പിതാവിനൊപ്പം സ്കൂട്ടറില് സഞ്ചരിക്കുകയായിരുന്ന വിദ്യാര്‍ഥിനി വാഹനാപകടത്തില്‍ മരിച്ചു. തൃശൂർ ആമ്പല്ലൂര്‍ വടക്കുമുറി പുത്തന്‍പറമ്പില്‍ സുനിലിന്റെ മകള്‍ ശിവാനി(14)യാണ് മരിച്ചത്. സ്കൂട്ടറില് ലോറിയിടിച്ച് റോഡില്‍ വീണുകിടന്ന ഇരുവരെയും കൊടകരയിലെ ആശുപത്രിയില്‍ എത്തിച്ചെങ്കിലും ശിവാനിയുടെ ജീവന്‍ രക്ഷിക്കാനായില്ല. ഗുരുതരമായി പരുക്കേറ്റ സുനില്‍ ചികിത്സയിലാണ്.
പുതുക്കാട് മൈതാനത്തിന് സമീപം ഇന്ന് (വെള്ളി) രാവിലെയാണ് അപകടം നടന്നത്. നന്തിക്കര ശ്രീരാമകൃഷ്ണ വിദ്യാനികേതന്‍ സ്‌കൂളിലെ എട്ടാം ക്ലാസ് വിദ്യാര്‍ഥിയാണ് ശിവാനി. സ്‌കൂളിലെ വാര്‍ഷികാഘോത്തില്‍ പങ്കെടുക്കാന്‍ പോകുന്നതിനിടെയാണ് അപകടം.
അപകടത്തെ തുടര്‍ന്ന് നിര്‍ത്താതെ പോയ ലോറി അങ്കമാലിയില്‍ നിന്ന് പൊലീസ് പിടികൂടി. ലോറി സ്കൂട്ടറില് ഇടിച്ചിട്ടില്ലെന്നും നിയന്ത്രണം വിട്ട് വാഹനം മറിഞ്ഞാണ് അപകടം ഉണ്ടായതെന്നും ഡ്രൈവര്‍ പൊലീസിന് മൊഴി നല്‍കി.
