കൊല്ലം: കേരളപുരത്ത് ഗുണ്ടകളുടെ ആക്രമണത്തില്‍ ഗൃഹനാഥന് പരുക്ക്. സംഭവത്തില്‍ മൂന്ന് പേര്‍ അറസ്റ്റില്‍, ഇളമ്പള്ളൂര്‍ കേരളപുരം തണല്‍ നഗര്‍ സ്വദേശി ഷാഹുല്‍ ഹമീദിനാണു മര്‍ദ്ദനമേറ്റത്. കേരളപുരം കോളശേരി കോളനി ബി ജെ നിവാസ് ജിഷ്ണു, വാളത്തുങ്കല്‍ മനക്കര വയല്‍ വീട് ബിജു, വാളതുങ്കല്‍ കോട്ടുവാ തെക്കതില്‍ ഷീജ നിവാസ് ഷിബു എന്നിവരാണ് കുണ്ടറ പൊലീസിന്റെ പിടിയിലായത്.
ഇന്നലെ പുലര്‍ച്ചെ ഒരു മണിക്കായിരുന്നു സംഭവം. അയല്‍വാസിയായ യുവാവിനെ മര്‍ദ്ദിക്കാന്‍ എത്തിയ ഗുണ്ടകള്‍ വീട് മാറി ഷാഹുല്‍ ഹമീദിനെ മര്‍ദ്ദിക്കുകയായിരുന്നു. സാരമായി പരുക്കേറ്റ ഷാഹുല്‍ ഹമീദിനെ കുണ്ടറ താലൂക്ക് ആശുപത്രിയിലും തുടര്‍ന്ന് ജില്ലാ ആശുപത്രിയിലും പ്രവേശിപ്പിച്ചു. ഭാര്യ സുല്‍ബത് ബീവി, മകന്‍ സനോഫര്‍ എന്നിവര്‍ വീട്ടില്‍ ഉണ്ടായിരുന്നു. വീട്ടുപകരണങ്ങളും ഗുണ്ടകള്‍ തല്ലി തകര്‍ത്തു. പിതാവിനെ ഗുണ്ടകള്‍ മര്‍ദ്ദിക്കുന്നത് കണ്ട് നിന്ന മകന്‍ സനോഫര്‍ കുഴഞ്ഞ് വീണു. കോളശേരി സ്വദേശി ജിഷ്ണുവും സമീപവാസി സനോജും തമ്മിലുള്ള തര്‍ക്കമാണ് ഗുണ്ടാ ആക്രമണതില്‍ കലാശിച്ചത്.
ഈ കഴിഞ്ഞ 29ന് രാത്രിയില്‍ ജിഷ്ണു സനോജിന്റെ വീട്ടില്‍ എത്തി ആക്രമിക്കാന്‍ ശ്രമിക്കുകയും അസഭ്യം പറയുകയും ചെയ്തു. ഇതിന് എതിരെ സനോജ് കുണ്ടറ സ്റ്റേഷനില്‍ പരാതി നല്‍കിയ ശേഷം തിരികെ എത്തിയ സനോജിനേയും ഭാര്യയെയും ആക്രമിക്കാന്‍ ശ്രമിച്ചു. തുടര്‍ന്ന് ആക്രമണം ഭയന്ന് സനോജ് കുടുംബ സമേതം ഭാര്യാ സഹോദരന്‍ ഷിബുവിന്റെ വീട്ടിലേക്ക് മാറി. ഇതറിഞ്ഞ ജിഷ്ണുവും സംഘവും ഷിബുവിനെ മര്‍ദ്ദിക്കാന്‍ എത്തിയപ്പോഴാണ് വീട് മാറി കയറി ഷാഹുല്‍ ഹമീദിനെ മര്‍ദ്ദിച്ചത്. അക്രമണത്തിനു ശേഷം ഒളിവില്‍ പോയ പ്രതികളെ കുണ്ടറ പോലീസ് വാളത്തുങ്കല്‍ നിന്നുമാണ് പിടികൂടിയത്.
