പത്തനംതിട്ട: സംസ്ഥാന ജൂനിയര്‍ വോളിബോള്‍ ചാമ്പ്യന്‍ഷിപ്പ് 26 മുതല്‍ 29 വരെ തീയതികളല്‍ മലയാലപ്പുഴ മുസലിയാര്‍ എന്‍ജിനീയറിങ് കോളേജ് സ്‌റ്റേഡിയത്തില്‍ നടക്കും. എല്ലാ ജില്ലകളില്‍ നിന്നുമായി 28 പുരുഷ-വനിതാ ടീമുകള്‍ പങ്കെടുക്കും. 26 ന് വൈകിട്ട് നാലിന് വോളിബോള്‍ അസോസിയേഷന്‍ സംസ്ഥാന പ്രസിഡന്റ് ബിനോയ് ജോസഫ് പതാക ഉയര്‍ത്തും. അഞ്ചിന് മന്ത്രി വീണാ ജോര്‍ജ് ചാമ്പ്യന്‍ഷിപ്പ് ഉദ്ഘാടനം ചെയ്യും.
28 ന് സംസ്ഥാന, ദേശീയഅന്തര്‍ദ്ദേശീയ വോളിബോള്‍ മുന്‍ താരങ്ങളേയും ഇപ്പോള്‍ വോളിബോളിന് നേതൃത്വം നല്‍കുന്ന താരങ്ങളെയും ആദരിക്കും. ആദരിക്കല്‍ സമ്മേളനം ഉദഘാടനവും മൊമെന്റോ വിതരണവും ജലവിഭവ മന്ത്രി റോഷി അഗസ്റ്റിന്‍ നിര്‍വഹിക്കും. മുന്‍ ദേശീയ വോളിബോള്‍ താരങ്ങളായ എസ്. ഗോപിനാഥ്, അബ്ദുള്‍ റസാഖ്, ജോണ്‍സണ്‍ ജേക്കബ്ബ്, ആര്‍. രാജീവന്‍, എന്നിവര്‍ മുഖ്യാതിഥികള്‍ ആയിരിക്കും. 29 ന് സമാപന സമ്മേളനം ഉദ്ഘാടനവും വിജിയികള്‍ക്ക് ജിംജി മാത്യു പാലക്കോത്ത് പീടികയില്‍ സ്‌പോണ്‍സര്‍ ചെയ്ത പി.ജി. മാത്യു മെമ്മോറിയല്‍ എവറോളിംഗ് ട്രോഫി വിതരണവും ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ നിര്‍വഹിക്കും. സംഘാടക സമിതി ചെയര്‍മാന്‍ എം. അബ്ദുള്‍ ഹാരീസ് അധ്യക്ഷത വഹിക്കും.
