ്യത്തിന്
കണ്ണിന്റെ ആരോഗ്യത്തിന് ഏറെ ഉത്തമമാണ് ഇത്. വൈറ്റമിന്‍ എ ധാരാളം അടങ്ങിയതു തന്നെയാണു ഗുണം നല്‍കുന്നത്. മയോപ്പിയ, തിമിരം തുടങ്ങിയ പല രോഗങ്ങളും അകറ്റി നിര്‍ത്താന്‍ ഇതു കൊണ്ടു സാധിയ്ക്കുന്നു.
കോശങ്ങളുടെ നാശം
ശരീരത്തിലെ കോശങ്ങളുടെ നാശം തടയുന്നതിന് ഏറെ ഉത്തമമാണ് ചേമ്പില. ഇതിലെ ഫിനോളിക് ആസിഡ്, കരാറ്റനോയ്ഡുകള്‍ എന്നിവയെല്ലാം തന്നെ ആന്റിഓക്സിഡന്റ് ഗുണങ്ങളുള്ളവയാണ്. ആന്റിഓക്സിഡന്റുകള്‍ കോശനാശം നടയാന്‍ ഏറെ അത്യാവശ്യമാണ്. ഇതിലെ വൈറ്റമിന്‍ സിയും ഈ ഗുണം തന്നെയാണു നല്‍കുന്നത്.
ചര്‍മത്തിന്റ ആരോഗ്യത്തിന്
ചര്‍മത്തിന്റ ആരോഗ്യത്തിന് ഏറെ ഉത്തമമാണ് ഇത്. ചര്‍മ കോശങ്ങള്‍ക്കു പ്രായമേറുന്നതു തടയുന്ന ഒന്നാണിത്. ഇതിലെ വൈറ്റമിന്‍ എ, ബി, സി, മാംഗനീസ്, സിങ്ക്, കോപ്പര്‍, സെലേനിയം, പൊട്ടാസ്യം എന്നിവയാണ് ഇതിനു സഹായിക്കുന്നത്.
തടി കുറയ്ക്കാന്‍
തടി കുറയ്ക്കാന്‍ ഏറെ സഹായകമാണ് ഇതിലെ ഡയറ്റെറി ഫൈബറുകള്‍. ഇതില്‍ കലോറിയും സാച്വറേറ്റഡ് കൊഴുപ്പും തീരെ കുറവാണ്. ഇതാണ് തടി കുറയ്ക്കാന്‍ സഹായിക്കുന്നത്. ദഹനം മെച്ചപ്പെടുത്തുന്നതും സഹായിക്കുന്നു.
ശരീരത്തിന് ഊര്‍ജം
ശരീരത്തിന് ഊര്‍ജം നല്‍കാന്‍ കഴിയുന്ന ഒന്നാണിത്. ഇതിലെ പ്രോട്ടീനുകള്‍, ബി വൈറ്റമിനുകള്‍ എന്നിവയാണ് ഈ ഗുണം നല്‍കുന്നത്. അയേണ്‍ രക്തോല്‍പാദനം വര്‍ദ്ധിപ്പിയ്ക്കുന്നതു കൊണ്ട് ഓക്സിജന്‍ പ്രവാഹം ശക്തിപ്പെടുത്തി കോശങ്ങളിലേയ്ക്ക് ഓക്സിജന്‍ എത്തിയ്ക്കുന്നതും ഊര്‍ജത്തിന സഹായിക്കുന്നു.
ഗര്‍ഭിണികള്‍
ഗര്‍ഭിണികള്‍ ഇതു കഴിയ്ക്കുന്നത് ഏറെ നല്ലതാണ്. ഇതില്‍ ഗര്‍ഭകാലത്തു കുഞ്ഞുങ്ങളുടെ തലച്ചോറിന്റെ വളര്‍ച്ചയെ സഹായിക്കുന്ന ഫോളേറ്റുകള്‍ ധാരാളം അടങ്ങിയിരിയ്ക്കുന്നു. ഇത് ഭ്രൂണത്തിനുണ്ടാകാന്‍ സാധ്യതയുള്ള ശാരീരിക വൈകല്യങ്ങള്‍ ഒഴിവാക്കാനും അത്യാവശ്യമാണ്. ഡിഎന്‍എ രൂപീകരണത്തിന് അത്യാവശ്യമാണ് ഫോളേറ്റ്.
കിഡ്നി
ഹൈപ്പര്‍ ടെന്‍ഷന്‍ ഒഴിവാക്കാനുള്ള ഒന്നു കൂടിയാണിത്. സോഡിയവും കൊഴുപ്പും കുറവാണെന്നതാണ് ഗുണം നല്‍കുന്നത്. ഇതു കൊണ്ടു തന്ന കിഡ്നി പ്രശ്നങ്ങള്‍ ഒഴിവാക്കാനും നല്ലതാണ്.
