മാതാപിതാക്കളുടെ മോഹങ്ങൾ സാക്ഷാത്ക്കരിക്കുവാൻ മകൾ എടുത്ത അപകടമരമായ ചെറുനീക്കത്തെക്കുറിച്ച് ഒരു ഹ്രസ്വചിത്രം… ‘അപ്പന്റെ മോള്.’ കുവൈറ്റിലെ ഇന്ത്യൻ കമ്യൂണിറ്റി സ്‌കൂൾ ഒന്നാം ക്‌ളാസ് വിദ്യാർത്ഥിനി ഇവാനിയ നാഷ് ആണ് ഈ രണ്ട് മിനിറ്റ് ചിത്രത്തിലെ നായിക. യൂട്യൂബ് റിലീസിന് മുൻപേ ‘അപ്പന്റെ മോള്’ എന്ന ഈ ഹ്രസ്വചിത്രം ന്യൂസ് ദെൻ വെബ്‌സൈറ്റിലൂടെ ഇപ്പോൾ റിലീസാവുകയാണ്.
കുവൈറ്റിലെ സാൽമിയ പ്രദേശത്തെ ഏതാനും മലയാളികളാണ് ഈ ഹ്രസ്വചിത്രത്തിന് പിന്നിൽ. കണ്ണൂർ സ്വദേശി നാഷ് വർഗീസ്, ഭാര്യ സോണിയ, മകൾ ഇവാനിയ, സുഹൃത്തുക്കൾ സന്തോഷ് കെസിയുടെയും ടോം ജോർജ്ജിന്റെയും കുടുംബങ്ങൾ, നാഷ് വർഗീസിന്റെ ഏതാനും സഹപ്രവർത്തകർ തുടങ്ങിയവരാണ് അഭിനയിച്ചത്.സുനിൽ കെ ചെറിയാനാണ് രചനയും സംവിധാനവും.
മക്കളെ പലവിധ പിരിമുറുക്കങ്ങളിലേയ്ക്ക് മാതാപിതാക്കൾ തള്ളിവിടുന്ന കാലത്ത്, ഇളംപ്രായത്തിൽ പോലും സ്വയമറിയാതെ ആ പിരിമുറുക്കം ഉള്ളിൽ ആവാഹിക്കുന്ന മകളാണ് ചിത്രത്തിലെ കേന്ദ്രകഥാപാത്രം. മകളായി അഭിനയിച്ച ഇവാനിയ എന്ന 7 വയസ്സുകാരി ഇതിന് മുൻപും പല ഹ്രസ്വചിത്രങ്ങളിലും പരസ്യചിത്രങ്ങളിലും അഭിനയിച്ചിട്ടുണ്ട്. കണ്ണൂർ കുടിയാന്മല സ്വദേശിയാണ് നാഷ് വർഗീസ്.
മൊബൈൽ ഫോണിലായിരുന്നു ചിത്രീകരണം.
